الماتى وبلىسىندا پوليسيا قىزمەتكەرىن كولىكپەن سۇيرەپ وتكەن جۇرگىزۋشى ۇستالدى، - دەپ حابارلايدى Dalanews.kz.

الماتى وبلىسىندا جول قوزعالىسى ەرەجەلەرىن بۇزعان جۇرگىزۋشى پوليسەيدى ءوز كولىگىمەن سۇيرەپ ءوتتى. بايسەيىت اۋىلىندا سەنىپ تاپسىرىلعان ۋچاسكەنى باقىلاۋ كەزىندە پاترۋلدىك پوليسيا باتالونىنىڭ قىزمەتكەرلەرى، پوليسيا كاپيتانى قانات تەمىربايەۆ پەن ەلدار ماحمۋدوۆ جول ەرەجەسىن بۇزعانى ءۇشىن Toyota Ipsum اۆتوكولىگىن توقتاتتى.

حاتتامانى تولتىرۋ كەزىندە دوستىق اۋىلىنىڭ 34 جاسار جۇرگىزۋشىسى زاڭدى تالاپتارعا باعىنۋدان باس تارتتى. پوليسەيلەردى ەلەمەي، ول كولىككە وتىرىپ، كاپيتان تەمىربايەۆتىڭ ساۋساقتارىن ەسىگىمەن قىسىپ قالعانىنا قاراماستان، ورنىنان جىلدام قوزعالىپ، وفيسەردى شامامەن 10-15 مەتر سۇيرەپ ءوتتى. پوليسيا قىزمەتكەرى تاسجولدىڭ ۇستىنە قۇلاپ، جاراقات الدى.

قۇقىق بۇزۋشى ءتارتىپ ساقشىلارىنان جاسىرىنۋعا تىرىستى. وعان قاراماستان، بۇل ارەكەت ناتيجەسىز بولىپ شىقتى. كوپ ۇزاماي ول ۇستالىپ، شەلەك اۋىلىنىڭ پوليسيا بولىمىنە جەتكىزىلدى.

بيلىك وكىلىنە قاتىستى كۇش قولدانۋ فاكتىسى بويىنشا قىلمىستىق ءىس قوزعالدى، ال جۇرگىزۋشى ۋاقىتشا ۇستاۋ يزولياتورىنا قاماۋعا الىندى. سونىمەن قاتار، وعان جول قوزعالىسى ەرەجەلەرىن بۇزعانى ءۇشىن اكىمشىلىك حاتتاما تولتىرىلدى.

وقيعانىڭ بارلىق ءمان-جايلارىن انىقتاۋ ءۇشىن تەرگەۋ جۇرگىزىلىپ جاتىر.