ءماجىلىس دەپۋتاتتارى سەنات ەنگىزگەن ءبىرقاتار تۇزەتۋلەردى ماقۇلداپ، زاڭ جوباسىن قابىلدادى. بۇل زاڭ جوباسىندا، سونىمەن قاتار زەينەتاقى جيناقتارىن مەرزىمىنەن بۇرىن الۋ تۋرالى ەرەجە دە بار.
وسىلايشا قازاقستاندىقتار 2021 جىلدىڭ 1 قاڭتارىنان باستاپ زەينەتاقى جيناعىنىڭ بەلگىلى بولىگىن باسپانا جاعدايىن جاقسارتۋعا، ەم-دوم الۋعا نەمەسە جەكە قارجى كومپانيالاردىڭ باسقارۋىنا بەرە الادى.
بۇل تالاپ ىلگەرىدە ايتىپ كەتكەندەي 2021 جىلدىڭ 1 قاڭتارىنان باستاپ كۇشىنە ەنەدى.
جالپى، زاڭ جوباسى مەملەكەت باسشىسىنىڭ جولداۋىن جۇزەگە اسىرۋعا جانە ەكونوميكالىق ءوسىمدى قالپىنا كەلتىرۋدىڭ كەشەندى جوسپارىندا كوزدەلگەن شارالاردى جۇزەگە اسىرۋعا باعىتتالعان.
ماسەلەن، زاڭ جوباسىندا ينۆەستيسيا تارتۋدىڭ جاڭا قۇرالى - ينۆەستيسيالىق كەلىسىم تەرمينى ەنگىزىلەدى. ودان بولەك پروسەدۋرالاردى وڭتايلاندىرۋ جانە ءمجا (مەملەكەتتىك-جەكەمەنشىك ارىپتەستىگى) تەتىكتەرىن جەتىلدىرۋ قاراستىرىلعان.
كاسىپكەرلىك سۋبەكتىلەرىنە قولايلى جاعداي جاساۋ ءۇشىن "ءبىر تەرەزە" قاعيداتى نەگىزىندە "بيزنەس ءۇشىن ۇكىمەت" ۆەب-پورتالىن ەنگىزۋ، سونداي-اق ىسكەر سەرىكتەستەر ءتىزىلىمىن ەنگىزۋ بويىنشا ءتيىستى فۋنكسيا جۇكتەلەدى. ال تاماق جانە جەڭىل ونەركاسىپتە سالىنىپ جاتقان جاڭا نىساندار ءۇشىن ينۆەستيسيالار شەگى ەكى ەسەگە ازايادى.
قارجى نارىعىنىڭ تۇراقتىلىعىنا سايكەس سينديكاتتالعان نەسيە بەرۋ تەتىگى جەتىلدىرىلەدى. بۇل بىرنەشە بانكتەر مەن حالىقارالىق قارجى ينستيتۋتتارىنا قارىز الۋشىعا ءبىر كەلىسىم بويىنشا نەسيە بەرۋگە مۇمكىندىك بەرەدى.
