استانا قالاسىندا حالىقارالىق ۆولونتەرلەر جىلىنا دايىندىق بويىنشا  ۇلتتىق ۇيىمداستىرۋ كوميتەتىنىڭ العاشقى وتىرىسى ءوتتى. بۇل باستاما — قازاقستان پرەزيدەنتى قاسىم-جومارت توقايەۆتىڭ ۇسىنىسىمەن بۇۇ باس اسسامبلەياسى بەكىتكەن تاريحي شەشىمنىڭ جالعاسى. 2026 جىل  — تۇراقتى  دامۋ ماقساتتارىنداعى حالىقارالىق ۆولونتەرلەر جىلى رەتىندە الەمدىك دەڭگەيدە اتالىپ وتپەك. ستاتيستيكاعا سۇيەنسەك، ەلىمىزدە 275 مىڭنان استام بەلسەندى ۆولونتەر، 755 ۆولونتەرلىك ۇيىم جانە 2 مىڭ باستاماشىل توپ جۇمىس ىستەيدى. Qazvolonteer.kz ونلاين پلاتفورماسىندا 67 مىڭنان استام ەرىكتى تىركەلگەن. ۆولونتەرلىك قىزمەتتى دامىتۋ ماقساتىندا 2024–2026 جىلدارعا ارنالعان ارنايى جول كارتاسى قابىلدانعان. 2024 جىلى مەملەكەتتىك ورگاندار ۆولونتەرلەرمەن بىرلەسىپ 55 جوبانى ىسكە اسىرىپ، 240 شاعىن گرانت ءبولدى. ناتيجەسىندە 42 مىڭعا جۋىق ءىس-شارا وتكىزىلدى، 10 مىڭ ۆولونتەر سالالىق باعىتتار بويىنشا وقۋدان ءوتتى. وسى ورايدا قوعام بەلسەندىسى، الماتى قالاسى جەتىسۋ كوميۋنيتي ورتالىعىنىڭ جەتەكشىسى اكەجان كەڭەسوۆ جانە ەرىكتى جانەل احمەتقىزىمەن ۆولونتەرلىكتىڭ قازىرگى جاي-كۇيى، بولاشاعى جانە حالىقارالىق ەرىكتىلەر جىلىنا دايىندىق تۋرالى سۇحباتتاسقان ەدىك.

— قازاقستانداعى قازىرگى ۆولونتەرلىك قىزمەتتىڭ دامۋ دەڭگەيىن قالاي باعالار ەدىڭىز؟

اكەجان كەڭەسوۆ: قازاقستانداعى ۆولونتەرلىك قوزعالىس سوڭعى ونجىلدىقتا ءبىرشاما جۇيەلەنىپ، ساپالىق تۇرعىدان دامىپ كەلەدى. مەملەكەت باسشىسى قاسىم-جومارت كەمەل ۇلى توقايەۆ «ەرىكتىلەر – وزگەنىڭ ماسەلەسىن ءوز ىسىندەي كورەتىن جۇرەگى كەڭ، نيەتى دۇرىس جاندار» دەگەن بولاتىن. اسىرەسە 2020 جىل – ۆولونتەر جىلى دەپ جاريالانعاننان كەيىن بۇل سالاعا ناقتى مەملەكەتتىك نازار اۋدارىلدى. ۆولونتەرلىك ۇيىمدار سانى ارتتى، جوبالار كوبەيدى، قۇقىقتىق جانە جاستار ورتالىقتارى جۇيەلەنىپ، ينفراقۇرىلىمدىق نەگىز كۇشەيتىلدى.

جانەل احمەت قىزى: قازاقستانداعى ۆولونتەرلىك قىزمەتتىڭ دەڭگەيى سوڭعى جىلدارى ايتارلىقتاي ارتتى. اسىرەسە، ەلىمىزدە ماڭىزدى ءىس-شارالار وتكەن كەزدە ونىڭ بەلسەندىلىگى ايقىن بايقالادى. جاستاردىڭ ۆولونتەرلىككە دەگەن قىزىعۋشىلىعى مەن بەلسەندىلىگى قۋانتادى. ولار تەك كومەك كورسەتىپ قانا قويماي، قوعامدا ءوز ورنىن تاۋىپ، جاڭا تاجىريبە جيناپ، جاڭاشا ورتادا دامىپ جاتىر. بۇل – قازاقستانداعى ۆولونتەرلىك مادەنيەتتىڭ جوعارى دەڭگەيدە قالىپتاسىپ كەلە جاتقانىن كورسەتەدى.

