«قاسيەتتى ۇلى دالا ۇنىنەن قۋات الىپ، ەپيكالىق حيسسا – داستاندارمەن، اسەم اندەرىمەن تىڭدارمان جۇرتىنا شۋاق بەرگەن، حالىق اراسىنان شىققان اسقان دارىن يەسى، اقىن، ءانشى ءارى سازگەر اسەت نايمانباي ۇلىنىڭ شىعارماشىلىعى ۇلتتىق مۋزىكا ونەرىندەگى قايتالانباس دارا قۇبىلىس. وسى كيەلى مۇرانى كەڭىنەن ناسيحاتتاپ، ۇرپاقتان – ۇرپاققا جەتكىزۋ، تالانتتى جاستاردى ونەردىڭ كاۋسار بۇلاعىنان ءنار العىزىپ، شەبەرلىگىن شىڭداۋعا ىقپال ەتۋ ماقساتىندا شقو اكىمشىلىگى (مادەنيەت، مۇراعاتتار جانە قۇجاتتاما باسقارماسى) ءداستۇرلى ورىنداۋشىلاردىڭ اسەت نايمانباي ۇلى اتىنداعى ءىىى - رەسپۋبليكالىق بايقاۋىن وتكىزەدى. بايقاۋدىڭ نەگىزگى مىندەتى: ۇلى ءانشى، سازگەردىڭ شىعارماشىلىعىن كەڭىنەن ناسيحاتتاۋ ۇلتتىق جانە الەمدىك مادەنيەت قۇندىلىقتارىنا تارالۋىنا ىقپال ەتۋ بولىپ تابىلادى.» دەلىنگەن باسقارما تاراتقان باسپا ءسوز حابارلاماسىندا.
ەستەرىڭىزگە سالا كەتسەك، بۇرىندارى وتكەن بۇل بايقاۋعا تەك قازاقستاننىڭ ءداستۇرلى ءان مەكتەبىنىڭ وكىلدەرى عانا ەمەس، كورشىلەس جاتقان شەت ەلدەردەن دە قاتىسۋشىلار كەلگەن. بايقاۋدىڭ گالا-كونسەرتى قازاقستان رەسپيبليكاسىنا اتى تانىمال ونەر جۇلدىزدارىنىڭ قاتىسۋىمەن وتەتىن. بيىلعى بايقاۋدىڭ ەرەكشەلىگىن شىلدە ايىنىڭ سوڭىندا بىلەتىن بولامىز. ال ازىرگە، اسەت نايمانبايەۆ اتىنداعى ءداستۇرلى ورىنداۋشىلار بايقاۋى قازاقستان رەسپۋبليكاسىنىڭ ەڭبەك سىڭىرگەن قايراتكەرى جارقىن شاكارىم جانە ونەر مايتالماندارىنىڭ قازىلىعىمەن وتەتىنى ءمالىم.
"قمد" اقپارات
