استانا-ششۋچينسك تاسجولىندا 95 كولىك پەن 20 ادام زارداپ شەككەن ءىرى جول اپاتىنا قاتىستى ىشكى ىستەر مينيسترلىگى 6 قىلمىستىق جانە 37 اكىمشىلىك ءىس قوزعالعانىن، سونداي-اق نەگىزگى تەرگەۋ قانداي باپ بويىنشا جۇرگىزىلىپ جاتقانىن مالىمدەدى، دەپ حابارلايدى Dalanews.kz Tengrinews.kz-كە سىلتەپ.
ىشكى ىستەر مينيسترلىگى جول-كولىك وقيعاسى بويىنشا قىلمىستىق كودەكستىڭ 353-بابىنىڭ 1-بولىگى "قولدانىستاعى كولىك قوزعالىسى ەرەجەلەرىن بۇزۋ" بويىنشا سوتقا دەيىنگى تەرگەۋ باستالعانىن حابارلادى.
"قىلمىستىق كودەكستىڭ 345-بابى 1-بولىگى بويىنشا "جول قوزعالىسى ەرەجەلەرىن جول قوزعالىسىنا قاتىسۋشىلاردىڭ بۇزۋى سالدارىنان ابايسىزدا ورتاشا اۋىرلىقتاعى دەنە جاراقاتىن كەلتىرۋ" بويىنشا 6 ءىس قوزعالدى. اكىمشىلىك زاڭناما اياسىندا اكىمشىلىك قۇقىقبۇزۋشىلىق تۋرالى كودەكستىڭ 610-بابى بويىنشا "كولىك قۇرالدارى جۇرگىزۋشىلەرىنىڭ جول قوزعالىسى ەرەجەلەرىن بۇزۋى، بۇل ادامداردىڭ دەنساۋلىعىنا زيان كەلتىرۋگە، كولىك قۇرالدارىنا نەمەسە باسقا مۇلىككە زاقىم كەلتىرۋگە اكەپ سوققان جاعدايلار" بويىنشا 37 اكىمشىلىك ءىس قوزعالدى"، - دەپ حابارلادى ءىىم.
ۆەدومستۆونىڭ مالىمەتىنشە، قازىرگى ۋاقىتتا جوعارىدا اتالعان قىلمىستىق ىستەر بويىنشا قاجەتتى تەرگەۋ ارەكەتتەرى جۇرگىزىلىپ جاتىر. ونىڭ قورىتىندىسى بويىنشا تۇپكىلىكتى پروسەسسۋالدىق شەشىمدەر قابىلدانادى.
قۇقىقبۇزۋشىلىققا جول بەرگەن تۇلعالاردى جانە ولاردىڭ تۇرعىلىقتى جەرى جايلى سۇراققا دەپارتامەنت جاۋاپ بەرگەن جوق. ىشكى ىستەر مينيسترلىگى دە قىلمىستىق-پروسەسسۋالدىق كودەكستىڭ 201-بابىن نەگىزگە الىپ، وقيعاعا كىنالى كۇدىكتىلەردىڭ ۇستالعان-ۇستالماعانى تۋرالى تۇسىنىك بەرۋدەن باس تارتتى.
ەسكە سالايىق، جاپپاي جول اپاتى 3 قاڭتاردا بولعان ەدى.
ساعات 07:20-دا اۋا رايىنىڭ ناشارلاۋىنا بايلانىستى رەسپۋبليكالىق ماڭىزى بار "استانا-پەتروپاۆل" اۆتوجولىنىڭ (18-232 شاقىرىم) ۋچاسكەسىندە بارلىق اۆتوكولىك تۇرلەرىنىڭ قوزعالىسىنا شەكتەۋ ەنگىزىلدى. اۋا رايى جاقسارعاننان كەيىن جانە جول تازارتىلعان سوڭ، ساعات 12:30-دا ششۋچينسك قالاسى باعىتىنا قوزعالىس پوليسيا دەپارتامەنتى قىزمەتكەرلەرى مەن "قازاۆتوجول" ارنايى تەحنيكامەن ۇيىمداستىرىلدى.
جۇرگىزۋشىلەردىڭ جىلدامدىق رەجيمى مەن ءقاۋىپسىز قاشىقتىقتى ساقتاماۋىنان ساعات 13:28-دە جولدىڭ 153-شاقىرىمىندا، جاناتالاپ اۋىلى ماڭىندا شامامەن 95 كولىك جاپپاي جول اپاتىنا تۇسكەن.
وقيعا ورنىندا پوليسيا قىزمەتكەرلەرى مەن "قازاۆتوجول" ماماندارى جۇمىس ىستەدى. ءبىر جولاق تازارتىلىپ، جارامدى كولىكتەر قوزعالىسىن جالعاستىرعان ەدى. وقيعا ورنىندا 22 بىرىككەن جول ماشيناسى جانە 2 تراكتور جۇمىلدىرىلعان بولاتىن.
