الماتى وبلىسىنىڭ شەلەك اۋىلىندا تۇراتىن سانيام راحماتۋلينا ينسۋلين جەتىسپەۋشىلىگىنە قاتىستى جەرگىلىكتى اۋرۋحانا باسشىلىعىمەن داۋلاسىپ ءجۇرىپ، قىلمىستىق ءىستىڭ نىساناسىنا اينالعان. داۋدىڭ سوڭى ونى ەركىنەن تىس پسيحياتريالىق ورتالىققا جاتقىزۋعا، ال 10 جاسار ۇلىن بالالار ۇيىنە وتكىزۋگە اكەلگەن، دەپ حابارلايدى Dalanews.kz ۆرەميا گازەتىنە سىلتەمە جاساپ. 

ءىى توپ مۇگەدەكتىگى بار راحماتۋلينا 2022 جىلى اۋداندىق اۋرۋحانا باسشىسى گۇلنار قۋرامەتوۆادان دارى-دارمەك ماسەلەسىن شەشۋدى تالاپ ەتكەننەن كەيىن، ول پوليسياعا ارىز تۇسىرگەن. كەيىن الەۋمەتتىك جەلىدەگى قۋرامەتوۆانى «بەدەلىنە نۇقسان كەلتىرەتىن» جازبالارعا قاتىستى قىلمىستىق ءىس قوزعالىپ، سانيام سول ىسكە قاتىستى كۇدىكتى رەتىندە قارالدى.

سوت-پسيحولوگيالىق ساراپتاما ونىڭ «پسيحيكالىق اۋىتقۋى بار» دەگەن قورىتىندى شىعارىپ، راحماتۋلينانى كۇشتەپ پسيحياتريالىق ورتالىققا جاتقىزۋعا نەگىز بولعان. ايەلدىڭ ايتۋىنشا، ونى ۇيىنەن سيلوۆيكتەر الىپ كەتكەن، ال ۇلى – باعاناشىلداعى بالالار ۇيىنە جونەلتىلگەن. كەيىن ساراپتاماعا قاتىستى قۇجاتتاعى ونىڭ «ەرىكتى كەلىسىم» قولتاڭباسىنىڭ قولدان جاسالعانى انىقتالدى.

2023–2024 جىلدار ارالىعىندا بىرنەشە سوت وتىرىسى ءوتتى.

الماتى وبلىستىق سوتى راحماتۋلينانىڭ پسيحيكالىق اۋىتقۋى جوق ەكەنىن انىقتادى.

تالعار اۋداندىق سوتى ونى پسيحبولىمگە ءماجبۇرلى جاتقىزۋدى زاڭسىز دەپ تانىپ، مەديسينالىق ۇيىمداردى قۇجاتتاردى جويۋعا مىندەتتەدى.

سوت ەكى مەديسينا مەكەمەسىنە 2 ملن تەڭگە وتەماقى تولەۋدى مىندەتتەدى.

سۋديالار سانيام راحماتۋلينانىڭ كونستيتۋسيالىق قۇقىقتارى ورەسكەل بۇزىلعانىن اتاپ ءوتتى.

راحماتۋلينا وزىنە قاتىستى قۇجاتتاردىڭ بۇرمالانعانىن، دارىگەرلەر مەن پوليسەيلەردىڭ قىزمەت وكىلەتىن اسىرا پايدالانعانىن ايتادى. ونىڭ ايتۋىنشا، بۇل جاعداي «زاڭسىز باس بوستاندىعىنان ايىرۋعا» ۇقسايدى.

سانيام دەنساۋلىق ساقتاۋ ءمينيسترى اقمارال ءالنازاروۆا مەن باس پروكۋرور بەرىك اسىلوۆقا دا حات جولداعان. الايدا ازىرگە ونىڭ شاعىمدارىنا ناقتى شارا قابىلدانعانى تۋرالى اقپارات جوق.

راحماتۋلينا سوتتا جەڭىسكە جەتكەنىمەن، ونىڭ مالىمەتىنشە، وسى ىسكە قاتىسى بار لاۋازىمدى تۇلعالار – اۋداندىق اۋرۋحانا باسشىسى گۇلنار قۋرامەتوۆا مەن پوليسەي دەنيس ولشانسكيي – قىزمەتىن جالعاستىرىپ وتىر.

سانيام راحماتۋلينا ادىلدىك ورناپ، جاۋاپتىلار جازالانعانىن كۇتەدى.