قازىرگى تاڭدا سەمەي قالاسىنىڭ ءارتۇرلى اۋدانىندا مەكتەپتەردىڭ قۇرىلىسى قارقىندى ءجۇرىپ جاتىر. ايتالىق، قاراعايلى شاعىن اۋدانىندا 1200 ورىندى، ۆودنىي كەنتىندە 600 ورىندى، اقسۋات اۋىلىندا 300 ورىندى، بەسقاراعاي اۋىلىندا 300 ورىندى، ال اياگوز قالاسىنىڭ «ەت كومبيناتى» شاعىن اۋدانىندا 600 ورىندى مەكتەپ قۇرىلىسى قارقىندى ءجۇرىپ جاتىر.
2025 جىلعا دەيىن ءبىلىم بەرۋ ينفراقۇرىلىمىن قولداۋ قورىنىڭ قاراجاتى ەسەبىنەن 6 شاعىن مەكتەپ، جانە جۇمىس ىستەپ تۇرعان مەكتەپتەرگە 6 قوسىمشا قۇرىلىس سالىنادى دەپ كۇتىلۋدە.
بۇدان باسقا بالالاردى قوسىمشا بىلىممەن جان-جاقتى قامتۋ ماقساتىندا كوپبەيىندى وقۋشىلار سارايىن سالۋدى جوسپارلانعان. بۇگىندە قۇرىلىس جوباسى ازىرلەنىپ، مەملەكەتتىك ساراپتاما قورىتىندىسى الىنعان. جوبانىڭ جالپى قۇنى 11،4 ملرد تەڭگەنى قۇرايدى.
پرەزيدەنت تاپسىرماسىنا سايكەس شاكارىم ۋنيۆەرسيتەتىندە «Shakarim High School» جانە ءا.بوكەيحان ۋنيۆەرسيتەتىندە «Abay IT-School» مەكتەپتەرى اشىلىپ، وبلىس جوعارى وقۋ ورىندارىنا قوسىمشا 500 ارناۋلى ءبىلىم گرانتى بولىنەدى.
سونىمەن قاتار، 2025 جىلعا قاراي اباي وبلىسىندا 65 العاشقى مەديسينالىق-سانيتارلىق كومەك كورسەتۋ نىسانىن سالۋ جوسپارلانعان. نىساندار «اۋىلدىق دەنساۋلىق ساقتاۋدى جاڭعىرتۋ» جوباسى اياسىندا جۇزەگە اسادى.
ءوڭىردى دامىتۋدىڭ كەشەندى جوسپارىنا سەمەي قالاسىنداعى قۇنى 100،4 ملرد تەڭگە بولاتىن بەس مەديسينالىق مەكەمە ەنگىزىلگەن. ونىڭ ىشىندە 400 ورىندىق كوپسالالى اۋرۋحانا، 300 ورىندىق كوپسالالى بالالار اۋرۋحاناسى، وبلىستىق قان ورتالىعى، سەمەي قالاسىنىڭ وڭ جانە سول جاعالاۋىنداعى ەمحانالار بار.
ايتا كەتسەك، 2023 جىلى اباي وبلىسىندا 235 شاقىرىم جەرگىلىكتى ماڭىزى بار جولعا ورتاشا جوندەۋ جۇمىستارى جۇرگىزىلىپ، وعان 9،9 ملرد تەڭگە بولىنگەن. «اۋىل – ەل بەسىگى» باعدارلاماسى اياسىندا جالپى ۇزىندىعى 77 شاقىرىمدى قۇرايتىن اۋىلىشىلىك جولداردى ورتاشا جوندەۋ جۇمىستارى جۇرگىزىلدى. جىل سوڭىنا دەيىن جولداردىڭ 90% ستاندارتتى جاعدايعا جەتىپ، 2025 جىلعا قاراي بۇل كورسەتكىشتى 97% جەتكىزۋ جوسپارلانعان.
