جەكە تۇلعالار كىرىستەرى مەن مۇلكىن مىندەتتى دەكلاراسيالاۋدان بوساتىلدى. بۇل تۋرالى ۇكىمەت وتىرىسىندا ايتىلدى، - دەپ حابارلايدى Dalanews.kz.
پرەمەر-مينيستر ولجاس بەكتەنوۆ قارجى ءمينيسترىنىڭ وسى ساناتتاعى جەكە تۇلعالاردىڭ 90%-ىن دەكلاراسيالاۋدان بوساتۋ تۋرالى ۇسىنىسىن قولدادى. پرەمەر-مينيستردىڭ توراعالىعىمەن وتكەن ۇكىمەت وتىرىسىندا جەكە تۇلعالاردىڭ كىرىستەرى مەن مۇلكىن جالپىعا بىردەي دەكلاراسيالاۋ ماسەلەسى قارالدى.
قارجى ءمينيسترى ءمادي تاكييەۆ بۇگىندە العاشقى ءۇش كەزەڭدە جالپىعا بىردەي دەكلاراسيالاۋ جۇيەسىنە 4،8 ملن ادام، ونىڭ ىشىندە مەملەكەتتىك قىزمەتشىلەر، كوممەرسيالىق ۇيىمدار، كۆازيمەملەكەتتىك سەكتور باسشىلارى مەن قۇرىلتايشىلارى جانە ولاردىڭ جۇبايلارى ەنگەنىن حابارلادى.
قالعان ساناتتاعى ازاماتتاردىڭ (جەكە قۇرىلىمدار قىزمەتكەرلەرى، زەينەتكەرلەر، ءۇي شارۋاسىنداعى ايەلدەر، ستۋدەنتتەر جانە باسقا دا تۇلعالار)، 8 ملن-عا جۋىق ادامنىڭ دەكلاراسيا تاپسىرۋ مىندەتتەرىنە قاتىستى قارجى ءمينيسترى دەرەكتەر بازاسىن سيفرلاندىرۋدى جانە قولما-قول اقشاسىز تولەمدەردى دامىتۋدى ەسكەرە وتىرىپ، بۇل ساناتتاعى ازاماتتاردى اكتيۆتەرى مەن مىندەتتەمەلەرى تۋرالى دەكلاراسيالار تاپسىرۋدان بوساتۋدى ۇسىندى.
بوساتۋ وسى ساناتتاعى جەكە تۇلعالاردىڭ 90%-دان استامىنا اسەر ەتەدى.
دەكلاراسيالاۋدى مىنا ساناتتاعى تۇلعالار ءۇشىن ساقتاۋ ۇسىنىلادى: ق ر تىسقارى جەرلەردە اكتيۆتەرى بار؛ ءبىر جىل ىشىندە قۇنى 20 مىڭ اەك (74 ملن تەڭگە) استام سوماعا ساتىپ الۋلار جاساعان؛ دەربەس سالىق سالىناتىن تابىس العان.
ايتا كەتەيىك، ازاماتتارعا ەرىكتى تۇردە دەكلاراسيالاۋ قۇقىعى بەرىلەدى.
پرەمەر-مينيستر ولجاس بەكتەنوۆ بۇل ۇسىنىستى قولداپ، قارجى، ۇلتتىق ەكونوميكا جانە ادىلەت مينيسترلىكتەرىنە ءۇش كۇن ىشىندە زاڭناماعا قاجەتتى تۇزەتۋلەر دايىنداۋدى جانە ولاردى پارلامەنتتىڭ قاراۋىنا ەنگىزۋدى تاپسىردى.