— ۆولونتەرلىككە قوعام تاراپىنان قىزىعۋشىلىق ارتىپ كەلە مە، الدە بۇل كوبىنەسە مەملەكەتتىڭ ىنتالاندىرۋىمەن ءجۇرىپ جاتىر ما؟

            اكەجان كەڭەسوۆ: قازىرگى تاڭدا قوعام تاراپىنان ۆولونتەرلىككە دەگەن قىزىعۋشىلىق بىرتىندەپ ارتىپ كەلەدى. الەۋمەتتىك جەلىلەر مەن مەديا بۇل قىزمەتتى ناسيحاتتاۋعا ۇلكەن ۇلەس قوسىپ جاتىر. الايدا، باستاپقى سەرپىن مەن جۇيەلەنۋدى كوبىنە مەملەكەتتىڭ ىنتالاندىرۋى قامتاماسىز ەتكەنىن مويىنداۋ كەرەك. ەندىگى مىندەت – بۇل قوزعالىستى ازاماتتىق قوعامنىڭ ورگانيكالىق قاجەتتىلىگىنە اينالدىرۋ.

            جانەل احمەت قىزى:  ءقازىر ەكى باعىتتا دا دامۋ بار — ءبىر جاعىنان، قوعامنىڭ ءوزى بەلسەندى بولا باستادى، ەكىنشى جاعىنان، مەملەكەت تە بۇل سالانى مىقتاپ قولداپ وتىر. ءبىراق قازىرگى كەزەڭدە مەملەكەتتىڭ ءرولى باسىمىراق دەپ ايتۋعا بولادى.   ءقازىر جاستار اراسىندا دا قىزىعۋشىلىق جوعارى، سەبەبى جاستار ءقازىر جاڭا تانىسۋ، پايدالى ورتا ىزدەيدى. جوو-لاردا دا ۆولونتەرلىك باستامالار ءجيى ءوتىپ تۇرادى. الەۋمەتتىك جەلىلەردىڭ ىقپالىمەن ەكولوگيا، جانۋارلاردى قورعاۋ، كومەككە مۇقتاج ادامدارعا قول ۇشىن بەرۋ سەكىلدى باستامالار كوبەيىپ جاتىر. اۋىلداردا دا بەلسەندى توپتار پايدا بولا باستادى.

— 2016 جىلعى «ۆولونتەرلىك قىزمەت تۋرالى» زاڭنىڭ ناقتى ناتيجەسىن ايتا الاسىز با؟ ول نەگە ىقپال ەتتى؟

اكەجان كەڭەسوۆ: ءيا، 2016 شىققان «ۆولونتەرلىك قىزمەت تۋرالى» زاڭ ۆولونتەرلىكتى العاش رەت زاڭنامالىق تۇرعىدا ايقىنداپ، ونىڭ مارتەبەسىن ناقتىلادى. ۆولونتەرلىك ۇيىمداردى تىركەۋ، ولاردىڭ قۇقىقتارى مەن مىندەتتەرىن جۇيەلەۋ، مەملەكەتتىڭ قولداۋ تەتىكتەرىن زاڭداستىرۋ – زاڭنىڭ باستى ناتيجەسى. بۇل ۆولونتەرلىكتى كولەڭكەلى نەمەسە ۋاقىتشا ارەكەتتەن رەسمي قوعامدىق قىزمەتكە اينالدىردى دەسەك تە بولادى.

