تالعار اۋدانىندا ەۋرازيالىق لوگيستيكالىق پاركىنىڭ العاشقى ىرگەتاسى قالاندى. پارك الماتىنىڭ ۇلكەن اينالما اۆتوموبيل جولىنىڭ (ءۇااج) ماڭىندا ورنالاساتىن 13 گەكتار اۋماققا سالىناتىن بولادى. بۇل جۇك كولىكتەرى ءۇشىن قولايلى جول قاتىناسىن قامتاماسىز ەتىپ، جۇكتىڭ قازاقستان مەن شەتەلدەرگە جەتكىزىلۋىن جەدەلدەتەدى، سونداي-اق يمپورتتىق-ەكسپورتتىق لوگيستيكانى جەڭىلدەتەدى، – دەپ حابارلايدى Dalanews.kz الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ.

كەشەننىڭ قۇرامىندا جالپى اۋماعى 50 مىڭ شارشى مەتردەن اساتىن قويما عيماراتتارى، جۇك جانە جەڭىل كولىككە ارنالعان تۇراقتار، اكىمشىلىك-تۇرمىستىق عيماراتتار بولادى. جوبانىڭ جالپى ينۆەستيسيا كولەمى 22 ميلليارد تەڭگەنى قۇرايدى.

الماتى وبلىسىنىڭ اكىمى مارات سۇلتانعازييەۆ جوبانىڭ ماڭىزدىلىعىن اتاپ ءوتىپ، ەۋرازيالىق لوگيستيكالىق پارك قازاقستاننىڭ حالىقارالىق ساۋداداعى ءرولىن نىعايتۋعا، كولىك-لوگيستيكالىق ينفراقۇرىلىمدى دامىتۋعا جانە ءىرى شەتەلدىك ينۆەستورلاردى تارتۋعا مۇمكىندىك بەرەتىنىن ايتتى. ونىڭ سوزىنشە:

– جوبانىڭ ينۆەستيسيالىق كولەمى 22 ميلليارد تەڭگە، ال العاشقى 10 جىلدا كۇتىلەتىن تابىس – 50 ميلليارد تەڭگە. پايدالانۋعا بەرۋ كەزەڭىندە 250 جۇمىس ورنى اشىلادى، 700-دەن استام جاناما جۇمىس ورنى قامتاماسىز ەتىلەدى. جوبا 18 ميلليارد تەڭگە كولەمىندە سالىق ءتۇسىمىن قامتاماسىز ەتەدى. 2029 جىلعا قاراي قازاقستانداعى ا جانە ۆ ساناتىنداعى قويما الاڭدارىن 4 ميلليون شارشى مەترگە دەيىن ۇلعايتۋ كوزدەلگەن. بۇل ينفراقۇرىلىمداعى تاپشىلىقتى شەشۋگە مۇمكىندىك بەرەدى، – دەدى وبلىس اكىمى.