كۋرورتتىق ايماقتارعا الماتى، استانا جانە باسقا دا ءىرى قالالاردان تىكەلەي رەيستەر ۇيىمداستىرىلادى. سونداي-اق قازاقستاننىڭ ءۇش كۋرورتتىق ايماعىندا اۋەجايلار سالىنادى. بۇل تۋرالى بۇگىن، 2025 جىلى 19 اقپاندا كولىك ۆيسە-ءمينيسترى تالعات لاستايەۆ مالىمدەدى، دەپ جازادى Dalanews.kz.
ۆيسە-مينيستردىڭ ايتۋىنشا، ءۇش اۋەجايدىڭ ۇشۋ-قونۋ جولاعىنىڭ ولشەمى - 2200ح35 م2. جوبالاردىڭ قۇنى 117،7 ملرد تەڭگەنى قۇرايدى.
"مەملەكەت باسشىسىنىڭ تاپسىرماسى بويىنشا كاتونقاراعاي، زايسان جانە كەندىرلى كۋرورتتىق ايماقتارىندا شاعىن وڭىرلىك اۆياسيانىڭ جاڭا اۋەجايلارى تيپىندەگى جوبالار ىسكە اسىرىلۋدا. قازىرگى ۋاقىتتا قۇرىلىستى باستاۋ ءۇشىن بارلىق قاجەتتى دايىندىق ءىس–شارالارى جۇرگىزىلۋدە"،- دەدى ۆيسە-مينيستر.
بۇل رەتە 74 ورىندى قامتيتىن ATR-72، Q-400 Bombardier سياقتى وڭىرلەرگە ۇشۋعا ارنالعان ۇشاقتاردى پايدالانۋ جوسپارلانىپ وتىر. ءۇش ۇشاق ونەركاسىپتى دامىتۋ قورى ارقىلى ساتىپ الىنادى. كۋرورتتىق ايماقتارعا الماتى، استانا جانە باسقا دا ءىرى قالالاردان تىكەلەي رەيستەر ۇيىمداستىرىلادى.
سونىمەن قاتار مەملەكەت جىل سايىن 26 الەۋمەتتىك ماڭىزى بار اۋە باعىتىن سۋبسيديالايدى. ولاردىڭ ىشىندە ءۇشارال، ءۇرجار، تۇركىستان، اقتاۋ جانە باسقا دا تانىمال تۋريستىك قالالارعا باعىتتار بار. وتكەن جىلى ءۇشارال، ءۇرجار جانە بالقاش قالالارىنداعى شاعىن اۆياسيا تەرمينالدارى مەن اۋەايلاقتارىن جوندەۋ جۇمىستارى اياقتالدى.
جەرۇستى ينفراقۇرىلىمىن جاقسارتۋ ءۇشىن 2024 جىلى 10 اۋەجايدا قۇرىلىس جانە جوندەۋ جۇمىستارى جۇرگىزىلدى، 350 ملرد تەڭگە جەكە ينۆەستيسيا ەسەبىنەن الماتى، شىمكەنت جانە قىزىلورداداعى جولاۋشىلار تەرمينالدارى جاڭعىرتىلدى، بۇل ولاردىڭ وتكىزۋ مۇمكىندىگىن 6،5 ەسەگە ارتتىردى. اقتاۋ جانە پاۆلودار اۋەجايلارىندا ۇشۋ-قونۋ جولاقتارىن كۇردەلى جوندەۋ بيىل اياقتالادى.
اۆياحابتاردى دامىتۋ جانە جۇك اعىنىن ارتتىرۋ ءۇشىن 6 نەگىزگى اۋەجاي انىقتالدى. ولاردى جاڭعىرتۋ اياسىندا 2،1 ملرد دوللار كولەمىندە جەكە ينۆەستيسيا تارتۋ جوسپارلانۋدا.
سونىمەن قاتار تاسىمالداۋدى تۇراقتاندىرۋ ءۇشىن اۆياوتىننىڭ جەتكىلىكتى قورىن قامتاماسىز ەتۋ ماڭىزدى. اۆياوتىن قۇنىن تومەندەتۋ، ءوندىرىستى ۇلعايتۋ جانە جەتكىزىلىمدەگى دەلدالداردى جويۋ ءۇشىن بقدا جانە ەنەرگەتيكا مينيسترلىگىمەن جۇمىس جۇرگىزىلۋدە.
2025 جىلى 16 جاڭا حالىقارالىق باعىت جوسپارلانعان. ازاماتتىق اۆياسيا اكادەمياسى جىل سوڭىنا دەيىن قازاقستاندىق ۇشقىشتار مەن ينجەنەرلەردى دايارلاۋ ءۇشىن ەۋروپالىق اۆياسيالىق قاۋىپسىزدىك اگەنتتىگىنىڭ سەرتيفيكاتىن الۋدى جوسپارلاپ وتىر. جىل سايىن سالاعا 500-600 جاڭا مامان قاجەت، ءقازىر قازاقستاننىڭ ازاماتتىق اۆياسياسىندا 23 مىڭ ادام جۇمىس ىستەيدى.
