Eńbek jáne halyqty áleýmettik qorǵaý ministrligi Ońtústik Qazaqstan oblysyna baryp, jańa áleýmettik baǵdarlamanyń jumysy jaiynda túsindirdi. Olar bul aimaqta 400 myńnan astam turǵyn tegin meditsinalyq kómekten aiyrylýy múmkin ekenin aitady. Jergilikti bilik mundai qaýiptiń baryn moiyndaidy.
Eńbek jáne halyqty áleýmettik qorǵaý ministrliginiń ókilderi 28 shildeden 2 tamyz aralyǵynda Qazyǵurt, Saryaǵash, Maqtaaral, Ordabasy aýdandary men Shymkent jáne Túrkistan qalalarynda bolyp, jergilikti turǵyndarǵa 2018 jyldan beri engiziletin mindetti meditsinalyq saqtandyrý baǵdarlamasymen tanystyrdy. Sonymen birge elde jeke kásipti jappai damytý jóninde de keńes berdi.
Sapardyń qorytyndysy boiynsha eńbek vitse-ministri Birjan Bidaiberdiuly Ońtústik Qazaqstan oblysy boiynsha 423 myń 410 turǵynnyń áli kúnge deiin mártebesi anyqtalmaǵanyn aitady.
"Eger olardyń 33 myńy jumyssyz bolsa, qalǵandary ózderin jumyspen qamtamasyz etýshiler," – dedi ol.
Eńbek jáne halyqty áleýmettik qorǵaý ministri Tamara Dúisenova eger atalǵan azamattardyń mártebesi anyqtalmasa, olar tegin meditsinalyq kómekten aiyrylýy múmkin deidi.
