Memleket basshysynyń bastamasynyń aiasynda, Almaty qalasynda qarqyndy jumystar atqarylyp, jeke kásip bastaimyn degen jurtqa dańǵyl jol ashylyp jatyr. Oǵan dálel, 1600-ge jýyq almatylyqtyń qaitarymsyz grant alyp, óz kásibin bastaýy.
Memleketten qoldaý taýyp, jeke ist bastaǵandardyń biri, almatylyq 29 jastaǵy Dinara Ańsatbaeva - 4 balanyń anasy. Eń úlkeni 5 jasta bolsa, eń kishisi bir jarymda. 6 jyldan beri bala kútimine bailanysty úide otyrǵan ol tigingishi mamandyǵyn bitirgen. Biraq súiikti isimen bar bolǵany bir jyl ǵana ainalysypty. Degenmen úidegi tirlikten qoly qalt ete qalsa, bos ýaqytyn osy iske arnaidy. Al qaitarymsyz grant kásipti dóńgeletip áketýge zor múmkindik bergen. Ol qujat tapsyrǵan soń, bar bolǵany 2 aptanyń ishinde qarajat qaltasyna túskenin aitady. Kópten beri armandap júrgen jańa tigin mashinalaryn satyp aldy.
«Men oǵan keste tigetin mashinany aldym. Sosyn kerekti qural-jabdyqtar satyp aldym. Mashinanyń arnaiy baǵdarlamasyn oqydym. Ol kez kelgen sózdi kez kelgen zatqa tigip beredi», – dedi kópbalaly ana Dinara Ańsatbaeva.
Óz isine uqypty kelinshektiń búginde turaqty klientteri de bar.
Kópbalaly ana tutynýshylardyń senimin aqtaǵany úshin jii tapsyrys túsetinin aitady. Óitkeni ol tiginniń túr-túrin biledi.
Jalpy Jetisý aýdanynda Dinara sekildi biyl súiikti isin kásipke ainaldyrǵan 101 adam bar. Olardyń basym bóligi táttiler pisiretin shaǵyn konditerlik tseh ashsa, birazy ateleni iske qosqan.
«Qyrkúiek aiynda 72 adam alǵan. Olar isterin bastap ketip jatyr. Al qalǵany 30 shaqty adam. Olar jumysyn júrgizip jatyr. Ony da tekseretin, qandai da kómekter kerek bolatyn bolsa, jumyspen qamtý ortalyǵy ainalysady», – dedi Jetisý aýdany ákiminiń orynbasary Daniiar Álkebaiuly.
Qaitarymsyz grant alý múmkindigine elimizdegi kásipkerlikti damytý ulttyq jobasy aiasynda qol jetip otyr. Ol jastarǵa, kópbalaly analarǵa, az qamtylǵan, múgedek bala asyrap otyrǵan otbasylarǵa ózderin turaqty tabyspen qamtamasyz etý úshin kómek retinde beriledi.
Qaitarymsyz grant kólemi - 400 ailyq eseptik kórsetkish, iaǵni 1 mln 225 myń teńge.
Kapitaldy jańa biznesti bastaýǵa nemese bar kásipti damytýǵa jumsaýǵa bolady. Grant qarajaty nesie óteýge, jer telimin satyp alýǵa berilmeidi.
Aita keteiik, Almatyda biyl 1600-ge jýyq adam qaitarymsyz grant alyp, óz kásibin bastady. Al búginnen bastap «Biznes bastaý» baǵdarlamasy arqyly bilimin jetildirýge 4700-den asa adam ynta bildirdi.