جانەل احمەت قىزى:  «ۆولونتەرلىك قىزمەت تۋرالى»  زاڭ ەرىكتىلەرگە ناقتى زاڭدى نەگىز بەردى دەپ ويلايمىن.  ياعني،  ۆولونتەرلىك قىزمەت رەسمي تۇردە تانىلىپ، ەرىكتىلەردىڭ دە، ۇيىمداردىڭ دا قۇقىقتارى مەن مىندەتتەرى انىقتالدى. بۇرىن ءبارى تەك باستاما رەتىندە جۇزەگە اسسا، ەندى جۇيەلى جۇمىس ىستەۋگە مۇمكىندىك تۋدى. سونىمەن قاتار، زاڭ ۆولونتەرلىكتىڭ قاي سالالاردا جۇرگىزىلۋى مۇمكىن ەكەنىن كورسەتتى، ماسەلەن  الەۋمەتتىك كومەك، ەكولوگيا، ءبىلىم بەرۋ، مادەنيەت جانە سپورت سياقتى. ۆولونتەرلىك ۇيىمدار دا زاڭدى تۇردە قۇرىلىپ، ەرىكتىلەردى وقىتىپ، باعىت-باعدار بەرە باستادى. مەملەكەت تاراپىنان قولداۋ كوبەيدى، ول ءوز ەركىمەن ۆولونتەر بولۋعا ىنتانى ارتتىردى دەپ ويلايمىن. جالپى، بۇل زاڭ ۆولونتەرلىكتى تەك قايىرىمدىلىق ەمەس، ازاماتتىق بورىش، قوعامعا كومەكتەسۋ دەگەن كوزقاراستى قالىپتاستىرۋعا كوپ اسەر ەتتى.

— قازاقستاندىقتار ۆولونتەرلىكتى قاي تۇرعىدا قابىلدايدى – ازاماتتىق بورىش، الدە ۋاقىتشا حوببي رەتىندە مە؟

اكەجان كەڭەسوۆ: جالپى بۇل جايىندا قوسارلانعان كوزقاراس بار دەۋگە بولادى. ءبىر بولىگى ۆولونتەرلىكتى ازاماتتىق بورىش رەتىندە قابىلدايدى، اسىرەسە توتەنشە جاعدايلاردا، قايىرىمدىلىق اكسيالارىندا. ءبىراق جاستار اراسىندا بۇل كوبىنە ۋاقىتشا تاجىريبە، الەۋمەتتىك بەلسەندىلىك ءتۇرى رەتىندە قابىلدانادى. دەي تۇرعانمەن سوڭعى جىلدارى ۆولونتەر بولۋدى ازاماتتىق بورىش رەتىندە قالىپتاستىرۋعا از دا بولسىن ۇلەس قوسىپ جاتىرمىز. ءاربىر وڭىردەگى جاستار ورتالىقتارىنىڭ جەتەكشىلەرى، ماماندارى جاس ۆولونتەرلارعا جاقسىلاپ تۇسىندىرەر بولسا، وڭ ناتيجەسىن بەرەدى. جالپى بۇل باعىتتا قۇندىلىقتىق ترانسفورماسيا بولسا، ارتىق ەتپەيدى. ايتا كەتەرلىك، ءقازىر جاستار ۆولونتەرلىكتى تەك كومەك كورسەتۋ قۇرالى ەمەس، ءوز-وزىن دامىتۋ، جەلى قۇرۋ جانە تاجىريبە جيناقتاۋ ءتاسىلى رەتىندە قاراي باستادى. بۇل – وڭ تەندەنسيا. سونىمەن قاتار، جاستار ۆولونتەرلىك ارقىلى الەۋمەتتىك ادىلەتتىلىك پەن ەكولوگيالىق ماسەلەلەرگە تىكەلەي ىقپال ەتۋ مۇمكىندىگىن سەزىنىپ كەلەدى.

