سەرىك اباس-شاح[/caption]
كونەدەن كەلە جاتان ءداستۇرلى اندەرىمىزدى ەل اۋزىنان تىرنەكتەپ جيناپ، ۇرپاققا اماناتتاعان الەكساندر زاتايەۆيچ قازاق حالقىنىڭ ان-كۇيىنە ءتانتى بولعاندا ايتقان «قازاق دالاسى ءان سالىپ تۇرعانداي» دەگەن ءسوزى ءبارىمىزدىڭ كوكەيمىزدە سايراپ تۇر. عايىپتان تايىپ، مىڭبولعىر الەكساندر ۆيكتوروۆيچ ءبىر قۇدىرەتتىڭ كۇشىمەن قازىرگى زامانعا قايتا ورالسا، قازاق ەستراداسىنىڭ قۇلاق تۇندىراتىن ءانى مەن ءبيىن، تەلەارنالارداعى ءان شەرۋلەردى كورىپ تەڭەۋ تابا الماي قاتتى قينالار ما ەدى، قايتەر ەدى؟! ويتكەنى، ءقازىر كەڭ ساحارانىڭ ءاربىر ساي-سالاسى، جىرا-جىقپىلى، وي-شۇڭقىرى كۇندىز-تۇنى دامىل تاپپاي ءان سالىپ تۇر.
تەلەارنانى قوسساڭ، القىن-جۇلقىن بيلەپ، ءان ايتقان انشىگە تاپ بولاسىڭ. ءبىز مۇنداي كۇيگە قالاي تاپ بولدىق؟ سۇرەڭسىز ءومىرىمىزدىڭ ءوزى شوۋعا اينالىپ بارا جاتقانىن كورگەندە ەرىكسىز مۇڭاياسىڭ. ساراپتامالىق باعدارلامالاردىڭ اراسىندا ءان ايتىلعاننان كەيىن، نە دەۋگە بولادى. تاياۋدا «حابار» ارناسىندا «جۇلدىزدى ايتىس» دەگەن جوبا دۇركىرەپ ءوتتى. بىزدىڭشە، بۇل ايتىستى ناسيحاتتاۋ ەمەس، قورلاۋ بولدى. شوۋدىڭ سيقىرلى سازىنا ەلتىگەن تەليەۆيزيالىق پروديۋسسەرلەردىڭ ساۋىقشىل جۇرتتىڭ نازارىن وزدەرىنە اۋدارۋ ءۇشىن جاساعان كەزەكتى «ءادىسى» ەكەنىن تۇسىنەمىز. وعان قاتىسقان ارتىستەردى قويىڭىزشى، «جۇلدىزدى ايتىسقا» دومبىراسىن ارقالاپ كەلىپ، ءتامام جۇرتتىڭ كوزىنشە وزدەرىن وزدەرى ماسقارالاعان ايتىسكەر اقىندار ءۇشىن ۇيالدىق. ايتپاعىمىز بۇل ەمەس، ودان دا سوراقى دۇنيەلەردى كورىپ جۇرگەن كوز عوي، نەسىنە تاڭىرقايىق! كەزىندە «حابار» ارناسىنان وسىنداي تالاي جوبانىڭ تۇساۋىن كەسكەن سەرىك اباس-شاحتىڭ «فەيسبۋك» پاراقشاسىنا جازعان مىنا ءبىر پوستى ءبىزدى قاتتى تاڭقالدىردى. ەندى سول پوستى كەلتىرسەك.
«جۇلدىزدى ايتىس» يگى-جاقسىنى دا، قالىڭ جۇرتتى دا جىندى قىلدى.
«لاقپانى» لايىقسىز كورگەندەر رەنىشىن باسا الماي وتىر.
«لاققانداردىڭ» رايدان قايتار ءتۇرى جوق.
«جۇلدىزدار ايتىسادى» جوباسى ەفيردە «جىندىلار ايتىسادى» بولىپ شىقتى. قىلجاقپاستار مەن ءانشىباستار ارقىلى «ايتىس جارنامالاندى، جۇرت وعان نازار اۋدارا باستادى» دەپ اقتالىپ جاتقاندار بار. دۇرىس ءتاسىل ەكەن. وندا مەشىتتەردىڭ قابىرعالارىنا «كەشيۋ» توبىنداعى قىزداردىڭ قىسقا شورتيك كيگەن فوتوسىن ءىلىپ قويىڭدار. جۇما نامازدى نۇرلان ەسپانوۆ پەن نۇرلان ابدۋللينگە وقىتىڭدار. جانازا شىعارۋعا كۆن ويىنشىلارى بارسىن. اپتاسىنا ءبىر رەت (مەشىت ىشىندە) قايرات نۇرتاستىڭ كونسەرتىن ۇيىمداستىرىڭدار. شوۋدىڭ «كوكەسى» وسى. مۇسىلماندىقتى ناسيحاتتاۋدىڭ «كوكەسى» وسى. بۇدان كەيىن جاستاردىڭ ءبارى مەشىتتەن شىقپايتىن بولادى».
