الاياقتار WhatsApp اككاۋنتتارىن كوزگە تۇسپەي باسىپ الۋدىڭ جاڭا ءادىسىن قولدانا باستادى. بۇل ءتاسىل GhostPairing دەپ اتالادى، دەپ حابارلايدى Dalanews.kz.
مامانداردىڭ ايتۋىنشا، جاڭا سحەما SIM-كارتانى اۋىستىرۋدى، اككاۋنتتى بۇزۋدى نەمەسە كۇردەلى تەحنيكالىق ارەكەتتەردى قاجەت ەتپەيدى. اككاۋنتتى باسىپ الۋ WhatsApp-تا قوسىمشا قۇرىلعىلاردى تىركەۋ ارقىلى جۇزەگە اسادى.
قالاي الدايدى؟
الاياقتار WhatsApp نەمەسە Facebook اتىنان حابارلاما جىبەرىپ، سىلتەمە ۇسىنادى. ول سىلتەمە جالعان سايتقا اپارادى. وندا «قولجەتىمدىلىكتى راستاۋ» دەگەن سىلتاۋمەن پايدالانۋشىدان تەلەفون ءنومىرى مەن راستاۋ كودى سۇرالادى.
ەگەر ادام وسى كودتى ەنگىزسە، اككاۋنتتى ءوز ەركىمەن بەرگەن بولىپ سانالادى. وسىدان كەيىن قاسكويلەر حات-حابارلامالاردىڭ بارىنە تولىق قول جەتكىزىپ، ۇزاق ۋاقىت بويى بايقالماي وتىرۋى مۇمكىن.
اككاۋنتتىڭ بۇزىلعانىن قالاي بىلۋگە بولادى؟
اككاۋنتتىڭ بۇزىلعان-بۇزىلماعانىن تەكسەرۋدىڭ جالعىز جولى – WhatsApp-تاعى «بايلانىستىرىلعان قۇرىلعىلار» ءبولىمىن قاراۋ كەرەك. ەگەر ول جەردە وزىڭىزگە بەلگىسىز قۇرىلعى كورسەتىلسە، اككاۋنت قاۋىپكە ۇشىراعان دەگەن ءسوز.
نە ەستە ساقتاۋ كەرەك؟
وسىعان بايلانىستى ساراپشىلار ەسكەرتۋ جاسادى:
- WhatsApp ەشقاشان راستاۋ كودىن سايت، حابارلاما نەمەسە قوڭىراۋ ارقىلى سۇرامايدى؛
- قولدانبادان تىس جەردە كود ەنگىزۋ – 100% الاياقتىق؛
- بۇل جەكە دەرەكتەر مەن اقشا جوعالتۋ ءقاۋپىن ارتتىرادى.
- ماماندار پايدالانۋشىلاردى ساق بولۋعا جانە كۇماندى سىلتەمەلەرگە وتپەۋگە شاقىرادى.
