ەڭبەك جانە حالىقتى الەۋمەتتىك قورعاۋ مينيسترلىگى وڭتۇستىك قازاقستان وبلىسىنا بارىپ، جاڭا الەۋمەتتىك باعدارلامانىڭ جۇمىسى جايىندا ءتۇسىندىردى. ولار بۇل ايماقتا 400 مىڭنان استام تۇرعىن تەگىن مەديسينالىق كومەكتەن ايىرىلۋى مۇمكىن ەكەنىن ايتادى. جەرگىلىكتى بيلىك مۇنداي ءقاۋىپتىڭ بارىن مويىندايدى.
ەڭبەك جانە حالىقتى الەۋمەتتىك قورعاۋ مينيسترلىگىنىڭ وكىلدەرى 28 شىلدەدەن 2 تامىز ارالىعىندا قازىعۇرت، سارىاعاش، ماقتاارال، ورداباسى اۋداندارى مەن شىمكەنت جانە تۇركىستان قالالارىندا بولىپ، جەرگىلىكتى تۇرعىندارعا 2018 جىلدان بەرى ەنگىزىلەتىن مىندەتتى مەديسينالىق ساقتاندىرۋ باعدارلاماسىمەن تانىستىردى. سونىمەن بىرگە ەلدە جەكە كاسىپتى جاپپاي دامىتۋ جونىندە دە كەڭەس بەردى.
ساپاردىڭ قورىتىندىسى بويىنشا ەڭبەك ۆيسە-مينيسترى ءبىرجان بيدايبەردى ۇلى وڭتۇستىك قازاقستان وبلىسى بويىنشا 423 مىڭ 410 تۇرعىننىڭ ءالى كۇنگە دەيىن مارتەبەسى انىقتالماعانىن ايتادى.
"ەگەر ولاردىڭ 33 مىڭى جۇمىسسىز بولسا، قالعاندارى وزدەرىن جۇمىسپەن قامتاماسىز ەتۋشىلەر،" – دەدى ول.
ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ەگەر اتالعان ازاماتتاردىڭ مارتەبەسى انىقتالماسا، ولار تەگىن مەديسينالىق كومەكتەن ايىرىلۋى مۇمكىن دەيدى.