جانەل احمەت قىزى: سوڭعى جىلدارى، اسىرەسە پاندەميا مەن تابيعي اپاتتار كەزىندە ۆولونتەرلىككە ازاماتتىق جاۋاپكەرشىلىك رەتىندە قارايتىندار كوبەيدى. جاستار اراسىندا ەلگە قىزمەت ەتۋ، قوعامعا پايدالى بولۋ يدەياسى كەڭ تارالىپ جاتىر. بۇل — ازاماتتىق سانانىڭ ءوسۋىنىڭ كورىنىسى. دەگەنمەن، ۆولونتەرلىككە ءالى دە حوببي نەمەسە فورمالدى مىندەت رەتىندە قارايتىندار بار. كوپتەگەن جاستار ونى پورتفوليو جاساۋ نەمەسە گرانت ۇتىپ الۋ ءۇشىن، وقۋ تالابىن ورىنداۋ نەمەسە رەزيۋمە جيناۋ ماقساتىندا تاڭدايدى. الەۋمەتتىك جەلىدە بەلسەندىلىك كورسەتۋ قۇرالى رەتىندە پايدالاناتىندار بار. قۋانتارلىعى، سوڭعى وتكەن TED جوباسىندا توپ قۇرامى وقۋشىلار، ستۋدەنتتەر، ەرەسەك ادامداردىڭ باسىن بىرىكتىرىپ، جاس ەرەكشەلىگىنە قاراماستان، ادەمى ءارى ۇيىمداسقان بولدى.

— Qazvolunteer.kz پلاتفورماسىنىڭ تيىمدىلىگى تۋرالى پىكىرىڭىز قانداي؟ ول ۆولونتەرلەر ءۇشىن شىن مانىندە پايدالى ما؟

اكەجان كەڭەسوۆ: Qazvolunteer.kz – ۆولونتەرلەر مەن ۇيىمداردى بايلانىستىراتىن ماڭىزدى قۇرال. الايدا ونىڭ تيىمدىلىگى تەك تەحنيكالىق پلاتفورما رەتىندە عانا ەمەس، بەلسەندىلىك پەن مازمۇنعا تاۋەلدى. جالپى اتالعان پلاتفورمانىڭ پايداسى بار ءارى قاجەت. ەگەر جۇيەلى جاڭارتىلىپ وتىرسا، ءموبيلدى قوسىمشاسى جەتىلدىرىلسە، تيىمدىلىگى ارتا تۇسەر ەدى.

جانەل احمەت قىزى: ۆولونتەرلىك جوبالاردىڭ ماڭىزىن جانە كۇندەلىكتى ومىردە ولاردىڭ ءرولىن ارتتىرۋ ءۇشىن شىنىمەن پايدالى. ول ءبىر جەرلەن ءتۇرلى جوبالار مەن ءىس-شارالار تۋرالى اقپارات بەرەدى،  بۇل جاڭادان باستاعاندار ءۇشىن وتە ءتيىمدى. ۆولونتەرلەر قاتىسقان ءىس-شارالاردى تىركەپ، ساندىق پورتفوليو جيناي الادى، بۇل كەيىن جۇمىسقا نەمەسە وقۋ ورنىنا ءوتىنىش بەرۋدە پايدالى بولۋى مۇمكىن. سونداي-اق، گرانتتار مەن وقۋ كۋرستارى تۋرالى اقپارات الا الادى، سەرتيفيكاتتار مەن العىس حاتتار بەرىلەدى. ارينە، كەيبىر كەمشىلىكتەر دە بار. پلاتفورمانىڭ ينتەرفەيسى كەيدە كۇردەلى، ال ايماقتاردا كەي جوبالار از كەزدەسەدى. كەي ادامدار ۆولونتەرلىككە تەك سەرتيفيكات الۋ ءۇشىن قاتىسادى، بۇل شىنايى ەرىكتىلىكتىڭ ءمانىن السىرەتەدى. دەگەنمەن، مەنىڭ ويىمشا، پلاتفورما ەرىكتىلەر ءۇشىن پايدالى ءارى ماڭىزدى قۇرال. ونىڭ تيىمدىلىگىن ارتتىرۋ ءۇشىن ايماقتارداعى جوبالاردى كوبەيتىپ، ينتەرفەيسىن جاقسارتۋ كەرەك.

