جەتىسۋ وبلىسىنا قاراستى اقسۋ اۋدانىندا اعىمداعى جىلدىڭ ءساۋىر ايىندا 10 ادامنىڭ بيزنەس جوسپارى مەملەكەتتەن قولداۋ تاپقان. ناتيجەسىندە ۋادەلى گارنتقا يە بولدى. كوزدەرىندە جالىن وتى ويناعان، قولدارىنان ءىس كەلەر 3 بىردەي جاس الگىندە ايتقان قايتارىمسىز گارنت ارقىلى ءوز ىستەرىن باستاعان.
ءبىرى جانسۇگىروۆ اۋىلىندا جىلقى باپتايمىن دەسە، ەكىنشىسى – قىزىلاعاشتا قۇرىلىسقا قاجەتتى ماتەريالداردى ءوندىرىپ شىعارماققا نيەت ەتكەن. ءۇشىنشىسى – ساعاكۇرەس اۋىلىندا اس اتاسى – نان شىعاۋرمەن اينالىسۋعا بەل بۋعان. ءبىزدىڭ بۇگىنگى كەيىپكەر – 25 جاسار ناۋبايحاناشى.
اقسۋ اۋدانىنىڭ تۋماسى ايدوس جۇمانوۆ جاسىنا قاراماستان وڭىردەگى جالعىز ناۋبايحانانىڭ تاسىن ورگە دومالاتىپ وتىرعان ازامات.
وتكەن جىلى مامىر ايىندا «باستاۋ بيزنەس» كاسىپكەرلىك نەگىزدەرى وقۋىن ءبىتىرىپ، سەرتيفيكاتىن الدى. زاڭ اياسىندا ەكى اپتالىق كۋرستان وتكەن جاس جىگىت، 2022 جىلى ءساۋىر ايىندا 1 225 200 تەڭگە كولەمىندە گرانت الدى.
قولعا تيگەن قاراجاتتىڭ كولەمىنە قاراي، وبلىس ورتالىعىنان ناۋبايحانا سەحىنا كەرەك زاتتارىن الىپ، ءوز ءىسىن اشتى.
ساۋدانىڭ تەگىن، كاسىپتىڭ ەبىن بىلگەن ايدوس جانارىس ۇلى ءوزى تۇراتىن ساعاكۇرەس اۋىلىندا نان ونىمدەرىن شىعارىپ اۋىل تۇرعىندارىن اس اتاسىمەن قامتاماسىز ەتىپ وتىر. كاسىپتەن ءناسىبىن تاپقان جان وتباسىندا اسىراپ جۇرگەن جايى بار.
– وتكەن جىلى گرانت الۋ ءۇشىن ەكى اپتا ونلاين وقۋىن وقىدىم. بۇيىرتىپ گرانتقا قول جەتكىزدىم. بەرىلگەن اقشادان شاشاۋ شىعارماي، پەشتەرمەن نان يلەيتىن قۇرىلعىنى الدىم. بۇل – ناۋبايحانا اۋىلىمىزدا جالعىز. بۇگىندە اۋىلداعى 7 دۇكەننىڭ 5-ەۋىنە تۇراقتى تۇردە نان ونىمدەرىن وتكىزەمىن، – دەيدى جاس كاسىپكەر.
ايدوس تاۋلىگىنە 200-300 دانا نان ءونىمىن دۇكەن سورەلەرىنە جونەلتەدى. ءوزىنىڭ ايتۋىنشا، كەلىپ تۇسەر تاپسىرىس سانى ءار كۇنى ءار قالاي. دەگەنمەن ءدال وسى ساتتە ايى وڭىنان تۋىپ-اق تۇر. مەملەكەتتىك باعدارلامانىڭ يگىلىگىن كورگەن ايدوس تەك كاسىبىن اشىپ قويماي ەكى ادامدى جۇمسىپەن قامتىپ وتىر. الداعى ۋاقىتتا سەحتى كەڭەيتىپ، بۇل ءىسىن وتباسىلىق كاسىپكە اينالدىرماقشى.
