الەمدىك جانە ءداستۇرلى دىندەر ليدەرلەرىنىڭ VII سەزىندە ريم پاپاسى فرانسيسك قازاقتىڭ ۇلى اقىنى اباي قۇنانباي ۇلىنىڭ ءىلىمىن مىسال ەتتى، – دەپ حابارلايدى Dalanews.kz.

–  كەشە قازاقتىڭ ۇلتتىق اسپابى دومبىرا تۋرالى كوپ مالىمەت الدىم. بۇگىن بۇل مۋزىكالىق اسپاپتى وسى جەردىڭ ۇلى اقىنى، كومپوزيتورى – ابايدىڭ ۇنىمەن بايلانىستىرعىم كەلەدى. ول وزىنەن كەيىن ءدىندارلىقتى سىڭىرگەن تۋىندىلار قالدىردى. اباي ادامگەرشىلىكتىڭ باستاۋى – ماحاببات پەن ادىلدىك ەكەنىن ەسكە سالادى. قانداي جاعداي بولماسىن زورلىق-زومبىلىقتى اقتاۋعا بولمايدى. قۇداي بارشامىزدى سوعىسقا ەمەس، بەيبىتشىلىككە ۇندەيدى، – دەدى ريم پاپاسى.

سونداي-اق ول اباي ءبىلىم مەن تانىم كوكجيەگىن كەڭەيتۋگە شاقىرعانىن اتاپ ءوتتى.

– اباي ءبىلىم-عىلىمعا ۇمتىلىپ، وزگەلەردىڭ مادەنيەتى مەن ءداستۇرىن تانۋعا، تاريحى مەن ادەبيەتىن وقۋعا ۇندەدى، – دەدى ريم پاپاسى.

ايتا كەتەيىك، ەكى كۇنگە سوزىلاتىن سەزگە 50 ەلدەن 100-دەن استام دەلەگاسيا، ونىڭ ىشىندە يسلام، حريستيان، بۋدديزم، يۋدايزم، يندۋيزم، داوسيزم، زورواستريزم، سينتويزم دىندەرىنىڭ وكىلدەرى، سونداي-اق ساياساتكەرلەر مەن قوعام قايراتكەرلەرى، حالىقارالىق ۇيىم مۇشەلەرى كەلگەن.

ءدىني فورۋمعا ريم پاپاسى فرانسيسكتەن بولەك، ءال-ازحاردىڭ جوعارعى يمامى احمەد موحاممەد احمەد ات-تايەب، يەرۋساليم پاتريارحى III تەوفيل، اشكەنازدىڭ باس ءراۆۆينى داۆيد لاۋ، ءيزرايلدىڭ باس سەفارد ءراۆۆينى يسحاك يوسيف جانە باسقا دا ءدىني جەتەكشىلەر، ءبىرقاتار حالىقارالىق ۇيىم وكىلدەرى قاتىسۋدا.