قاۋلىعا سايكەس كارانتين شارالارىن جۇمسارتۋ كەزەڭىندە الماتى وبلىسىنىڭ اۋماعىندا COVID-19 ينفەكسياسى تىركەلگەنىنە بايلانىستى كارانتيننىڭ كۇشەيتىلگەن رەجيمى ەنگىزىلگەن ەلدى مەكەندەر مەن نىسانداردان باسقا جەرلەردە وپتيكا دۇكەندەرى، تۇرمىستىق تەحنيكا ساتاتىن دۇكەندەر، فوتوسالوندار، گۇل ساتاتىن كيوسكىلەر، جىلجىمايتىن مۇلىكتەرگە قاتىستى وپەراسيالار اتقاراتىن كومپانيالار، جارناما اگەنتتىكتەرى، ساقتاندىرۋ كومپانيالارى، لومباردتار، سول سياقتى اقپاراتتىق-كوممۋنيكاسيالىق تەحنولوگيالار كومپانيالارى ءوز جۇمىسىن باستايدى.
تاڭەرتەڭگى ساعات 9-دان كەشكى 17.00-گە دەيىن تۇرمىستىق جانە ەلەكتروندى تەحنيكالاردى جوندەۋ قىزمەتىن كورسەتەتىن نىساندار، سول سياقتى اۋماعى 500 م² دەيىنگى بارلىق ازىق-تۇلىك دۇكەندەرى جۇمىس ىستەيدى.
شاشتارازدار، سۇلۋلىق سالوندارى الدىن الا جازىلىم بويىنشا قايتا ىسكە كىرىسەدى، جۇمىس كەستەسى - ساعات 9-دان 18.00-گە دەيىن.
ساناتورييلەردە، بالالاردى ساۋىقتىرۋ مەكەمەلەرىندە، مەملەكەتتىك ۇلتتىق تابيعي ساياباقتاردا، مۋزەيلەردە جازعى تۋريستىك ماۋسىمعا دايىندىق جۇمىستارى باستالادى، تۋريستىك فيرمالار جۇمىس ىستەيدى، ءبىراق ازىرگە تۋريستەردى قابىلداۋعا جانە قىزمەت كورسەتۋگە قۇقىعى جوق.
سول سياقتى اشىق الاڭدا كورەرمەنسىز سپورتتىق شارالار مەن جاتتىعۋلار وتكىزۋگە رۇقسات بەرىلدى.
بۇل رەتتە وبلىستىڭ اۋدان، قالا اكىمدەرىنە، وبلىستىق كاسىپكەرلىك جانە يندۋستريالدى-يننوۆاسيالىق دامۋ باسقارماسىنا جانە وبلىستىق «اتامەكەن» كۇپ-عا اقپاراتتىق ارنالار ارقىلى قىزمەتتىڭ شەكتەۋلەرىن الىپ تاستاۋعا بەكىتىلگەن وبەكتىلەردى حاباردار ەتۋ، بەيىندى قاۋىمداستىقتاردىڭ قاتىسۋىمەن بەينەكونفەرەنسيا وتكىزۋ، رەسمي ۆەب-رەسۋرستارعا قاجەتتى اقپاراتتى ورنالاستىرۋدى قامتاماسىز ەتۋ تاپسىرىلدى.
اتاپ وتەرلىگى، الماتى وبلىسى اۋماعىندا كارانتين ءالى الىنىپ تاستالعان جوق. سوندىقتان بارلىق سانيتارلىق-دەزينفەكسيالىق شارالار تالاپتارىن قاتاڭ ساقتاۋ قاجەت.
وسى تالاپتاردىڭ بۇزىلۋى نەمەسە ورىندالماۋى انىقتالعان جاعدايدا توتەنشە جاعداي كەزىندەگى ق ر زاڭنامالارىنا سايكەس جەدەل شارالار قابىلداناتىن بولادى.
جاڭا قاۋلى ءوڭىر اۋماعىندا بۇگىننەن باستاپ كۇشىنە ەندى.
