Jetisý oblysyna qarasty Aqsý aýdanynda aǵymdaǵy jyldyń sáýir aiynda 10 adamnyń biznes jospary memleketten qoldaý tapqan. Nátijesinde ýádeli garntqa ie boldy. Kózderinde jalyn oty oinaǵan, qoldarynan is keler 3 birdei jas álginde aitqan qaitarymsyz garnt arqyly óz isterin bastaǵan.
Biri Jansúgirov aýylynda jylqy baptaimyn dese, ekinshisi – Qyzylaǵashta qurylysqa qajetti materialdardy óndirip shyǵarmaqqa niet etken. Úshinshisi – Saǵakúres aýylynda as atasy – nan shyǵaýrmen ainalysýǵa bel býǵan. Bizdiń búgingi keiipker – 25 jasar naýbaihanashy.
Aqsý aýdanynyń týmasy Aidos Jumanov jasyna qaramastan óńirdegi jalǵyz naýbaihananyń tasyn órge domalatyp otyrǵan azamat.
Ótken jyly mamyr aiynda «Bastaý Biznes» kásipkerlik negizderi oqýyn bitirip, sertifikatyn aldy. Zań aiasynda eki aptalyq kýrstan ótken jas jigit, 2022 jyly sáýir aiynda 1 225 200 teńge kóleminde grant aldy.
Saýdanyń tegin, kásiptiń ebin bilgen Aidos Janarysuly ózi turatyn Saǵakúres aýylynda nan ónimderin shyǵaryp aýyl turǵyndaryn as atasymen qamtamasyz etip otyr. Kásipten násibin tapqan jan otbasynda asyrap júrgen jaiy bar.
– Ótken jyly grant alý úshin eki apta onlain oqýyn oqydym. Buiyrtyp grantqa qol jetkizdim. Berilgen aqshadan shashaý shyǵarmai, peshtermen nan ileitin qurylǵyny aldym. Bul – naýbaihana aýylymyzda jalǵyz. Búginde aýyldaǵy 7 dúkenniń 5-eýine turaqty túrde nan ónimderin ótkizemin, – deidi jas kásipker.
Aidos táýligine 200-300 dana nan ónimin dúken sórelerine jóneltedi. Óziniń aitýynsha, kelip túser tapsyrys sany ár kúni ár qalai. Degenmen dál osy sátte aiy ońynan týyp-aq tur. Memlekettik baǵdarlamanyń igiligin kórgen Aidos tek kásibin ashyp qoimai eki adamdy jumsypen qamtyp otyr. Aldaǵy ýaqytta tsehty keńeitip, bul isin otbasylyq kásipke ainaldyrmaqshy.
