قازاقستانداعى كەدەيلىك شەگى 2025 جىلدان باستاپ جاڭا تاسىلمەن ەسەپتەلەدى. بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆانىڭ بۇيرىعىندا قامتىلعان، دەپ جازادى Dalanews.kz.
"2025 جىلعى 1 قاڭتاردان باستاپ كەدەيلىك شەگى مەملەكەتتىك اتاۋلى الەۋمەتتىك كومەك تاعايىنداۋعا ءوتىنىش بەرگەن توقساننىڭ الدىنداعى توقساندا ەسەپتەلگەن ورتاشا تابىستىڭ 35% مولشەرىندە، ءبىراق كورسەتىلگەن توقسان بويىنشا ەسەپتەلگەن وڭىرلىك كۇنكورىس دەڭگەيىنىڭ 70% –دان تومەن ەمەس مولشەردە ايقىندالاتىن بولادى"، دەلىنگەن بۇيرىقتا.
بۇعان دەيىن ول مەملەكەتتىك اتاۋلى الەۋمەتتىك كومەك تاعايىنداۋعا ءوتىنىش بەرگەن توقساننىڭ الدىنداعى توقسانعا ەسەپتەلگەن ەڭ تومەنگى كۇنكورىس دەڭگەيىنىڭ 70% مولشەرىندە ەسەپتەلىپ كەلگەن بولاتىن.
بۇيرىق 2025 جىلعى 6 قاڭتاردان باستاپ قولدانىسقا ەنگىزىلەدى.
ايتا كەتسەك، بۇيرىققا سايكەس، ەسەپ ەندى توقسان سايىن جۇرگىزىلەتىن بولادى. بيىلعى جىلدىڭ سوڭىندا ورتاشا جالاقى (مەدياندى) كولەمى 285 مىڭ تەڭگەنى قۇرادى، ياعني جاڭا ستاندارتتار بويىنشا تابىسى 100 مىڭ تەڭگەدەن تومەن ادامدار كەدەي سانالادى.
بۇعان دەيىن Dalanews.kz "قازاقستانداعى كەدەيلىكتى زەرتتەگەن دۇنيەجۇزىلىك بانك اتاۋلى كومەكتەن جەمقورلىق قۇرام تاپقان" دەگەن ماقالا جاريالاعان.
