«الماتى-1» ستانسياسى ماڭايىنداعى ساياباقتا جان تەبىرەنتەرلىك كەزدەسۋ بولدى. زامانىمىزدىڭ قاھارماندارى – باتىس قازاقستان وبلىسىنان الاپات سۋ تاسقىنىنىڭ زارداپتارىن جويۋعا اتسالىسقان جۇرگىزۋشىلەر، ەرىكتىلەر مەن قۇتقارۋشىلاردى گۇل شوقتارى مەن العىس سوزدەرىمەن قارسى الدى، – دەپ حابارلايدى Dalanews.kz الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ.
ءساۋىر ايىنىڭ ورتاسىندا الماتى وبلىسى ەلىمىزدىڭ باتىسىنا ساموسۆالدار، كامازدار مەن ەكسكاۆاتورلاردى قوسا العاندا 171 بىرلىك تەحنيكا، 50 قۇتقارۋشى مەن اسكەري قىزمەتشى، سونداي-اق 15 ەرىكتىلەرمەن اسەرلى جاساق جىبەرگەن ەدى.
كاسىپكەرلەر مەن شارۋا قوجالىقتارىنىڭ باسشىلارىنان باستاپ تجد قىزمەتكەرلەرى مەن قاراپايىم تۇرعىندارعا دەيىن بارلىعى ءۇن قاتىپ، كومەك بەرۋگە جاۋاپ بەرگەن بولاتىن. دەلەگاسيانى باسقارعان الماتى وبلىسى اكىمىنىڭ ورىنباسارى الماس باتانوۆ وسى ماڭىزدى ميسسيانىڭ بارلىق قاتىسۋشىلارىنا ۇلكەن ريزاشىلىعىن ءبىلدىردى.
– بۇگىن ءبىز سىزدەردى بەيبىت ۋاقىتتىڭ كەيىپكەرلەرى رەتىندە قارسى الامىز. ءسىز ءوز وتانداستارىڭىزدى قيىنشىلىققا تاستاماي، تابيعي اپاتپەن كۇرەسىپ كەلدىڭىزدەر، – دەپ اتاپ ءوتتى الماس باتانوۆ.
قونايەۆ قالاسىنان كەلگەن ەرىكتى راشيد مامەتوۆ ورالداعى جۇمىسى تۋرالى ءوز ويىن بىلايشا جەتكىزدى:
– بىزدەر بوگەتتەر سالىپ، اۋىلداردى سۋدان قورعادىق. اۋىلداردى سۋ باسىپ كەتۋى مۇمكىن دەگەن قورقىنىش بولدى، الايدا ۇيلەسىمدى جۇمىستىڭ ارقاسىندا اۋىلداردى سۋ باسۋدان قورعاپ قالدىق، – دەدى. تالعار اۋدانىنداعى ساموسۆال جۇرگىزۋشىسى ەلدار يسايەۆ: «ءبىز ءبىر كۇندە 15 رەت رەيس جاساپ، بوگەت سالۋعا قۇم تاسىپ، 26 ارنايى تەحنيكانى جۇمىلدىرىپ، ۇزىندىعى 8 شاقىرىمعا جۋىق بوگەت جاسادىق اۋىلداردى سۋ باسۋدىڭ الدىن الدىق»، – دەيدى.
باتىس قازاقستانعا كومەك كورسەتۋ تاريحى قازاقستاندىقتاردىڭ بىرلىگى مەن ىنتىماقتاستىعىنىڭ جارقىن مىسالى بولا الادى.
