سولتۇستىكتەگى كورشىمىز رەسەي قازاقستاننان ۇلگى الىپ، 2015 جىلدان باستاپ 12 جىلدىق ءبىلىم جۇيەسىنە كوشە باستاعان بولاتىن. و باستا قازاقستاننىڭ ىس-تاجىريبەسىن جوعارى باعالاعان ورىستار ءبىزدىڭ ادىستەمەلىك باعدارلامالارمەن تانىسىپ، ۇستازدارمەن تاجىريبە الماسقان بولاتىن. جۋىردا مەن ماسكەۋ مەملەكەتتىك پەداگوگيكالىق ۋنيۆەرسيتەتىنىڭ ارنايى شاقىرۋىمەن وسى وقۋ ورنىنداعى بيولوگيا فاكۋلتەتىنىڭ ۇيىمداستىرۋىمەن وتكەن حالىقارالىق كونفەرەنسياعا قاتىستىم. 12 جىلدىق ءبىلىم جۇيەسىنە اۋىسۋ جولىندا ءبىرشاما تاجىريبە جيناعان مەملەكەتتىك مامانى رەتىندە قازاقستان اتىنان مۇنداي ماڭىزدى باسقوسۋعا قاتىسىپ، كوكەيگە تۇيگەن ويلارىمدى ورتاعا سالۋ مەنىڭ ەلىمىزدەگى ءبىلىم بەرۋ جۇيەسىنىڭ قانداي دەڭگەيگە كوتەرىلگەنىن كورسەتىپ بەرگەندەي بولدى.
ماسكەۋدە وتكەن ءدال وسى جيىننىڭ الدىندا اباي اتىنداعى قازۇپۋ-دە وتكەن ونلاين-سەمينارعا ماسكەۋلىك پروفەسسور، پەداگوگيكا عىلىمدارىنىڭ دوكتورى نيكولاي بوگدانوۆپەن وي ءبولىسىپ، 12 جىلدىق ءبىلىم بەرۋ جۇيەسىنە قاتىستى ءبىراز ماسەلەلەردى ءبىراز تالقىلاعان ەدىك. كەيىننەن نيكولاي الەكساندروۆيچ مەنى ماسكەۋ مەملەكەتتىك پەداگوگيكالىق ۋنيۆەرسيتەتى ۇيىمداستىرعان ونلاين-سەمينارعا قاتىسىپ 12 جىلدىق ءبىلىم بەرۋ جۇيەسىنە قاتىستى ويىمدى ورتاعا سالۋدى ۇسىنعاننان كەيىن، مەن رەسەيلىك ارىپتەسىمنىڭ ۇسىنىسىنا قۋانا كەلىستىم.
بيولوگيا، حيميا جانە جاراتىلىستانۋ سياقتى نەگىزىگ پاندەر بويىنشا ساباق بەرەتىن ۇستازدار باس قوسقان بۇل سەمينار بارىسىندا ماسكەۋلىك ماماندار 12 جىلدىڭ ءبىلىم بەرۋ جۇيەسىندەگى قازاقستاننىڭ ىس-تاجىريبەسىنە تەرەڭىرەك ۇڭىلگىسى كەلەتىنىن العا تارتتى. ونىڭ ىشىندە 12 جىلدىق بىلىمدەگى باستاۋىش سىنىپتارعا ارنالعان باعدارلامالاردىڭ دا ماڭىزىن تۇسىنۋگە تىرىستى.
