الاكولدىڭ شىعىس جاعالاۋى تۋريستەردى سانيتارلىق-ەپيدەميولوگيالىق تالاپتار مەن قاۋىپسىزدىك شارالارىن ساقتاي وتىرىپ قابىلداۋدا.
دەگەنمەن دەمالىس بويىنشا ەشقانداي شەكتەۋ جوق. بارلىق كولىك قاتىناسى تۇراقتى رەجيمگە كوشكەن. الدىن-الا بيلەت ساتىپ الۋ، دەمالىس ۇيلەرىن برونداۋ جۇرگىزىلۋدە.
بيىل دەمالۋشىلار مەن دەمالىس بازالارىنىڭ باسشىلارىنا ءبىرقاتار تالاپ قويىلىپ وتىر.
كولگە دەمالۋعا كەلەتىن ءاربىر وتباسى كوروناۆيرۋستىڭ تەرىس تەست ناتيجەسىن ۇسىنۋى قاجەت (پسر، ەكسپرەسس-تەست، ەحل). تەستى ءبىر وتباسىدان ءبىر ادام عانا تاپسىرادى. دەمالۋشىلار تەستى الدىن-الا تاپسىرىپ، بويىندا ۆيرۋس جوق ەكەنىن ايقىندايتىن قورىتىندى قاعازدى وزدەرىمەن بىرگە اكەلۋى قاجەت.
بۇدان بولەك كولدىڭ ىرگەسىندەگى قابانباي اۋىلىندا تۋريستەر اۋىرىپ قالعان جاعدايدا مەديسينالىق كومەك كورسەتەتىن 12 ورىندىق پروۆيزور اشىلعان.
تاۋلىك بويى قىزمەت كورسەتەتىن مەديسينالىق پۋنكت دارىگەرلەرى ەگەر دەمالۋشىلار وزدەرىن جايسىز سەزىنىپ، دەنە قىزۋى كوتەرىلسە قايتا تەستىلەۋدەن وتكىزىپ، مەديسينالىق كومەك كورسەتۋگە ءازىر.
سوڭعى جىلدارى الاكولدىڭ شىعىس بولىگى ايتارلىقتاي وزگەردى.
اسىرەسە جاعالاۋدى اباتتاندىرۋ جۇمىستارى قارقىندى تۇردە جۇرگىزىلۋدە. كول جاعالاۋىن اباتتاندىرۋعا 2016 جىلدان بەرى 6،2 ملرد تەڭگە قاراجات جۇمسالدى.
– الاكول ەلىمىزدىڭ ەڭ ءىرى دەمالىس ورنىنا اينالۋ كەرەك. تۋريستىك الەۋەتىن جوعارلاتۋ ماقساتىندا اۋقىمدى شارالاردى قولعا الدىق. ينۆەستورلار مەن جەكە كاسىپكەرلەر دە بۇل ىستەن تىس قالماۋدا. بيىل ىندەتتىڭ ورشۋىنە بايلانىستى دەمالۋشىلاردى بارلىق سانيتارلىق تالاپتاردى ساقتاۋعا شاقىرىپ، قاۋىپسىزدىك شارالارىن ۇيىمداستىرۋدامىز، - دەيدى وبلىس اكىمى دانيال احمەتوۆ.
بۇگىنگى تاڭدا كول جاعاسىندا 175 دەمالىس ءۇيى قىزمەت كورسەتۋدە، سۇرانىستىڭ ارتۋىنا بايلانىستى ولاردىڭ سانى دا جىل سايىن ارتىپ كەلەدى.
بيىل جالپى اۋماعى 2،5 شاقىرىمدى قۇرايتىن ۆەلوجول مەن 5 جاڭا ءمودۋلدى ساۋدا پاۆيلوندارىنىڭ قۇرىلىسى اياقتالدى
