Jeke tulǵalar kiristeri men múlkin mindetti deklaratsiialaýdan bosatyldy. Bul týraly Úkimet otyrysynda aityldy, - dep habarlaidy Dalanews.kz.
Premer-ministr Oljas Bektenov qarjy ministriniń osy sanattaǵy jeke tulǵalardyń 90%-yn deklaratsiialaýdan bosatý týraly usynysyn qoldady. Premer-ministrdiń tóraǵalyǵymen ótken Úkimet otyrysynda jeke tulǵalardyń kiristeri men múlkin jalpyǵa birdei deklaratsiialaý máselesi qaraldy.
Qarjy ministri Mádi Takiev búginde alǵashqy úsh kezeńde jalpyǵa birdei deklaratsiialaý júiesine 4,8 mln adam, onyń ishinde memlekettik qyzmetshiler, kommertsiialyq uiymdar, kvazimemlekettik sektor basshylary men quryltaishylary jáne olardyń jubailary engenin habarlady.
Qalǵan sanattaǵy azamattardyń (jeke qurylymdar qyzmetkerleri, zeinetkerler, úi sharýasyndaǵy áielder, stýdentter jáne basqa da tulǵalar), 8 mln-ǵa jýyq adamnyń deklaratsiia tapsyrý mindetterine qatysty Qarjy ministri derekter bazasyn tsifrlandyrýdy jáne qolma-qol aqshasyz tólemderdi damytýdy eskere otyryp, bul sanattaǵy azamattardy aktivteri men mindettemeleri týraly deklaratsiialar tapsyrýdan bosatýdy usyndy.
Bosatý osy sanattaǵy jeke tulǵalardyń 90%-dan astamyna áser etedi.
Deklaratsiialaýdy myna sanattaǵy tulǵalar úshin saqtaý usynylady: QR tysqary jerlerde aktivteri bar; bir jyl ishinde quny 20 myń AEK (74 mln teńge) astam somaǵa satyp alýlar jasaǵan; derbes salyq salynatyn tabys alǵan.
Aita keteiik, azamattarǵa erikti túrde deklaratsiialaý quqyǵy beriledi.
Premer-ministr Oljas Bektenov bul usynysty qoldap, Qarjy, Ulttyq ekonomika jáne Ádilet ministrlikterine úsh kún ishinde zańnamaǵa qajetti túzetýler daiyndaýdy jáne olardy Parlamenttiń qaraýyna engizýdi tapsyrdy.
"Qazir deklaratsiiany 4 mln-nan astam adam tapsyrady. Olardyń arasynda memlekettik qyzmetshiler, kvazimemlekettik sektor men biznes ókilderi bar. 2025 jyly barlyq qalǵan sanattaǵy azamattar deklaratsiia tapsyrady dep josparlanǵan bolatyn. Buǵan halyq alańdaýshylyq bildirdi, sondyqtan bul máselege Memleket basshysy óziniń nazaryn aýdardy. Búgingi tańda memlekettik organdardyń derekter bazasy barynsha tsifrlandyrylǵan. Qarjylyq jáne valiýtalyq baqylaý kúsheitildi. Halyqaralyq kelisimder sheńberinde shottar boiynsha derekter almasý jolǵa qoiyldy. Tsifrlyq qyzmetter keń taralǵan. Sondyqtan jalpy alǵanda, jeke tulǵalardyń aktivteri boiynsha barlyq aqparat bar. Qarjy, Tsifrlyq damý, innovatsiialar jáne aeroǵarysh ónerkásibi ministrlikteri tirkeý jáne salyqtyq baqylaý úshin barlyq tsifrlyq bazalardan, onyń ishinde ekinshi deńgeili bankterden málimetter alýdy qamtamasyz etkeni jón. Sondyqtan men 2025 jyly azamattardyń qalǵan sanattaryn aktivter týraly deklaratsiialardy mindetti túrde tapsyrýdan bosatý týraly qarjy ministriniń usynysyn qoldaimyn", - dep atap ótti Premer-ministr.
Aita keteiik, buǵan deiin Qazaqstanda jalpyǵa birdei deklaratsiialaýdyń III jáne IV kezeńderiniń kúshin joiý týraly petitsiia jariialandy. Onda tabysynyń jartysynan kóbi tek isher asyna ketetin qara halyqty bos áýrege salmai, deklaratsiialaýdan bosatý suralady.
"Sondyqtan halyqty jappai deklaratsiialaýǵa tartýǵa negiz joq. Tapqan tabysynyń jartysynan kóbin tamaqqa jumsaityn, onyń ústine nesiege ábden belshesinen batqan qara halyqty deklaratsiialaýdyń ne keregi bar... Jalpy deklaratsiialaý talaby engizilgen qoldanystaǵy salyq zańnamasynda, kerisinshe, qoǵamǵa túk paidasy joq salyq mindettemelerin teris paidalanýǵa múmkindik berip qana qoimai, sonymen qatar, tipti salyqtyq jeńildikterdi de qamtityn normalar bar", - dep jazylǵan petitsiiada.
Jýyrda Memleket basshysy Qasym-Jomart Toqaev ta deklaratsiialaýdyń tórtinshi kezeńi máselesine toqtaldy.
"Bul talap 2021 jyldan beri birtindep engizilip jatyr. Alǵashqy úsh kezeńde 4 millionnan astam adam deklaratsiia tapsyrdy. Olardyń qatarynda memlekettik qyzmetshiler, kvazimemlekettik sektordaǵy basshylar, kásipkerler jáne osy sanatqa kiretin azamattardyń jubailary bar. Kelesi jyly taǵy 8 millionǵa jýyq adam deklaratsiia tapsyrady dep josparlanyp otyr. Alaida bir máseleni eskerý qajet.
Jappai deklaratsiia tapsyrý tujyrymdamasy osydan 14 jyl buryn qabyldanǵan. Sodan beri elimizde tsifrlandyrý isi jáne finteh salasy qarqyndy damyp kele jatyr. Túrli memlekettik mekemelerge ortaq málimetter bazasy paida boldy. Qarjy jáne salyq baqylaýy kúsheidi. Demek osyndai aýqymdy ózgeristerden keiin tórtinshi, iaǵni, sońǵy kezeńde azamattardy deklaratsiia tapsyrýǵa mindetteý qanshalyqty oryndy degen suraq týady. Úkimet bul máseleni jan-jaqty pysyqtaýy qajet", - dedi Toqaev.
