بۇگىن، 14 اقپاندا قازاقستان رەسپۋبليكاسىنىڭ ەنەرگەتيكا مينيسترلىگى مەن "تەڭىزشيەۆرويل" ج ش س (تشو) ىشكى نارىققا تۇراقتى تۇردە سۇيىتىلعان مۇناي گازىن (سمگ) جەتكىزۋدى قامتاماسىز ەتەتىن ءوزارا تۇسىنىستىك تۋرالى جىل سايىنعى مەموراندۋمدى ۇزارتۋ تۋرالى كەلىسىمگە قول قويدى. قۇجات ۆەدومستۆو مەن كومپانيا اراسىنداعى سىندارلى كەلىسسوزدەردىڭ ناتيجەسىندە راسىمدەلدى، دەپ حابارلايدى Dalanews.kz.
كەلىسىمگە سايكەس، 2025 جىلى تشو قازاقستاننىڭ ىشكى نارىعىنا 240 000 توننا سۇيىتىلعان مۇناي گازىن جەتكىزەتىن بولادى.
"ەڭ الدىمەن، سۇيىتىلعان مۇناي گازى – بۇل بۇكىل الەمدە تەك اۆتوكولىك وتىنى رەتىندە عانا ەمەس، سونىمەن قاتار مۇناي-گاز حيمياسىن دامىتۋ ءۇشىن قۇندى كومىرسۋتەك شيكىزاتى رەتىندە پايدالانىلاتىن ماڭىزدى رەسۋرس ەكەنىن اتاپ وتكىم كەلەدى. بۇل كەلىسىمنىڭ جاسالۋى – رەسپۋبليكانىڭ سۇيىتىلعان مۇناي گازىنا دەگەن ىشكى قاجەتتىلىگىن قامتاماسىز ەتۋدەگى ماڭىزدى قادام بولىپ تابىلادى. قازاقستان رەسپۋبليكاسىنداعى سۇيىتىلعان مۇناي گازىن وندىرۋشىلەردىڭ ءبىرى رەتىندە سەرىكتەسىمىز تشو-دان جەتكىزىلەتىن كەپىلدەندىرىلگەن گاز ىشكى نارىقتاعى تاپشىلىقتى ازايتۋعا جانە وسى ءونىمدى تۇتىنۋشىلار ءۇشىن قولايلى جاعداي جاساۋعا مۇمكىندىك بەرەدى"،– دەدى ەنەرگەتيكا ۆيسە-مينيسترى الىبەك جاماۋوۆ.
ايتا كەتۋ كەرەك، تشو قازاقستان رەسپۋبليكاسىندا مۇناي-حيميا ونەركاسىبىنىڭ دامۋىنا دا ىقپال ەتۋدە. سوڭعى بىرنەشە جىل ىشىندە تشو KPI كومپانياسىنا پروپان شيكىزاتىن، "بۋتاديەن" جوباسى ءۇشىن بۋتان جانە "پوليەتيلەن" جوباسى ءۇشىن ەتان جەتكىزۋ تۋرالى قۇجاتتارعا كەلىسىپ، قول قويدى.
"تشو ىشكى نارىققا تاۋارلىق گازدىڭ نەگىزگى جەتكىزۋشىلەرىنىڭ ءبىرى بولىپ قالا بەرەدى جانە ەل ءۇشىن وسى ستراتەگيالىق ماڭىزدى سالاداعى الەۋەتتى مۇمكىندىكتەردى زەرتتەۋ ءۇشىن قازاقستانمەن ىنتىماقتاستىقتى جالعاستىرۋدا. ءبىز ەنەرگەتيكا مينيسترلىگىنىڭ ماقساتتارىنا قولداۋ كورسەتۋدى جالعاستىرامىز جانە ەلدىڭ ونەركاسىپتىك جانە ەكونوميكالىق دامۋىنا ءوز ۇلەسىمىزدى قوسۋعا تىرىسامىز"، – دەپ اتاپ ءوتتى تشو باس ديرەكتورى كيەۆين لايون.
بۇعان دەيىن سايتىمىزدا "ءونىمدى ءبولىسۋ تۋرالى كەلىسىمدى قايتا قاراستىرۋ: تشو باسشىسى ءوز پىكىرىن ايتتى" دەگەن ماتەريال جاريالانعان بولاتىن. ءوز سوزىندە كيەۆين لايون تشو-دا ءونىمدى ءبولىسۋ تۋرالى كەلىسىم دەگەننىڭ جوق ەكەنىن، وزدەرىنىڭ رويالتي مەن سالىق تولەۋ شارتتارىنا باعىناتىن مامىلە اياسىندا جۇمىس ىستەيتىنىن ايتقان ەدى.
