Alakóldiń Shyǵys jaǵalaýy týristerdi sanitarlyq-epidemiologiialyq talaptar men qaýipsizdik sharalaryn saqtai otyryp qabyldaýda.
Degenmen demalys boiynsha eshqandai shekteý joq. Barlyq kólik qatynasy turaqty rejimge kóshken. Aldyn-ala bilet satyp alý, demalys úilerin brondaý júrgizilýde.
Biyl demalýshylar men demalys bazalarynyń basshylaryna birqatar talap qoiylyp otyr.
Kólge demalýǵa keletin árbir otbasy koronavirýstyń teris test nátijesin usynýy qajet (PTsR, ekspress-test, ehl). Testi bir otbasydan bir adam ǵana tapsyrady. Demalýshylar testi aldyn-ala tapsyryp, boiynda virýs joq ekenin aiqyndaityn qorytyndy qaǵazdy ózderimen birge ákelýi qajet.
Budan bólek kóldiń irgesindegi Qabanbai aýylynda týrister aýyryp qalǵan jaǵdaida meditsinalyq kómek kórsetetin 12 oryndyq provizor ashylǵan.
Táýlik boiy qyzmet kórsetetin meditsinalyq pýnkt dárigerleri eger demalýshylar ózderin jaisyz sezinip, dene qyzýy kóterilse qaita testileýden ótkizip, meditsinalyq kómek kórsetýge ázir.
Sońǵy jyldary Alakóldiń Shyǵys bóligi aitarlyqtai ózgerdi.
Ásirese jaǵalaýdy abattandyrý jumystary qarqyndy túrde júrgizilýde. Kól jaǵalaýyn abattandyrýǵa 2016 jyldan beri 6,2 mlrd teńge qarajat jumsaldy.
– Alakól elimizdiń eń iri demalys ornyna ainalý kerek. Týristik áleýetin joǵarlatý maqsatynda aýqymdy sharalardy qolǵa aldyq. Investorlar men jeke kásipkerler de bul isten tys qalmaýda. Biyl indettiń órshýine bailanysty demalýshylardy barlyq sanitarlyq talaptardy saqtaýǵa shaqyryp, qaýipsizdik sharalaryn uiymdastyrýdamyz, - deidi oblys ákimi Danial Ahmetov.
Búgingi tańda kól jaǵasynda 175 demalys úii qyzmet kórsetýde, suranystyń artýyna bailanysty olardyń sany da jyl saiyn artyp keledi.
Biyl jalpy aýmaǵy 2,5 shaqyrymdy quraityn velojol men 5 jańa modýldi saýda pavilondarynyń qurylysy aiaqtaldy
