بەلگىلى تەلەجۇرگىزۋشى ءلايلا سۇلتان قىزى ءانشى الماس كىشكەنبايەۆقا قاتىستى ايىپتاۋعا پىكىر ءبىلدىردى، دەپ جازادى Dalanews.kz.
ءلايلا سۇلتان قىزى جاسوسپىرىمگە ءتيىستى دەگەن كۇدىككە ىلىنگەن ءانشى الماس كىشكەنبايەۆتى قولداپ، ونىڭ جاقسى تاربيەمەن وسكەنىن جانە مۇنداي ىسكە بارۋى ەكىتالاي ەكەنىن مالىمدەدى. دەگەنمەن “بارلىعى تەكسەرىلىپ، ءادىل شەشىم شىعۋى ءتيىس” دەگەن ويىن دا جاسىرمادى.
ايتا كەتەلىك، سۇلتان قىزى كەزىندە كىشكەنبايەۆتىڭ ساحناعا شىعۋىنا ىقپال ەتكەن پروديۋسەر بولعان ەدى.
“الماس تۋرالى… شىققان جەرىن بىلەتىندىكتەن، اناسىن، العان تاربيەسىن كورگەندىكتەن، ءوز باسىم جاماندىققا قيمايمىن. راس بولسا، قاشىپ كەتپەسى انىق، جاۋاپقا تارتىلادى. وتىرىك، جالا جابىلعان بولسا، 17 جاستاعى بالا اتا-اناسىمەن بىرگە كەشىرىم سۇراپ، ءىس جابىلا سالا ما؟ ال ايرانداي توگىلگەن الماستىڭ ابىرويى شە؟، – دەدى ءلايلا سۇلتان قىزى.
ايىپتاۋدىڭ ءمان-جايى
بۇعان دەيىن جۋرناليست ميحايل كوزاچكوۆ Telegram كانالىندا 2007 جىلى تۋعان بوزبالانىڭ پوليسياعا شاعىم تۇسىرگەنىن جازعان. ايتۋىنشا، 17 جاسار كۋرەرگە كەشكى ۋاقىتتا ءۇش بوتەلكە سىراعا تاپسىرىس بەرىلگەن. تاۋاردى جەتكىزگەن سوڭ، شامامەن 40 جاستاعى ەر ادام ءجاسوسپىرىمدى بىرگە ءىشۋدى ۇسىنعان جانە ينتيمدىك تۇرعىدا تيىسكەن دەگەن دەرەك كەلتىرىلگەن.
وقيعاعا بايلانىستى جەتكىنشەكتىڭ اكەسى بىردەن قۇقىق قورعاۋ ورگاندارىنا جۇگىنگەن. كەيىن پوليسيا قىزمەتكەرلەرى ءانشى الماس كىشكەنبايەۆتى بولىمشەگە جەتكىزگەنىن راستادى. تەكسەرۋ بارىسىندا سىراعا تاپسىرىس بەرگەن ادام ءدال وسى كىشكەنبايەۆ ەكەنى انىقتالدى، ءبىراق ونىڭ قىلمىستىق ارەكەتكە بارعانى ءالى دالەلدەنگەن جوق.
الماتى قالالىق پوليسيا دەپارتامەنتى بۇل وقيعاعا وراي رەسمي تۇسىنىكتەمە بەردى:
“اكەسى كامەلەتكە تولماعان ۇلىنا ءتيىسۋ فاكتىسى بويىنشا ارىز جازدى. قازىرگى ۋاقىتتا تەكسەرۋ جۇرگىزىلىپ جاتىر. بارلىق ءمان-جايدى انىقتاۋ ءۇشىن ازامات ك. پوليسياعا جەتكىزىلدى”.
زاڭگەرلەردىڭ پىكىرىنشە، ەگەر كۇدىكتىڭ راستالماعانى انىقتالسا، كىشكەنبايەۆتىڭ ابىرويىن قالپىنا كەلتىرۋ ماسەلەسى ءوز الدىنا بولەك قارالۋى مۇمكىن. ال ەگەر ءجاسوسپىرىمنىڭ ارىزىنداعى دەرەكتەر راس بولسا، ءانشى زاڭ الدىندا جاۋاپ بەرەدى.
الماس كىشكەنبايەۆتىڭ ءوزى ازىرگە ەشقانداي رەسمي مالىمدەمە جاساعان جوق.
ءىستىڭ اق-قاراسىن اجىراتۋ ءۇشىن پروديۋسەر ەرلان اليموۆكە بايلانىسقا شىققان ەدىك. الايدا ول ءۇش اي بۇرىن انشىمەن جۇمىس ىستەۋىن توقتاتقانىن مالىمدەدى.