سەنبەي وتىرعان شىعارسىزدار، ءبىراق بۇل پوستتىڭ اۆتورى سەرىك اباس-شاح. سەكەڭنىڭ ءدال ءوزى. كەزىندە بۇكىل ءانشى، ءارتىستى «حابارعا» جيناپ، شوۋ جوبالاردىڭ تۇساۋىن كەسىپ، ءار حاباردى انمەن اسپەپتەپ، بيمەن كوركەمدەۋگە كۇش سالعان سەكەڭ. ونىڭ پاراقشاسىنداعى جازبا قازىرگى قازاق قوعامىنىڭ قانداي كۇيگە تۇسكەنىن ءدال ايقىنداپ بەرەدى. بۇدان اسىرىپ ايتۋ مۇمكىن دە ەمەس. وتاندىق تەلەارنالار سەكەڭ سالعان «سارا جولمەن» جۇرە بەرسە، ءبىراز جىلدا كۆن-ششيكتەردىڭ جانازادا «پريكول» ايتىپ، ەلدى جۇباتقان رەاليتەت شوۋىن دا كورىپ قالۋىمىز بەك مۇمكىن. سەكەڭ سىن ساداعىنا ءجيى الاتىن ءىنىسى نۇرلان ەسپانوۆ مەن نۇرلان ابدۋلين استانا مەن الماتىداعى ايدىك مەشىتتەردە ازان ايتۋى ءۇشىن ارى-بەرى ۇشىپ جۇرەتىن كۇنگە دە جەتەرمىز (ينشاللا). كىم ءبىلسىن؟ قازاق تەلەارناسىنداعى شوۋ-باعدارلامالاردىڭ نەگىزىن قالاعان مايتالمان مامان بىردەڭەنى بىلگەن سوڭ ايتىپ وتىرعانى انىق. قالاي دەسەك تە، بۇل كىسى شوشيتىن شىندىق. ەگەر الداعى ۋاقىتتا سەكەڭ بولجاعان كۇيگە تۇسسەك، ءبىزدىڭ بىتكەنىمىز.
سەكەڭ سىن ساداعىنا ءجيى الاتىن ءىنىسى نۇرلان ەسپانوۆ مەن نۇرلان ابدۋلين استانا مەن الماتىداعى ايدىك مەشىتتەردە ازان ايتۋى ءۇشىن ارى-بەرى ۇشىپ جۇرەتىن كۇنگە دە جەتەرمىز (ينشاللا). كىم ءبىلسىن؟
سەكەڭنىڭ كەزىندە «حاباردا» انشىلەر جۋرناليستەردىڭ ورنىن باسىپ، ءتۇرلى حابارلاردى جۇرگىزگەنىنە كۋا بولدىق. باعدارلامانى قويىڭىزشى، تىكەلەي ەفيردىڭ ءوزىن انشىلەرگە «سەنىپ» تاپسىردىق قوي. ناتيجەسى قانداي بولعانىن ءمادينا ءسادۋاقاسوۆانىڭ ازيادانى جۇرگىزگەن كەزىن ەسكە الساق جەتىپ جاتىر. ءقازىر ءانشى، ارتىستەر تەلەارناداعى جۋرناليستەردىڭ ورنىن تولىقتاي باسىپ العان. باعدارلاما بىتكەننىڭ ءبارى انشىلەرسىز وتپەيدى. بۇل از دەسەڭىز، سوڭعى ۋاقىتتارى انشى-ارتىستەر جۋرناليستيكا فاكۋلتەتىنىڭ ماگيستراتۋراسىنا ءتۇسىپ الىپ، شەتىنەن جۋرناليست اتانىپ جاتىر. ەرتەڭگى كۇنى ولاردىڭ ءبارى قولىندا قۇجاتى بار جۋرناليست بولادى. سول كەزدە انشىلەر مەشىتتەگى يمامداردىڭ ورىنىن تارتىپ الماسا دا، تەلەارنالاردى كاسىبي جۋرناليستەردەن تازارتاتىنى انىق. مۇنى ءبىرىنشى بولىپ سەكەڭنىڭ سەزۋى دە ورىندى. امال جوق، ءوز قولىڭدى ءوزىڭ كەسە المايسىڭ.
نۇرلان اۋباكىر
