الماتى وبلىسىندا اۋىل شارۋاشىلىعى سالاسىن دامىتۋ ماسەلەلەرىن تالقىلاۋ ءۇشىن ۇكىمەت، عىلىم جانە بيزنەس وكىلدەرىن جيناعان ءداستۇرلى جىل سايىنعى «ەگىنجاي كۇنى» شاراسى ءوتتى. ايتا كەتۋ كەرەك، بۇل شارا قازاقستان رەسپۋبليكاسى پرەزيدەنتى جانىنداعى ۇلتتىق عىلىم اكادەمياسىنىڭ تىكەلەي اتسالىسۋىمەن وتكىزىلىپ، تاجىريبە الماسۋ، جاڭا تەحنولوگيالار مەن وسىمدىك سورتتارىن ەنگىزۋ پلاتفورماسى رەتىندە ماڭىزدى ءرول اتقاردى.

شارانىڭ اشىلۋىندا ءسوز سويلەگەن الماتى وبلىسىنىڭ اكىمى مارات سۇلتانعازييەۆ:

– اۋىل شارۋاشىلىعى – ءبىزدىڭ نەگىزگى رەسۋرسىمىز. سالانى دامىتۋ جولىندا قويىلعان مىندەتتەردى زاماناۋي تەحنولوگيالاردى ەنگىزە وتىرىپ، بىرلەسىپ جانە ساپالى ورىنداۋ قاجەت! – دەدى.

ءوز كەزەگىندە ءوڭىر باسشىسى اۋىل شارۋاشىلىعى ادىستەرىن جەتىلدىرۋدىڭ ماڭىزدىلىعىن اتاپ ءوتىپ، وبلىستىڭ جەتىستىكتەرىمەن ءبولىستى. بۇگىندە الماتى وبلىسىندا اۋىل شارۋاشىلىعى وبلىس ەكونوميكاسىنىڭ نەگىزگى درايۆەرى، اۋىلدا وبلىس تۇرعىندارىنىڭ تۇرعىندارىنىڭ 84 پايىزى تۇرادى.

2024 جىلدىڭ العاشقى جارتىجىلدىعىندا وڭىردە اوك جالپى ءونىمى 190،1 ملرد تەڭگەنى قۇراپ، ناقتى كولەم يندەكسى 106،5 پايىزعا جەتكەن. ءوڭىر جالپى اۋىل شارۋاشىلىعى ءونىمى كولەمى بويىنشا رەسپۋبليكادا ەكىنشى ورىندا جانە ونىڭ ۇلەسى 12،1 پايىزدى قۇرايدى.

بيىلعى جىلى ءىس-شاراعا الماتى، جامبىل وبلىستارىنىڭ اكىمدەرى مەن جەتىسۋ وبلىسى اكىمىنىڭ ورىنباسارى، سۋ رەسۋرستارى جانە يرريگاسيا ءبىرىنشى ۆيسە-مينيسترى، اۋىل شارۋاشىلىعى ۆيسە-مينيسترى، ەلىمىزدىڭ جەتەكشى عالىمدارى، ءىرى اگروحولدينگتەر مەن فەرمەرلىك شارۋاشىلىقتاردىڭ وكىلدەرى قاتىستى.

تالقىلاۋعا تۇسكەن باستى تاقىرىپ – سۋ رەسۋرستارىنىڭ تاپشىلىعى ماسەلەسى جانە ونى شەشۋ جولدارى بولدى. قاتىسۋشىلار سۋ ۇنەمدەۋدىڭ يننوۆاسيالىق تەحنولوگيالارىن: تامشىلاتىپ سۋارۋدى، توپىراق ىلعالدىلىعى سەنسورلارىن، سۋ رەسۋرستارىن سيفرلىق جۇيەمەن باسقارۋدى ەنگىزۋ قاجەتتىگىن اتاپ ءوتتى.

ق ر ۇلتتىق عىلىم اكادەمياسىنىڭ پرەزيدەنتى اقىلبەك كۇرىشبايەۆ قازاقستاندا 2030 جىلعا قاراي سۋ رەسۋرستارىنىڭ كولەمى 15 پايىزعا ازايۋى مۇمكىن ەكەنىن، بۇل ۇلتتىق قاۋىپسىزدىككە ءقاۋىپ توندىرەتىنىن ايتتى. ول سۋ رەسۋرستارىن ۇقىپتى پايدالانۋعا شاقىردى، ەلدە ءالى دە كوپ كولەمدە توپىراقتى ارنالارمەن سۋارۋ جۇيەسى قولدانىلاتىنىن جانە سۋدى جەتكىزۋ كەزىندە كوپ شىعىنعا ۇشىرايتىنىن اتاپ ءوتتى.

– سۋ ۇنەمدەۋ تەحنولوگيالارىن بەلسەندى تۇردە ەنگىزۋ قاجەت. بۇل تەوريا ەمەس، اۋىل شارۋاشىلىعى داقىلدارىنىڭ سۋ تۇتىنۋ كولەمىن قىسقارتىپ، ونىمدىلىكتى ارتتىرۋدىڭ ناقتى مۇمكىندىگى، – دەپ اتاپ ءوتتى اقىلبەك كۇرىشبايەۆ.