«AMANAT» پارتياسى سۋ تاسقىنىنان زيان شەككەندەرگە العاشقىلاردىڭ ءبىرى بولىپ كومەك قولىن سوزىپ، گۋمانيتارلىق كومەك جيناۋدى باستاپ كەتتى، – دەپ حابارلايدى Dalanews.kz الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ.
الماتى وبلىسىندا سۋ تاسقىنى بولعان وڭىرلەرگە كومەك جيناۋ قىزۋ ءجۇرىپ جاتىر. بۇگىن يگى باستاماعا وبلىستىق AMANAT پارتياسىنىڭ مۇشەلەرى قوسىلدى.
– بىرنەشە ءوڭىردى سۋ الىپ جاتقاندىعى بارشامىزدىڭ قابىرعامىزدى قايىستىرىپ وتىر. ەلىمىز ءۇشىن، حالقىمىز ءۇشىن قولدان كەلگەن كومەكتى ايانىپ قالمايمىز. زارداپ شەككەن ايماقتارداعى ارىپتەستەرىمىزبەن حابارلاسىپ، قانداي قاجەتتى قۇرال جابدىقتار كەرەك ەكەنىن سۇرادىق. ولاردىڭ ءبىرىنشى سۇرانىسى – رەزەڭكە اياق كيىم. پارتيالاستار مەن دەپۋتاتتىق فراكسيا مۇشەلەرى 1 مىڭنان اسا رەزەڭكە ەتىك جيناپ، العاشقى كومەك لەگىن باستادى، – دەدى «AMANAT» پارتياسى الماتى وبلىستىق فيليالى ءتوراعاسىنىڭ ورىنباسارى اسلان كۋبەنتايەۆ.
ايتا كەتۋ كەرەك، تابيعي اپات ايماعىنداعى تۇرعىندارعا كومەك قولىن سوزامىن دەگەن ۆولونتەرلەر مەن وبلىس تۇرعىندارى ءۇشىن «الاتاۋ جاستارى» كمم وبلىستىق ۆولونتەرلىك شتابى ساعات 09:00-دەن 18:30-گە دەيىن جۇمىس ىستەيدى. وسى ۋاقىت ارالىعىندا ءوڭىر تۇرعىندارى حالىققا قاجەتتى زاتتاردى الىپ كەلىپ، وتكىزە الادى. قابىلداۋ پۋنكتى قونايەۆ قالاسىنداعى سەنترالنايا كوشەسىندەگى 19 ۇيدە ورنالاسقان.
