الماتى قالاسىنىڭ ماڭايىنداعى جول ينفراقۇرىلىمىنا قاراستى سۋ وتكىزگىش قۇبىرلاردىڭ تەحنيكالىق جاعدايى مەن سۋ وتكىزۋ قابىلەتى تەكسەرىلدى، دەپ حابارلايدى Dalanews.kz
بۇل جۇمىس كوكتەمگى قار ەرۋ كەزەڭى مەن جاۋىن-شاشىن كەزىندە جولداردىڭ قاۋىپسىزدىگىن قامتاماسىز ەتۋ ماقساتىندا جۇرگىزىلدى.
سۋ وتكىزگىش قۇبىرلار – جولدىڭ ماڭىزدى ەلەمەنتتەرىنىڭ ءبىرى. ولار ارتىق سۋدى دەر كەزىندە وتكىزىپ، جول توسەمىنىڭ بۇزىلۋىنا، شايىلۋىنا جانە سۋ باسۋ جاعدايلارىنا جول بەرمەيدى. ۋاقىتىلى جۇرگىزىلگەن تەكسەرۋلەر قۇبىرلاردىڭ بىتەلۋ، توزۋ نەمەسە زاقىمدانۋ سەكىلدى ماسەلەلەرىن انىقتاۋعا مۇمكىندىك بەرەدى.
ماماندار تەكسەرۋ بارىسىندا قۇبىرلاردىڭ وتكىزگىشتىك دەڭگەيىن، تەحنيكالىق جاي-كۇيىن جانە تازالىق جاعدايىن باعالادى. قاجەت بولعان جاعدايدا تازالاۋ جانە جوندەۋ جۇمىستارىن جۇرگىزۋ بويىنشا ناقتى ۇسىنىستار بەرىلدى.
بۇل شارالار جول قوزعالىسىنىڭ قاۋىپسىزدىگىن ارتتىرۋمەن قاتار، جولداردىڭ ۇزاق مەرزىمگە ساقتالۋىنا جانە اپاتتى جاعدايلاردىڭ الدىن الۋعا باعىتتالعان.
