Almaty oblysynyń Shelek aýylynda turatyn Saniiam Rahmatýlina insýlin jetispeýshiligine qatysty jergilikti aýrýhana basshylyǵymen daýlasyp júrip, qylmystyq istiń nysanasyna ainalǵan. Daýdyń sońy ony erkinen tys psihiatriialyq ortalyqqa jatqyzýǵa, al 10 jasar ulyn balalar úiine ótkizýge ákelgen, dep habarlaidy Dalanews.kz Vremia gazetine silteme jasap.
II top múgedektigi bar Rahmatýlina 2022 jyly aýdandyq aýrýhana basshysy Gúlnar Qýrametovadan dári-dármek máselesin sheshýdi talap etkennen keiin, ol politsiiaǵa aryz túsirgen. Keiin áleýmettik jelidegi Qýrametovany «bedeline nuqsan keltiretin» jazbalarǵa qatysty qylmystyq is qozǵalyp, Saniiam sol iske qatysty kúdikti retinde qaraldy.
Sot-psihologiialyq saraptama onyń «psihikalyq aýytqýy bar» degen qorytyndy shyǵaryp, Rahmatýlinany kúshtep psihiatriialyq ortalyqqa jatqyzýǵa negiz bolǵan. Áieldiń aitýynsha, ony úiinen silovikter alyp ketken, al uly – Baǵanashyldaǵy balalar úiine jóneltilgen. Keiin saraptamaǵa qatysty qujattaǵy onyń «erikti kelisim» qoltańbasynyń qoldan jasalǵany anyqtaldy.
2023–2024 jyldar aralyǵynda birneshe sot otyrysy ótti.
Almaty oblystyq soty Rahmatýlinanyń psihikalyq aýytqýy joq ekenin anyqtady.
Talǵar aýdandyq soty ony psihbólimge májbúrli jatqyzýdy zańsyz dep tanyp, meditsinalyq uiymdardy qujattardy joiýǵa mindettedi.
Sot eki meditsina mekemesine 2 mln teńge ótemaqy tóleýdi mindettedi.
Sýdialar Saniiam Rahmatýlinanyń konstitýtsiialyq quqyqtary óreskel buzylǵanyn atap ótti.
Rahmatýlina ózine qatysty qujattardyń burmalanǵanyn, dárigerler men politseilerdiń qyzmet ókiletin asyra paidalanǵanyn aitady. Onyń aitýynsha, bul jaǵdai «zańsyz bas bostandyǵynan aiyrýǵa» uqsaidy.
Saniiam densaýlyq saqtaý ministri Aqmaral Álnazarova men bas prokýror Berik Asylovqa da hat joldaǵan. Alaida ázirge onyń shaǵymdaryna naqty shara qabyldanǵany týraly aqparat joq.
Rahmatýlina sotta jeńiske jetkenimen, onyń málimetinshe, osy iske qatysy bar laýazymdy tulǵalar – aýdandyq aýrýhana basshysy Gúlnar Qýrametova men politsei Denis Olshanskii – qyzmetin jalǵastyryp otyr.
Saniiam Rahmatýlina ádildik ornap, jaýaptylar jazalanǵanyn kútedi.