— ۆولونتەرلىك ينفراقۇرىلىم (فرونت-كەڭسەلەر، رەسۋرستىق ورتالىقتار) وڭىرلەردە بىركەلكى دامىپ جاتىر ما؟

اكەجان كەڭەسوۆ: جوق، وكىنىشكە قاراي، ۆولونتەرلىك ينفراقۇرىلىم بارلىق وڭىردە بىركەلكى دامىماعان. رەسپۋبليكالىق دەڭگەيدە بەلگىلى ءبىر ستاندارتتار مەن قولداۋ تەتىكتەرى بولعانىمەن، ولاردىڭ ىسكە اسۋى ايماقتارعا بايلانىستى تۇرلىشە كورىنىس تابادى. كەيبىر اۋىلدىق ەلدى مەكەندەر مەن شاعىن قالالاردا رەسۋرستىق ورتالىقتار مۇلدە جوق نەمەسە قاعاز جۇزىندە عانا جۇمىس ىستەيدى. بۇل – ۆولونتەرلىكتى تۇراقتى دامىتۋعا كەدەرگى كەلتىرەتىن فاكتورلاردىڭ ءبىرى. دەگەنمەن، الماتى قالاسىنىڭ تاجىريبەسى — وسى سالاداعى ۇزدىك ۇلگىلەردىڭ ءبىرى. بۇگىندە الماتىدا بارلىق اۋدان بويىنشا زاماناۋي تالاپتارعا ساي «كوميۋنيتي-ورتالىقتار» اشىلعان. بۇل ورتالىقتار — جاستار مەن ۆولونتەرلەردىڭ باس قوساتىن، يدەيالارىن جۇزەگە اسىراتىن، باستامالارىن ىسكە اسىراتىن ورتاعا اينالىپ وتىر. مۇنداي كەڭىستىكتەردە كەز كەلگەن جاس شىعارماشىلىقپەن اينالىسا الادى، شاعىن ترەنينگ وتكىزىپ، الەۋمەتتىك جوباسىن جۇزەگە اسىرۋعا مۇمكىندىك تابادى. بۇل — تەك ينفراقۇرىلىم ەمەس، جاستار مەن قوعام بەلسەندىلەرىنىڭ ناقتى تىرەك نۇكتەسىنە اينالعان ورتا. وسىنداي ۇلگىدەگى ورتالىقتاردى ەلىمىزدىڭ وزگە وڭىرلەرىنە تاراتۋ — ستراتەگيالىق قاجەتتىلىك.

جانەل احمەت قىزى:ءيا، قالالاردا فرونت-كەڭسەلەر مەن رەسۋرستىق ورتالىقتار كوبەيىپ جاتىر، ءبىراق كوپ ادامدار بىلە بەرمەيدى. جاستار ءۇشىن جاقسى مۇمكىندىك بولعانىمەن، كەي جەرلەردە ۆولونتەرلىككە قاتىسۋ قيىنىراق. تىلگە تيەك ەتەرلىك، اۋىلدى جەرلەردە ۆولونتەرلىك تۋرالى اقپارات جەتىسپەيدى. ءبىراق ۋاقىت وتە كەلە، الەۋمەتتىك جەلىلەر مەن ءتۇرلى شارالار ارقىلى بۇل تۋرالى حاباردار بولار دەپ ويلايمىن.

— 2026 جىلعى حالىقارالىق ۆولونتەرلەر جىلىن وتكىزۋدىڭ قازاقستان ءۇشىن ستراتەگيالىق ماڭىزى قانداي؟

اكەجان كەڭەسوۆ: بۇل – قازاقستاننىڭ ۆولونتەرلىك الەۋەتىن حالىقارالىق دەڭگەيدە تانىتۋىنا، ۆولونتەرلىك مادەنيەتتى جۇيەلەۋگە جانە جاڭا سەرىكتەستىكتەر ورناتۋعا ۇلكەن مۇمكىندىك. سونىمەن قاتار، بۇل جىل ۆولونتەرلەرگە ناقتى قۇرمەت كورسەتۋدىڭ، ولاردىڭ ەڭبەگىن باعالاۋدىڭ، مەملەكەتتىڭ ستراتەگيالىق قادامىن كورسەتۋدىڭ سيمۆولى بولا الادى.

