تۋريزم جانە سپورت مينيسترلىگى رەسپۋبليكالىق دەڭگەيدە 46 باسىم سپورت ءتۇرىن بەكىتتى. وسى ءتىزىم نەگىزىندە استانا قالاسىنىڭ دەنە شىنىقتىرۋ جانە سپورت باسقارماسى 29 باسىم سپورت ءتۇرىن انىقتادى، دەپ حابارلايدى Dalanews.kz 

بەكىتىلگەن تىزىمگە مىنالار كىردى:
• جازعى سپورت تۇرلەرى – 12؛
• قىسقى سپورت تۇرلەرى – 4؛
• ۇلتتىق سپورت تۇرلەرى – 11؛
• ازيا جانە پاراازيا ويىندارىنىڭ باعدارلاماسىنا ەنگەن سپورت تۇرلەرى – 2.

ۋاكىلەتتى ورگان بەكىتكەن 29 باسىم سپورت تۇرىمەن قاتار، ەلوردادا جوعارى جەتىستىكتەرگە باعىتتالعان باسقا سپورت تۇرلەرى دە دامىتىلا بەرەدى.

اتالعان سپورت تۇرلەرىن قارجىلاندىرۋ جەرگىلىكتى بيۋدجەت ەسەبىنەن باسىم تارتىپپەن جۇزەگە اسىرىلادى.

قاراجات تومەندەگى باعىتتارعا بولىنەدى:
• سپورتتىق رەزەرۆتى دايىنداۋعا؛
• سپورتشىلاردىڭ حالىقارالىق جارىستارعا قاتىسۋىنا؛
• وقۋ-جاتتىعۋ جيىندارى مەن سپورتتىق ءىس-شارالاردى وتكىزۋگە؛
• ەلورداداعى سپورت ينفراقۇرىلىمىن كۇتىپ-ۇستاۋعا جانە دامىتۋعا باعىتتالادى.

ايماقتىق تىزىمدەر سپورتتىق ناتيجەلەردىڭ ديناميكاسىن، حالىقارالىق باعدارلامالارداعى وزگەرىستەر مەن كەشەندى جارىستار كۇنتىزبەسىنە ەنگىزىلەتىن جاڭا باعىتتاردى ەسكەرە وتىرىپ، جىل سايىن قايتا قارالاتىن بولادى.

بۇل رەفورما سالانى باسقارۋ تيىمدىلىگىن ارتتىرۋعا، جوعارى جەتىستىكتى سپورتتى دامىتۋعا، كادرلىق جانە ماتەريالدىق بازانى نىعايتۋعا جانە سپورتشىلاردى دايارلاۋدىڭ زاماناۋي جۇيەسىن قالىپتاستىرۋعا باعىتتالعان.