الماتى وبلىسىندا 16 مىڭ گەكتاردان استام پايدالانىلماي جاتقان اۋىل شارۋاشىلىعى ماقساتىنداعى جەرلەر مەملەكەتتىك مەنشىككە قايتارىلدى، دەپ حابارلايدى Dalanews.kz

الماتى وبلىسىندا اۋىل شارۋاشىلىعى ماقساتىنداعى پايدالانىلماي جاتقان جەرلەردى انىقتاۋ جانە ولاردى مەملەكەتتىك مەنشىككە قايتارۋ جۇمىستارى جۇيەلى تۇردە جۇرگىزىلۋدە. بۇل تۋرالى وبلىستىق جەر قاتىناستارى باسقارماسىندا حابارلادى.

باسقارما دەرەكتەرىنە سايكەس، بيىلعى جىلدىڭ باسىنان بەرى نىسانالى ماقساتى بويىنشا پايدالانىلماي جاتقان جالپى كولەمى 50 083 گەكتاردى قۇرايتىن 446 جەر ۋچاسكەسى انىقتالدى. اۋداندار مەن قالالاردىڭ اكىمدىكتەرىمەن سالىق جۇكتەمەسىن ودان ءارى كۇشەيتۋ جانە جەر زاڭناماسىنا سايكەس قايتارۋ راسىمدەرىن جۇرگىزۋ ءۇشىن ءتيىستى جۇمىستار جۇرگىزىلۋدە.

قازىرگى تاڭدا 8 214 گەكتاردى قۇرايتىن 71 جەر ۋچاسكەسى بويىنشا ماتەريالدار جەر رەسۋرستارىن باسقارۋ دەپارتامەنتىنە جولدانىپ، جۇمىسقا قابىلداندى. سونىمەن قاتار، 23 747 گەكتار اۋماقتاعى 37 جەر ۋچاسكەسى بويىنشا تالاپ-ارىزدار سوت قاراۋىندا، ال جالپى كولەمى 2 486،0 گەكتار بولاتىن ۋچاسكەلەر بويىنشا سوت شەشىمى شىعىپ، مەملەكەت مەنشىگىنە قايتارىلدى.

جىل باسىنان بەرى ەرىكتى تۇردە مەملەكەت مەنشىگىنە 14 481،32 گەكتار جەر قايتارىلدى. ەڭ كوپ قايتارىلعان اۋماقتار جامبىل (3 119،0 گا)، بالقاش (7 961،87 گا) جانە كەگەن (1 893،0 گا) اۋداندارىنا تيەسىلى. جالپى العاندا، 2025 جىلدىڭ باسىنان بەرى مەملەكەت مەنشىگىنە قايتارىلعان جەر كولەمى 16 967 گەكتاردى قۇرادى.

سونىمەن قاتار، جالعا الۋ شارتتارىنىڭ ورىندالۋىنا باقىلاۋ كۇشەيتىلدى. جالپى كولەمى 30 827،87 گەكتاردى قۇرايتىن 216 جەر پايدالانۋشىعا شارت تالاپتارىن بۇزعانى ءۇشىن ەسكەرتۋ جىبەرىلدى. تالاپتار ورىندالماعان جاعدايدا ماتەريالدار سوت ورگاندارىنا جولدانادى.