2025 جىلعى 7 تامىزدا «عىلىم ورداسى» رمك يران يسلام رەسپۋبليكاسىنىڭ الماتى قالاسىنداعى باس كونسۋلدىعى جانە مادەني وكىلدىگىمەن بىرلەسىپ، قازاقتىڭ ۇلى اقىنى اباي قۇنانباي ۇلىنىڭ 180 جىلدىق مەرەيتويىنا ارنالعان «ادەبيەت – دوستىق كوپىرى» اتتى كورمە ۇيىمداستىردى،- دەپ حابارلايدى Dalanews.kz
ءىس-شاراعا «عىلىم ورداسى» رمك باس ديرەكتورى ۇلار مۇقاجانوۆ، يران يسلام رەسپۋبليكاسىنىڭ الماتىداعى باس كونسۋلى سۋنا احمادي، يران مادەني وكىلدىگىنىڭ باسشىسى حوسسەين اعازادە، سونداي-اق يرانداعى قازاق دياسپوراسىنىڭ وكىلدەرى، زيالى قاۋىم مەن عالىمدار قاتىستى.
حالىقارالىق شارانىڭ باستى ماقساتى – اباي قۇنانباي ۇلىنىڭ رۋحاني-مادەني مۇراسىن دارىپتەپ، ونىڭ تەرەڭ مازمۇندى شىعارمالارى مەن ادامزاتتىق قۇندىلىقتارعا نەگىزدەلگەن يدەيالارىن حالىقارالىق دەڭگەيدە ناسيحاتتاۋ. سونىمەن قاتار، بۇل مادەني باستاما قازاق جانە يران حالىقتارى اراسىنداعى ادەبي بايلانىستى نىعايتىپ، ەكى ەل اراسىنداعى مادەني ىنتىماقتاستىقتى جاڭا دەڭگەيگە كوتەرۋگە باعىتتالعان.
«اباي قۇنانباي ۇلىنىڭ 180 جىلدىعى – ونىڭ رۋحاني جانە ادەبي مۇراسىن جاڭا قىرىنان تانىپ، زەردەلەۋگە مۇمكىندىك بەرەتىن ماڭىزدى كەزەڭ. اباي – قازاق جازبا ادەبيەتىنىڭ نەگىزىن قالاۋشى عانا ەمەس، ۇلتتىق وي-سانا مەن مادەنيەتتىڭ سيمۆولى. بۇگىندە اباي شىعارمالارى ادەبيەتتانۋمەن قاتار، فيلوسوفيا، تاريح، ءتىل ءبىلىمى جانە مادەنيەتتانۋ سالالارىندا كەڭىنەن زەرتتەلىپ كەلەدى. وسى ورايدا، عىلىم ورداسى ورتالىق عىلىمي كىتاپحاناسىنىڭ قورىندا ساقتالعان سيرەك باسىلىمدار مەن قولجازبالار – ۇلكەن عىلىمي ماڭىزعا يە. بۇل سيرەك باسىلىمدار ابايدىڭ ادەبي ءستيلىن، جازبا ءتىلىنىڭ دامۋىن جانە ەڭبەكتەرىنىڭ تارالۋ اياسىن جان-جاقتى زەرتتەۋگە مۇمكىندىك بەرەدى»، – دەپ اتاپ ءوتتى «عىلىم ورداسى» رمك باس ديرەكتورى ۇلار مۇقاجانوۆ.
سونىمەن قاتار، اباي مۇراسىن پارسى تىلىنە اۋدارعان بەلگىلى جازۋشى قاجى مۇحاممەد شادكامدى ەسكە الۋ كەشى ءوتتى. قاجى مۇحاممەد شادكام – پارسى ادەبي ءتىلىن جەتىك مەڭگەرگەن، ابايدىڭ ولەڭدەرى مەن ەڭبەكتەرىن پارسى تىلىنە اۋدارىپ، قازاق ادەبيەتىن يران جۇرتشىلىعىنا كەڭىنەن تانىتقان كورنەكتى تۇلعا. ونىڭ ەڭبەگى ەكى ەل اراسىنداعى مادەني ديالوگتى نىعايتقان ماڭىزدى اۋدارما رەتىندە جوعارى باعالانادى.
كەش بارىسىندا ۇلى اقىننىڭ ولەڭدەرى قازاق جانە پارسى تىلدەرىندە وقىلىپ، عىلىم ورداسىنىڭ سيرەك كىتاپتار قورىنداعى اباي شىعارمالارىنىڭ ءتۇرلى باسىلىمدارى، پارسى تىلىنە اۋدارمالارى، 500 بەتتىك «قازاقشا-پارسىشا» سوزدىك، سونداي-اق «اباي – رۋداكي» دوستىق كىلەمى مەن تەمىربەك جۇرگەنوۆ اتىنداعى قازاق ۇلتتىق ونەر اكادەمياسى ستۋدەنتتەرىنىڭ تۋىندىلارى كوپشىلىك نازارىنا ۇسىنىلدى. سونىمەن قاتار، ابايدىڭ 180 جىلدىعىنا ارنالعان مانەرلەپ وقۋ بايقاۋىنىڭ جەڭىمپازدارى ماراپاتتالىپ، ارنايى سىيلىقتار تابىستالدى.
شارا سوڭىندا تاراپتار قازاق-يران ادەبي بايلانىسىن نىعايتۋعا نيەت ءبىلدىرىپ، مۇنداي مادەني كەزدەسۋلەردىڭ ءجيى وتكىزىلۋىنىڭ ماڭىزدىلىعىن اتاپ ءوتتى.