جانەل احمەت قىزى: مەنىڭشە، بۇل قازاقستان ءۇشىن وتە ماڭىزدى. بىرىنشىدەن، بۇل ءبىزدىڭ ەلدى حالىقارالىق دەڭگەيدە تانىتاتىن كەرەمەت مۇمكىندىك. ۆولونتەرلىك تەك قايىرىمدىلىق ەمەس قوي – بۇل ازاماتتىق بەلسەندىلىك، جاۋاپكەرشىلىك. وسىنداي جىل اياسىندا ءبىز ەلىمىزدەگى ۆولونتەرلىك قوزعالىستى كەڭىنەن كورسەتىپ، دامىتا الامىز دەپ ەسەپتەيمىن. ەكىنشىدەن، جاستار ءۇشىن ۇلكەن موتيۆاسيا بولادى. مەن ءوزىم سياقتى كوپ جاستاردىڭ ۆولونتەرلىككە قىزىعىپ جۇرگەنىن بايقايمىن.. سول سەبەپتى، وسىنداي حالىقارالىق باستامالار ارقىلى قوعامداعى ەرىكتىلەردىڭ ءرولى ارتىپ، ولارعا دەگەن كوزقاراس وزگەرەدى دەپ سانايمىن. ۇشىنشىدەن، بۇل ينفراقۇرىلىم مەن قولداۋدى كۇشەيتۋگە جاقسى سەبەپ. ياعني، تەك استانا مەن الماتىدا عانا ەمەس، بارلىق وڭىرلەردە ۆولونتەرلىك دامۋى كەرەك دەپ ويلايمىن. قىسقاشا ايتسام، بۇل جىل – ءبىز ءۇشىن ءوزىمىزدى كورسەتۋگە دە، قوعامدى جاقسى جاققا وزگەرتۋگە دە تاماشا مۇمكىندىك!

— بۇل باستاما ۆولونتەرلىككە تەك سيمۆولدىق كوڭىل بولۋمەن شەكتەلىپ قالماي ما؟

اكەجان كەڭەسوۆ: مۇنداي ءقاۋىپ بار. ەگەر دايىندىق تەك ىس-شارالارمەن عانا شەكتەلسە، ۇزاقمەرزىمدى ناتيجە بولمايدى. سوندىقتان 2026 جىل – ۆولونتەرلىك ينفراقۇرىلىمدى كۇشەيتۋ، كادر دايارلاۋ، قارجىلاندىرۋ مەن ىنتالاندىرۋ جۇيەسىن قايتا قاراۋ كەزەڭىنە اينالۋى ءتيىس. سيمۆولدان جۇيەلى جۇمىس باسىم بولسا، اتالعان جۇمىستار وڭ ناتيجەسىن بەرەدى. الماتى — تەك يدەيالار ورتالىعى عانا ەمەس، سونىمەن قاتار ۆولونتەرلىك پەن ازاماتتىق بەلسەندىلىكتىڭ ناقتى تەتىكتەرمەن جۇمىس ىستەيتىن ورتالىعى. قالادا ۆولونتەرلىك ۇيىمدارعا ارنالعان كەڭسەلەر، كەزدەسۋلەرگە ارنالعان كوۆوركينگ الاڭدار، جاستارعا ارنالعان شىعارماشىلىق، الەۋمەتتىك باعىتتاعى جوبالاردى قولدايتىن الاڭدار بار. وسىنداي ۇلگىدەگى قولداۋ مەحانيزمدەرى قازاقستاننىڭ باسقا وڭىرلەرىنە ەنگىزىلسە، 2026 جىل سيمۆولدىق ناۋقان ەمەس، «ۆولونتەرلىكتى ءومىر سالتىنا اينالدىراتىن تاريحي كەزەڭگە» اينالار ەدى.

جانەل احمەت قىزى:ۆولونتەرلىك جاي عانا سيمۆول ەمەس، ونى قالىپتى جاعدايعا اينالدىرۋ ءۇشىن ءالى دە ءبىراز ۋاقىت كەرەك دەپ ويلايمىن

— قازاقستاندا ۆولونتەرلىك مادەنيەتتى ورنىقتىرۋ ءۇشىن تاعى قانداي جۇيەلى شارالار قاجەت دەپ سانايسىز؟

اكەجان كەڭەسوۆ: مەكتەپتەن باستاپ ۆولونتەرلىك تۋرالى تاربيە بەرۋ، جوو-دا ۆولونتەرلىك تاجىريبەنى وقۋ كرەديتىنە اينالدىرۋ، الەۋمەتتىك جارناما مەن تانىمال مەديا تۇلعالار ارقىلى ناسيحات جۇرگىزۋ ماڭىزدى. سونىمەن قاتار، ۆولونتەرلىكپەن اينالىساتىن ازاماتتارعا الەۋمەتتىك پاكەت ياعني، ءتۇرلى جەڭىلدىكتەر، ماراپاتتاۋ جۇيەسىنىڭ ناقتى ءبىر تەتىگىن ەنگىزۋ وزەكتى.

