اباي وبلىسىنىڭ اكىمى بەرىك ءۋاليدىڭ توراعالىعىمەن وتكەن كەڭەيتىلگەن اپپاراتتىق كەڭەستە بالالاردىڭ جازعى دەمالىسىن ۇيىمداستىرۋ، سپورتتىق جانە شىعارماشىلىق ۇيىرمەلەرگە مەملەكەتتىك تاپسىرىس ورنالاستىرۋ، مەملەكەتتىك باسقارۋدا جوبالىق ءتاسىلدى ەنگىزۋ ماسەلەلەرى تالقىلاندى،– دەپ حابارلايدى Dalanews.kz
وڭىردەگى ساۋىقتىرۋ لاگەرلەرىنىڭ جاعدايى تۋرالى وبلىستىق ءبىلىم باسقارماسى باسشىسىنىڭ مىندەتىن اتقارۋشى باۋىرجان تولەنوۆ باياندادى.
بيىل جازعى ماۋسىمدا 94 مىڭنان استام وقۋشى ءتۇرلى ىس-شارالارمەن قامتىلماق. ونىڭ ىشىندە 15 مىڭنان استام بالا الەۋمەتتىك وسال ساناتقا جاتادى. ولار ءۇشىن تەگىن جولدامالار قاراستىرىلعان.
جالپى وبلىستا بالالاردىڭ جازعى دەمالىسىن ۇيىمداستىرۋ ءۇشىن 33 وڭىرلىك جوبانى ىسكە اسىرۋ جوسپارلانىپ وتىر. ايماقتاعى 11 ساۋىقتىرۋ لاگەرىنە 5172 بالانى دەمالىسقا جىبەرۋ كوزدەلگەن.
قازىرگى تاڭدا وڭىردە قالا سىرتىنداعى 11 بالالار لاگەرى جۇمىس ىستەيدى. ونىڭ 9-ى تيپتىك، 2-ەۋى بەيىمدەلگەن عيماراتتا ورنالاسقان. لاگەرلەردىڭ باسىم بولىگى 1952-1999 جىلدارى سالىنعاندىقتان ماتەريالدىق-تەحنيكالىق بازاسى جاڭارتۋدى تالاپ ەتەدى. اياگوز، اقسۋات، بەسقاراعاي، كوكپەكتى جانە جاڭاسەمەي اۋداندارىندا بالالار لاگەرىن سالۋ قاجەتتىگى تۋىنداپ وتىر.
مادەنيەت، تىلدەردى دامىتۋ جانە ارحيۆ ءىسى باسقارماسى باسشىسىنىڭ مىندەتىن اتقارۋشى جانجىگىت ومارحاننىڭ مالىمەتىنشە، وڭىردە 4728 بالانى قامتىعان 147 شىعارماشىلىق ۇيىرمە جۇمىس ىستەيدى. بۇدان بولەك وبلىستىڭ قالالارى مەن اۋداندارىنداعى مادەنيەت ۇيلەرى، كلۋبتار مەن كىتاپحانالار جانىندا 139 ءتۇرلى تەگىن ۇيىرمە ۇيىمداستىرىلعان.
اپپاراتتىق كەڭەستە دەنە شىنىقتىرۋ جانە سپورت باسقارماسىنىڭ باسشىسى ەرجان ءابىلقاسىموۆ ايماقتاعى بالالار مەن جاسوسپىرىمدەرگە ارنالعان تەگىن سپورتتىق سەكسيالاردىڭ جۇمىسى تۋرالى باياندادى.
وتىرىستا كۇنتارتىبىندەگى ءۇشىنشى ماسەلە مەملەكەتتىك باسقارۋداعى جوبالىق ءوفيستىڭ ۇلەسى تۋرالى جوبالىق وفيس باسشىسى كاماريا قاجىعالييەۆا باياندادى. بۇگىندە وبلىس كولەمىندە 40-تان استام جوبا ىسكە اسىرىلۋدا. بۇل جوبالار ينفراقۇرىلىم، اۋىل شارۋاشىلىعى، دەنساۋلىق ساقتاۋ جانە ەكولوگيا سالالارىن قامتيدى. ءاربىر جوبا SMART-قاعيداتتارىنا سايكەس ازىرلەنگەن.
جيىندى قورىتىندىلاعان ايماق باسشىسى اپپارات ينسپەكتورلارىنا بارلىق لاگەرلەردىڭ جازعى دەمالىسقا دايىندىعىنا تەكسەرۋ جۇرگىزۋدى، «دامۋ بالا» باعدارلاماسى اياسىنداعى ۇيىرمەلەردىڭ جاي-كۇيىنە مونيتورينگ جاساۋدى جۇكتەدى. وبلىس اكىمى مەملەكەتتىك شىعارماشىلىق تاپسىرىس اياسىندا جۇمىس ىستەيتىن ۇيىرمەلەردىڭ جەتكىلىكسىز ەكەنىن اتاپ ءوتىپ، مادەنيەت باسقارماسىنا بۇل باعىتتاعى جۇمىستى جانداندىرۋ قاجەتتىگىن ايتتى. قارجى باسقارماسىنا بالالاردىڭ ۇيىرمەلەرگە قاتىسۋ ءۇردىسىن تالداپ، ناتيجەسىن بايانداۋدى تاپسىردى.
«وقۋشىلاردىڭ جازعى كانيكۋلعا شىعۋىنا دا از ۋاقىت قالدى. ولاردىڭ دەمالىستارىن ءتيىمدى ءارى پايدالى وتكىزۋىنە جاعداي جاساۋىمىز كەرەك. وڭىردەگى ۇيىرمەلەر سانىن كوبەيتۋدىڭ ماڭىزى زور. جاقىندا «قازاقستان حالقىنا» قوعامدىق قورى باسشىلىعىمەن كەزدەسىپ، وبلىستىڭ 4 اۋدانىنداعى وقۋشىلار سارايىن تولىق جاڭعىرتۋ جونىندە كەلىسىمگە كەلدىك. بۇل باعىتتاعى جۇمىستى جالعاستىرامىز»،- دەدى ايماق باسشىسى.
