سىبايلاس جەمقورلىق ۇعىمى قوعامنىڭ قاي سالاسىن الساڭىز كەزدەسەدى. ەلىمىزدىڭ قۇقىق بۇزۋشىلار تۋرالى ستاتيستيكاعا جۇگىنسەك، سىبايلاس جەمقورلىق بويىنشا جاۋاپقا تارتىلعان ازاماتتاردىڭ دەنى جوعارى لاۋازىمدى تۇلعالار ەكەنىنە كوز جەتكىزۋگە بولادى. ياعني، مەملەكەت مۇددەسىنە جۇمسالاتىن قارجىنى ءوز پايداسىنا جاراتتى دەگەن مىسالدار كوپ كەزدەسەدى.
ءومىر كورسەتكەندەي، قىزمەت وكىلەتتىگىن، بيلىكتى اسىرا پايدالانۋ، پارا الۋ، پارا بەرۋ، پاراقورلىققا دەلدال بولۋ، جالعان قۇجاتتار جاساۋ، سەنىپ تاپسىرىلعان مۇلىكتى يەلەنىپ الۋ، ىسىراپ ەتۋ، جالعان جاۋاپ بەرۋ، جالعان ەسەپ شوتتار وسىنداي ولقىلىقتار سىبايلاس جەمقورلىقتىڭ بەلەڭ الۋىنا اكەلىپ سوعادى.
سىبايلاس جەمقورلىق الەۋمەتتىك – ەكونوميكالىق دامۋعا، وركەندەۋگە كەرى اسەر ەتەتىن، ەلدىڭ العا جىلجۋىنا، بولاشاعىنا ايتارلىقتاي ءقاۋىپ توندىرەتىن قۇبىلىس.
جەمقورلىقپەن پارمەندى كۇرەسۋ ءۇشىن حالىقتىڭ قۇقىقتىق ساۋاتسىزدىعىن جوياتىن، قۇقىقتى ءتۇسىندىرۋ جۇمىسىنىڭ دەڭگەيى مەن ساپاسىن ارتتىرۋ كەرەك. حالىق وزدەرىنىڭ قۇقىقتارىنا قايشى ىس-ارەكەت جاسالعان جاعدايدا نەندەي ارەكەت جاساۋ كەرەكتىگىن بىلگەنى ءجون. حالىققا تۇسىنىكتى تىلمەن ءتۇسىندىرۋ، ۇگىت-ناسيحات جۇمىستارى جاندانۋى شارت.
وسى ورايدا، اقتوبە وبلىسىندا زاعيپ وقىرماندارعا قىزمەت كورسەتىپ كەلە جاتقان ارناۋلى كىتاپحانا جىل سايىن سىبايلاس جەمقورلىققا قارسى جوسپاردى ءوز دەڭگەيىندە جۇرگىزىپ كەلەدى.
ءتۇرلى شارالار داۋىستاپ وقۋ، مەملەكەتتىك قىزمەت وكىلدەرىمەن كەزدەسۋ، كىتاپ كورمەسى، قالىڭ وقىرماندى قۇقىقتىق ساۋاتتىلىققا ۇيرەتەدى. كونستيتۋسيالىق ءتارتىپتى قورعاۋ، سىبايلاس جەمقورلىقپەن كۇرەس اياسىندا ءتيىمدى، ءبىرىڭعاي جالپى مەملەكەتتىك ساياسات جۇرگىزۋ، مەملەكەت پەن ازاماتتاردىڭ ءومىر ءسۇرۋىنىڭ بارلىق سالالارىندا سىبايلاس جەمقورلىق پەن ونىڭ كورىنىستەرى دەڭگەيىن تومەندەتۋ، قوعامنىڭ مەملەكەتكە جانە ونىڭ ينستيتۋتتارىنا سەنىمىن نىعايتۋ بۇگىنگى كۇندەگى باستى ماقسات بولىپ تابىلادى.
وسى ماقساتتاعى جۇمىستاردى جۇيەلى جۇرگىزۋگە تاعى ءبىر سەرپىن رەتىندە «قازاقستان رەسپۋبليكاسىندا قىلمىسقا جانە سىبايلاس جەمقورلىققا قارسى كۇرەستى كۇشەيتۋ جانە قۇقىق قورعاۋ قىزمەتىن ودان ءارى جەتىلدىرۋ جونىندەگى قوسىمشا شارالار تۋرالى» قازاقستان رەسپۋبليكاسى پرەزيدەنتىنىڭ جارلىعى قولدانىسقا ەنگىزىلگەن. بۇل جارلىق ەلىمىزدەگى قۇقىق قورعاۋ ورگاندارى قىزمەتتەرىن جەتىلدىرۋگە باعىتتالا وتىرىپ، سىبايلاس جەمقورلىققا قارسى ارەكەتتەرمەن ولاردىڭ پايدا بولۋىنىڭ الدىن-الۋدا جۇيەلى، ءارى تۇراقتى شارالار اتقارۋدى قامتاماسىز ەتەدى.
ارينە، سىبايلاس جەمقورلىق سىلىپ تاستايتىن سىرقاتتى جارا ەمەس، بۇل تامىرىن تەرەڭگە جايعان، ادامزاتتىڭ ويىن شىرماپ، تىنىس-تىرشىلىگىن تارىلتاتىن، ءسويتىپ ولاردىڭ تولىققاندى قىزمەت ەتۋىنە قاتەر توندىرەتىن ءقاۋىپتى كەسەل. ونى ەمدەمەس بۇرىن اۋرۋدىڭ پايدا بولۋ، دامۋ، تارالۋ جولدارىن ءبىلىپ، دەرتتىڭ قوزۋىنا قولايلى جاعداي تۋۋىنا جول بەرمەۋ كەرەك. ول ءۇشىن بۇل اۋرۋعا قوعام بولىپ قارسى تۇرۋىمىز قاجەت.
اقتوبە وبلىستىق زاعيپتار جانە ناشار كورەتىن ازاماتتاردىڭ ارناۋلى كىتاپحاناسى سىبايلاس جەمقورلىقپەن كۇرەسۋ جولىندا «اقتوبە – ادالدىق الاڭى» جوبالىق كەڭسەسىنىڭ ماماندارىمەن ءاردايىم بايلانىستا. ءسوزىمنىڭ دالەلى رەتىندە وبلىس كولەمىندە وتكەن «ارىڭدى تازا ۇستا» بايقاۋىندا كىتاپحانا قىزمەتكەرلەرى قازىرگى زامان بەينەسىن ەرتەگى كەيىپكەرلەرى ارقىلى جەتكىزدى.
ادىلدىك جۇرگەن جەردە جۇرەك تىنىش، قىزمەت ابىرويلى، بولاشاق جارقىن بولاتىنى اقيقات. اركىم مەملەكەتتىك قىزمەت جولىندا جۇرگەندە ارقاسىنداعى جۇك سالماعىن سەزىنگەنى دۇرىس. «نە الدىم، نە بەردىم» دەگەن سۇراققا وزىنەن جاۋاپ تاپقان قىزمەتكەر سىبايلاس جەمقورلىققا جول بەرمەيدى.
قۇندىز قونىسباي، اقتوبە وبلىستىق زاعيپتار جانە ناشار كورەتىن ازاماتتاردىڭ ارناۋلى كىتاپحاناسىنىڭ قىزمەتكەرى