جالپى، جاراتىلىستانۋ ءپانى – بيولوگيا پانىنە ەڭ جاقىن كەلەتىن ءپان. جاراتىلىستانۋمەن قاتار، ونىڭ ادام جانە قوعام سياقتى تارماعى دا بىزدەگى بازالىق ءبىلىم جۇيەمىزدە بار نارسە. ولاردى قىزىقتىرعان دا وسى دۇنيەتانۋ ءپانىنىڭ باستاۋىش سىنىپتاردا وقىتىلۋ باعدارلاماسى بولدى. وسى رەتتە رەسەيلىك عالىمدار 12 جىلدىق ءبىلىم بەرۋ جۇيەسىنە كوشۋ ءىسىن قولعا العانىمەن، بۇل باعىتتا اۋىز تولتىرىپ ايتاتىنداي تاجىريبەسى دە، قولدانعان وقۋ باعدارلامالارى دا جەتكىلىكسىز ەكەنىن مويىندادى. ال بىزدەگى ءبىرقاتار مەكتەپتەر 12 جىلدىق ءبىلىمدى سىناق جۇزىندە ەنگىزىپ، ءقازىر بۇل باعىتتا كوپتەگەن ىس-تاجىريبەلەرگە قول جەتكىزىپ وتىر. سىناق ءالى دە ءجۇرىپ جاتىر. 12 جىلدىق بىلىمگە اۋىسقان ءبىزدىڭ ا.جۇبانوۆ اتىنداعى دارىندى بالالارعا ارنالعان رەسپۋبليكالىق مۋزىكالىق مەكتەپ-ينتەرناتى. سول سەبەپتى ماسكەۋلىك ارىپتەستەرىمىز بيولوگيا مەن ەكولوگيا پاندەرى بويىنشا قازاقستاننىڭ ىس-تاجىريبەسىنەن ءبىلىپ قالۋعا كۇش سالدى. وسى رەتتە تمد ەلدەرىنىڭ ۇستازدارى قاتىسقان ونلاين-سەميناردا 12 جىلدىق ءبىلىم بەرۋ جۇيەسىن ەرتە باستان قولعا العان قازاقستاننىڭ باتىل ارەكەتىن جوعارى باعالاعانىن ايتا كەتۋىم كەرەك.
سەميناردا كوپتەگەن ۇستاز-عالىمدار ءسوز سويلەپ، قازىرگى تاڭدا رەسەيدە 12 جىلدىق ءبىلىم بەرۋ جۇيەسى بويىنشا بيولوگيا ءپانى بويىنشا ءبىلىم باعدارلامالارىن قازاقستاننىڭ تاجىريبەسىنە سۇيەنىپ، جەتىلدىرە ءتۇسۋ كەرەك ەكەنىن العا تارتتى. ءبىر بايقاعانىم، رەسەيدە وقۋ ستاندارتتارى بار بولعانىمەن، ونىڭ ناقتى مازمۇنى مەن تاجىريبەسى قالىپتاسپاعانىنا كوز جەتكىزدىم.
ونلاين باسقوسۋدا ۇسىنعان باياندامامنىڭ تاقىرىبى «جاراتىلىستانۋ. ادام جانە قوعام ءپانى بويىنشا ءبىلىم بەرۋدى كۇتىلەتىن ناتيجەگە باعىتتاۋ» دەپ اتالدى. قازاقستاننىڭ 12 جىلدىق ءبىلىم بەرۋ ىسىنە كوشۋدە باعدارلامالارداعى بولىنگەن ساعاتتاردىڭ مازمۇنى مەن باعىتى تمد ەلدەرىندەگى ۇستازداردى قاتتى قىزىقتىردى. قازىرگى تاڭدا ءبىلىم دەڭگەيى العان ءبىلىمنىڭ كولەمىمەن انىقتالمايدى، سول ءبىلىمنىڭ نەگىزىندە ءارتۇرلى ماسەلەلەردى شەشە الۋ قابىلەتتەرىمەن ولشەنەدى. باسقاشا ايتقاندا، تۇلعاعا باعدارلانعان ىس-ارەكەتتىك ءتاسىل – ءبىلىمنىڭ ءمانى مەن ماڭىزىن جوققا شىعارمايدى، ول وقۋشىلاردىڭ العان ءبىلىمدى پايدالانا الۋى قابىلەتتەرىنە كوڭىل اۋدارۋعا باسىمدىق بەرىلەدى.
كەزدەسۋدە ارىپتەستەرىمىز ءبىزدىڭ مامانداندىرىلعان مەكتەبىمىزگە قاتىستى كوپتەگەن سۇراقتار قويدى. ءبىزدىڭ مەكتەپ ستاندارت بويىنشا بەرىلەتىن جالپى بىلىممەن قاتار مۋزىكالىق مەكتەپ بولىپ تابىلادى. مۇنداي دارىندى بالالارعا ارنالعان تەرەڭدەتىلگەن، مامانداندىرىلعان مۋزىكالىق مەكتەپ-ينتەرنات بالالاردى وقىتۋدا جالپى ءبىلىم مەن ارنايى ءبىلىمنىڭ ەكى جاعىن بىردەي قامتيدى.
گۇلبارشىن جاكيشيەۆا، ا.جۇبانوۆ اتىنداعى دارىندى بالالارعا ارنالعان رەسپۋبليكالىق مۋزىكالىق مەكتەپ-ينتەرناتتىڭ ۇستازى.