جانەل احمەت قىزى: شىنى كەرەك، شەتەلدە ۆولونتەرلىك جۇيەلى ءجۇرىپ جاتىر. ولار ەرىكتىلەردى ارنايى وقىتادى، جوبالارعا قاتىسۋ ءۇشىن ناقتى باعدارلاما مەن قولداۋ بار. مىسالى، ەۋروپادا ۆولونتەرلىكپەن اينالىسقان ادامعا شەتەلگە شىعۋعا گرانتتار، ءتىپتى جۇمىسقا ورنالاسۋعا ارتىقشىلىقتار بەرىلەدى. بىزدە دە دا جاستارعا شەتەلدىك ۆولونتەرلىك جوبالارعا قاتىسۋعا كوبىرەك مۇمكىندىك بەرۋ كەرەك دەپ ەسەپتەيمىن. بۇل – بىرىنشىدەن، ۇلكەن تاجىريبە، ەكىنشىدەن، الەمدى تانۋعا جول. سوندا ءبىز ءوز ەلىمىزدەگى ۆولونتەرلىكتى باسقا ەلدەرمەن سالىستىرىپ، نە جەتىسپەيتىنىن ءوز كوزىمىزبەن كورە الامىز. مۇنداي تاجىريبە ءبىزدى شابىتتاندىرادى، ءارى ەلىمىزدە ۆولونتەرلىك مادەنيەتتى دامىتۋعا جاڭا يدەيالار اكەلەدى. سوندىقتان حالىقارالىق جوبالارعا جول اشۋ – وتە ماڭىزدى.

— ۆولونتەرلىك قىزمەتتى تۇراقتى تۇردە دامىتۋدىڭ باستى كەدەرگىلەرى مەن شەشىمدەرى قانداي؟

اكەجان كەڭەسوۆ: مەنىڭ ويىمشا، ۆولونتەرلىك قىزمەتتىڭ دامۋىنا ناقتى كەدەرگىلەر جوق. سەبەبى ۆولونتەر – بۇل شىنايى نيەتپەن، جۇرەك قالاۋىمەن كومەكتەسەتىن جان. ەگەر ادام بۇل ىسپەن شىنىمەن اينالىسقىسى كەلسە، ەشقانداي توسقاۋىل وعان كەدەرگى بولا المايدى. ۆولونتەرلىك – ول مىندەت ەمەس، ول جان-دۇنيەنىڭ تاڭداۋى. سوندىقتان شىنايى نيەت بولسا، دامۋ دا، تۇراقتىلىق تا وزدىگىنەن كەلەدى.

جانەل احمەت قىزى: ۆولونتەرلىك قىزمەتتى دامىتۋعا كەدەرگى بار دەپ ايتا المايمىن. كەرىسىنشە، مۇمكىندىك مول  – پلاتفورمالار دا، جوبالار دا بار. مىسالى، Qazvolunteer.kz سياقتى سايتتار ارقىلى كەز كەلگەن ادام وزىنە لايىقتى ۆولونتەرلىك ءىس تابا الادى. مەنىڭ ويىمشا، باستىسى – ادامنىڭ ءوزى نيەتتەنسە بولدى. قوعامدا دا، مەملەكەت تاراپىنان دا قولداۋ بار. تەك كەيدە جاستار ءوز مۇمكىندىگىن بىلمەي جۇرەدى، سونى كوبىرەك ناسيحاتتاۋ كەرەك شىعار. ەرىكتىلىك – ەرىككەننىڭ ءىسى ەمەس، جۇرەك قالاۋى بولۋى ءتيىس. شىن  قىزىقساڭ، بارىنە جول تابىلادى.

سۇحباتتاسقان جاننا جومارت