مەملەكەت باسشىسىنىڭ باستاماسىنىڭ اياسىندا, الماتى قالاسىندا قارقىندى جۇمىستار اتقارىلىپ, جەكە كەسٸپ باستايمىن دەگەن جۇرتقا داڭعىل جول اشىلىپ جاتىر. وعان دەلەل, 1600-گە جۋىق الماتىلىقتىڭ قايتارىمسىز گرانت الىپ, ٶز كەسٸبٸن باستاۋى.
مەملەكەتتەن قولداۋ تاۋىپ, جەكە ٸست باستاعانداردىڭ بٸرٸ, الماتىلىق 29 جاستاعى دينارا اڭساتباەۆا - 4 بالانىڭ اناسى. ەڭ ٷلكەنٸ 5 جاستا بولسا, ەڭ كٸشٸسٸ بٸر جارىمدا. 6 جىلدان بەرٸ بالا كٷتٸمٸنە بايلانىستى ٷيدە وتىرعان ول تٸگٸنگٸشٸ ماماندىعىن بٸتٸرگەن. بٸراق سٷيٸكتٸ ٸسٸمەن بار بولعانى بٸر جىل عانا اينالىسىپتى. دەگەنمەن ٷيدەگٸ تٸرلٸكتەن قولى قالت ەتە قالسا, بوس ۋاقىتىن وسى ٸسكە ارنايدى. ال قايتارىمسىز گرانت كەسٸپتٸ دٶڭگەلەتٸپ ەكەتۋگە زور مٷمكٸندٸك بەرگەن. ول قۇجات تاپسىرعان سوڭ, بار بولعانى 2 اپتانىڭ ٸشٸندە قاراجات قالتاسىنا تٷسكەنٸن ايتادى. كٶپتەن بەرٸ ارمانداپ جٷرگەن جاڭا تٸگٸن ماشينالارىن ساتىپ الدى.
«مەن وعان كەستە تٸگەتٸن ماشينانى الدىم. سوسىن كەرەكتٸ قۇرال-جابدىقتار ساتىپ الدىم. ماشينانىڭ ارنايى باعدارلاماسىن وقىدىم. ول كەز كەلگەن سٶزدٸ كەز كەلگەن زاتقا تٸگٸپ بەرەدٸ», – دەدٸ كٶپبالالى انا دينارا اڭساتباەۆا.
ٶز ٸسٸنە ۇقىپتى كەلٸنشەكتٸڭ بٷگٸندە تۇراقتى كليەنتتەرٸ دە بار.
كٶپبالالى انا تۇتىنۋشىلاردىڭ سەنٸمٸن اقتاعانى ٷشٸن جيٸ تاپسىرىس تٷسەتٸنٸن ايتادى. ٶيتكەنٸ ول تٸگٸننٸڭ تٷر-تٷرٸن بٸلەدٸ.
جالپى جەتٸسۋ اۋدانىندا دينارا سەكٸلدٸ بيىل سٷيٸكتٸ ٸسٸن كەسٸپكە اينالدىرعان 101 ادام بار. ولاردىڭ باسىم بٶلٸگٸ تەتتٸلەر پٸسٸرەتٸن شاعىن كونديتەرلٸك تسەح اشسا, بٸرازى اتەلەنٸ ٸسكە قوسقان.
«قىركٷيەك ايىندا 72 ادام العان. ولار ٸستەرٸن باستاپ كەتٸپ جاتىر. ال قالعانى 30 شاقتى ادام. ولار جۇمىسىن جٷرگٸزٸپ جاتىر. ونى دا تەكسەرەتٸن, قانداي دا كٶمەكتەر كەرەك بولاتىن بولسا, جۇمىسپەن قامتۋ ورتالىعى اينالىسادى», – دەدٸ جەتٸسۋ اۋدانى ەكٸمٸنٸڭ ورىنباسارى دانييار ەلكەبايۇلى.
قايتارىمسىز گرانت الۋ مٷمكٸندٸگٸنە ەلٸمٸزدەگٸ كەسٸپكەرلٸكتٸ دامىتۋ ۇلتتىق جوباسى اياسىندا قول جەتٸپ وتىر. ول جاستارعا, كٶپبالالى انالارعا, از قامتىلعان, مٷگەدەك بالا اسىراپ وتىرعان وتباسىلارعا ٶزدەرٸن تۇراقتى تابىسپەن قامتاماسىز ەتۋ ٷشٸن كٶمەك رەتٸندە بەرٸلەدٸ.
قايتارىمسىز گرانت كٶلەمٸ - 400 ايلىق ەسەپتٸك كٶرسەتكٸش, ياعني 1 ملن 225 مىڭ تەڭگە.
كاپيتالدى جاڭا بيزنەستٸ باستاۋعا نەمەسە بار كەسٸپتٸ دامىتۋعا جۇمساۋعا بولادى. گرانت قاراجاتى نەسيە ٶتەۋگە, جەر تەلٸمٸن ساتىپ الۋعا بەرٸلمەيدٸ.
ايتا كەتەيٸك, الماتىدا بيىل 1600-گە جۋىق ادام قايتارىمسىز گرانت الىپ, ٶز كەسٸبٸن باستادى. ال بٷگٸننەن باستاپ «بيزنەس باستاۋ» باعدارلاماسى ارقىلى بٸلٸمٸن جەتٸلدٸرۋگە 4700-دەن اسا ادام ىنتا بٸلدٸردٸ.
