Talǵar aýdanynda Eýrazıalyq logıstıkalyq parkiniń alǵashqy irgetasy qalandy. Park Almatynyń Úlken aınalma avtomobıl jolynyń (ÚAAJ) mańynda ornalasatyn 13 gektar aýmaqqa salynatyn bolady. Bul júk kólikteri úshin qolaıly jol qatynasyn qamtamasyz etip, júktiń Qazaqstan men shetelderge jetkizilýin jedeldetedi, sondaı-aq ımporttyq-eksporttyq logıstıkany jeńildetedi, – dep habarlaıdy Dalanews.kz Almaty oblysy ákiminiń baspasóz qyzmetine silteme jasap.
Keshenniń quramynda jalpy aýmaǵy 50 myń sharshy metrden asatyn qoıma ǵımarattary, júk jáne jeńil kólikke arnalǵan turaqtar, ákimshilik-turmystyq ǵımarattar bolady. Jobanyń jalpy ınvestısıa kólemi 22 mıllıard teńgeni quraıdy.
Almaty oblysynyń ákimi Marat Sultanǵazıev jobanyń mańyzdylyǵyn atap ótip, Eýrazıalyq logıstıkalyq park Qazaqstannyń halyqaralyq saýdadaǵy rólin nyǵaıtýǵa, kólik-logıstıkalyq ınfraqurylymdy damytýǵa jáne iri sheteldik ınvestorlardy tartýǵa múmkindik beretinin aıtty. Onyń sózinshe:
– Jobanyń ınvestısıalyq kólemi 22 mıllıard teńge, al alǵashqy 10 jylda kútiletin tabys – 50 mıllıard teńge. Paıdalanýǵa berý kezeńinde 250 jumys orny ashylady, 700-den astam janama jumys orny qamtamasyz etiledi. Joba 18 mıllıard teńge kóleminde salyq túsimin qamtamasyz etedi. 2029 jylǵa qaraı Qazaqstandaǵy A jáne V sanatyndaǵy qoıma alańdaryn 4 mıllıon sharshy metrge deıin ulǵaıtý kózdelgen. Bul ınfraqurylymdaǵy tapshylyqty sheshýge múmkindik beredi, – dedi oblys ákimi.