"ءقازىر دەكلاراسيانى 4 ملن-نان استام ادام تاپسىرادى. ولاردىڭ اراسىندا مەملەكەتتىك قىزمەتشىلەر، كۆازيمەملەكەتتىك سەكتور مەن بيزنەس وكىلدەرى بار. 2025 جىلى بارلىق قالعان ساناتتاعى ازاماتتار دەكلاراسيا تاپسىرادى دەپ جوسپارلانعان بولاتىن. بۇعان حالىق الاڭداۋشىلىق ءبىلدىردى، سوندىقتان بۇل ماسەلەگە مەملەكەت باسشىسى ءوزىنىڭ نازارىن اۋداردى. بۇگىنگى تاڭدا مەملەكەتتىك ورگانداردىڭ دەرەكتەر بازاسى بارىنشا سيفرلاندىرىلعان. قارجىلىق جانە ۆاليۋتالىق باقىلاۋ كۇشەيتىلدى. حالىقارالىق كەلىسىمدەر شەڭبەرىندە شوتتار بويىنشا دەرەكتەر الماسۋ جولعا قويىلدى. سيفرلىق قىزمەتتەر كەڭ تارالعان. سوندىقتان جالپى العاندا، جەكە تۇلعالاردىڭ اكتيۆتەرى بويىنشا بارلىق اقپارات بار. قارجى، سيفرلىق دامۋ، يننوۆاسيالار جانە اەروعارىش ونەركاسىبى مينيسترلىكتەرى تىركەۋ جانە سالىقتىق باقىلاۋ ءۇشىن بارلىق سيفرلىق بازالاردان، ونىڭ ىشىندە ەكىنشى دەڭگەيلى بانكتەردەن مالىمەتتەر الۋدى قامتاماسىز ەتكەنى ءجون. سوندىقتان مەن 2025 جىلى ازاماتتاردىڭ قالعان ساناتتارىن اكتيۆتەر تۋرالى دەكلاراسيالاردى مىندەتتى تۇردە تاپسىرۋدان بوساتۋ تۋرالى قارجى ءمينيسترىنىڭ ۇسىنىسىن قولدايمىن"، - دەپ اتاپ ءوتتى پرەمەر-مينيستر.
ايتا كەتەيىك، بۇعان دەيىن قازاقستاندا جالپىعا بىردەي دەكلاراسيالاۋدىڭ III جانە IV كەزەڭدەرىنىڭ كۇشىن جويۋ تۋرالى پەتيسيا جاريالاندى. وندا تابىسىنىڭ جارتىسىنان كوبى تەك ىشەر اسىنا كەتەتىن قارا حالىقتى بوس اۋرەگە سالماي، دەكلاراسيالاۋدان بوساتۋ سۇرالادى.
"سوندىقتان حالىقتى جاپپاي دەكلاراسيالاۋعا تارتۋعا نەگىز جوق. تاپقان تابىسىنىڭ جارتىسىنان كوبىن تاماققا جۇمسايتىن، ونىڭ ۇستىنە نەسيەگە ابدەن بەلشەسىنەن باتقان قارا حالىقتى دەكلاراسيالاۋدىڭ نە كەرەگى بار... جالپى دەكلاراسيالاۋ تالابى ەنگىزىلگەن قولدانىستاعى سالىق زاڭناماسىندا، كەرىسىنشە، قوعامعا تۇك پايداسى جوق سالىق مىندەتتەمەلەرىن تەرىس پايدالانۋعا مۇمكىندىك بەرىپ قانا قويماي، سونىمەن قاتار، ءتىپتى سالىقتىق جەڭىلدىكتەردى دە قامتيتىن نورمالار بار"، - دەپ جازىلعان پەتيسيادا.
جۋىردا مەملەكەت باسشىسى قاسىم-جومارت توقايەۆ تا دەكلاراسيالاۋدىڭ ءتورتىنشى كەزەڭى ماسەلەسىنە توقتالدى.
"بۇل تالاپ 2021 جىلدان بەرى بىرتىندەپ ەنگىزىلىپ جاتىر. العاشقى ءۇش كەزەڭدە 4 ميلليوننان استام ادام دەكلاراسيا تاپسىردى. ولاردىڭ قاتارىندا مەملەكەتتىك قىزمەتشىلەر، كۆازيمەملەكەتتىك سەكتورداعى باسشىلار، كاسىپكەرلەر جانە وسى ساناتقا كىرەتىن ازاماتتاردىڭ جۇبايلارى بار. كەلەسى جىلى تاعى 8 ميلليونعا جۋىق ادام دەكلاراسيا تاپسىرادى دەپ جوسپارلانىپ وتىر. الايدا ءبىر ماسەلەنى ەسكەرۋ قاجەت.
جاپپاي دەكلاراسيا تاپسىرۋ تۇجىرىمداماسى وسىدان 14 جىل بۇرىن قابىلدانعان. سودان بەرى ەلىمىزدە سيفرلاندىرۋ ءىسى جانە فينتەح سالاسى قارقىندى دامىپ كەلە جاتىر. ءتۇرلى مەملەكەتتىك مەكەمەلەرگە ورتاق مالىمەتتەر بازاسى پايدا بولدى. قارجى جانە سالىق باقىلاۋى كۇشەيدى. دەمەك وسىنداي اۋقىمدى وزگەرىستەردەن كەيىن ءتورتىنشى، ياعني، سوڭعى كەزەڭدە ازاماتتاردى دەكلاراسيا تاپسىرۋعا مىندەتتەۋ قانشالىقتى ورىندى دەگەن سۇراق تۋادى. ۇكىمەت بۇل ماسەلەنى جان-جاقتى پىسىقتاۋى قاجەت"، - دەدى توقايەۆ.
