الماتىدا ءال-فارابي داڭعىلىندا بولعان جول اپاتى بويىنشا قىلمىستىق ىستەر قوزعالدى، دەپ حابارلايدى Dalanews.kz.
ىشكى ىستەر ءمينيسترى ەرجان سادەنوۆتىڭ تاپسىرماسىمەن الماتى قالاسىندا بولعان جول اپاتى العاشقى ساتتەن باستاپ ەرەكشە باقىلاۋعا الىنعان. سونىمەن قاتار، ءقازىر ايتىلىپ جاتقان بارلىق ءۋاج تەكسەرىلىپ جاتىر.
"جول اپاتى بويىنشا بۇعان دەيىن قىلمىستىق ءىس قوزعالعان بولاتىن. ZEEKR كولىگىنىڭ جۇرگىزۋشىسىنە سوت سانكسياسىمەن قاماۋعا الۋ شاراسى قابىلداندى. جول اپاتى كەزىندە ول جەڭىل دارەجەدە ماساڭ كۇيدە بولعان. سونداي-اق، ءمينيستردىڭ تاپسىرماسى بويىنشا قىزمەتتىك تەكسەرىس باستالدى. الماتى قالاسىنا وزىندىك قاۋىپسىزدىك دەپارتامەنتىنىڭ، اكىمشىلىك پوليسيا كوميتەتىنىڭ جانە جەكە قۇراممەن جۇمىس دەپارتامەنتىنىڭ باسشىلارى تاجىريبەلى قىزمەتكەرلەرمەن بىرگە جىبەرىلدى. مەملەكەتتىك نومىرلەر زاڭسىز بەرىلۋى مۇمكىن دەگەن ۋاجدەر بويىنشا وزىندىك قاۋىپسىزدىك دەپارتامەنتى قىلمىستىق ءىس قوزعادى"، - دەپ جازىلعان حابارلامادا.
پوليسيا دەپارتامەنتى باسشىلارىنىڭ ءبىرىنىڭ جۇرگىزۋشىسىنە قاتىستى ارەكەتسىزدىك دەرەگى بويىنشا دا قىلمىستىق ءىس قوزعالعان. ول ۋاقىتشا ۇستاۋ يزولياتورىنا قامالعان.
"بارلىق ءمان-جاي، سونىڭ ىشىندە مەدياكەڭىستىكتە تارالىپ جاتقان اقپارات جان-جاقتى تەكسەرىلەدى. انىقتالعان كەمشىلىكتەرگە بايلانىستى كادرلىق شەشىمدەر قابىلداندى. ءمينيستردىڭ بۇيرىعىمەن الماتى قالاسى پوليسيا دەپارتامەنتى باستىعىنىڭ سىرتقى قىزمەتتەر مەن جول قاۋىپسىزدىگىن قاداعالايتىن ورىنباسارى، سونداي-اق، اكىمشىلىك پوليسيا جانە قوعامدىق قاۋىپسىزدىك باسقارمالارىنىڭ باسشىلارى قىزمەتىنەن بوساتىلدى. زاڭبۇزۋشىلىقتار راستالعان جاعدايدا وقيعا قاتىسۋشىلارى دا، لاۋازىمدى تۇلعالار دا جاۋاپقا تارتىلادى"، - دەدى دەپارتامەنت باستىعى - ءىىم رەسمي وكىلى شىڭعىس الەكەشيەۆ.
ەسكە سالايىق، قايعىلى وقيعا 21 ناۋرىزدا الماتىدا ءال-فارابي داڭعىلىندا بولدى. جول اپاتى سالدارىنان ءۇش ادام كوز جۇمدى.
