استانا قالاسىنىڭ مادەنيەت باسقارماسىن باسقارعان بولات ماجاعۇلوۆقا قاتىستى سوت باستالدى، دەپ حابارلايدى Dalanews.kz.
ايتا كەتەيىك، بولات ماجاعۇلوۆ پەن مەردىگەرلەر سۋبۇرقاق قۇرىلىسى كەزىندە 1 ملرد تەڭگە جىمقىردى دەگەن كۇدىككە ىلىنگەن بولاتىن.
بولات ماجاعۇلوۆ پەن مەردىگەرلەرگە قاتىستى ءىس استاناداعى قىلمىستىق ىستەر جونىندەگى اۋدانارالىق سوتتا قارالىپ جاتىر.
ماجاعۇلوۆقا قىلمىستىق كودەكستىڭ 189-بابىنىڭ 4ء-بولىمى، 2-تارماعى بويىنشا «سەنىپ تاپسىرىلعان بوتەن مۇلىكتى يەمدەنۋ نەمەسە ىسىراپ ەتۋ، ياعني اسا ءىرى مولشەردە ۇرلاۋ» ايىبى تاعىلدى. ونىمەن بىرگە ايىپتالۋشىلار قاتارىندا – اقشا جىمقىرۋ كەزىندە كومەكتەستى دەپ ايىپتالىپ وتىرعان ءمادي قاناپين دە بار. ول بىرنەشە كومپانيانىڭ باسشىسى رەتىندە كورسەتىلگەن.
ماجاگۇلوۆتىڭ قورعاۋشىسى قاماۋعا الۋ بۇلتارتپاۋ شاراسىن ەلدەن شىعۋعا تىيىم سالۋعا نەمەسە ءۇيقاماققا اۋىستىرۋدى سۇراعان. الايدا پروكۋرور مەن باسقا ايىپتالۋشىنىڭ ادۆوكاتى بۇل ءوتىنىشتى قاناعاتتاندىرۋدان باس تارتۋدى سۇرادى، سەبەبى «ماجاگۇلوۆ بولاتقا اۋىر ايىپ تاعىلعان، ال قاناپينگە قىلمىس جاساۋعا كومەكتەستى دەگەن ايىپ تاعىلدى، بۇدان بولەك، تەرگەۋ بارىسىندا ماجاگۇلوۆ قاشىپ كەتۋگە تىرىسقان، كوزبە-كوز بەتتەستىرۋگە كەلمەگەن، شەتەلگە شىعىپ كەتۋ ءۇشىن بيلەتتەر الىپ قويعان".
ماجاگۇلوۆ تا، قاناپين دە ايىپتاۋ اكتىسى جاريالانعاننان كەيىن ءوز كىنالارىن مويىنداعان جوق.
ەسكە سالايىق،ەكس-شەنەۋنىك بولات ماجاعۇلوۆتىڭ ۇستالعانى تۋرالى قارجىلىق مونيتورينگ اگەنتتىگى ءمالىم ەتتى. استانا قالاسىنىڭ "مادەنيەت باسقارماسى" ءمم-نىڭ بۇرىنعى باسشىسى مەن مەردىگەر ۇيىم وكىلدەرىنە قاتىستى اسا ءىرى كولەمدە بيۋدجەت قاراجاتىن جىمقىرۋ فاكتىسى بويىنشا قارجىلىق مونيتورينگ اگەنتتىگى سوتقا دەيىنگى تەرگەۋ امالدارىن جۇرگىزدى.
2016 جىلى استانا كۇنى مەرەكەسىنە وراي سالىنعان "كۇن" ("ەسىل وزەنىندەگى جارىق-يلليۋميناسيالىق جانە وت شوۋى") سۋبىرقاعىنىڭ قۇرىلىسى كەزىندە مەملەكەتتىك ساتىپ الۋ راسىمدەرى جۇرگىزىلمەي تىكەلەي كەلىسىمشارتتار جاسالعان. سۋبۇرقاق جوبالىق قۇجاتتاماسىز جانە مەملەكەتتىك ساراپتامادان وتپەي سالىنعان.
قۇرىلىس بارىسىندا تەحنيكالىق سيپاتتامالارعا سايكەس كەلمەيتىن ساپاسىز ماتەريالدار قولدانىلعان. ناتيجەسىندە اتالعان نىسان 2017 جىلدان باستاپ جۇمىس ىستەمەي، قازىرگى تاڭدا اپاتتى جاعدايدا تۇر.
ۇرلانعان قاراجاتتىڭ كولەمى 1 ملرد تەڭگەدەن اسىپ وتىر.
كۇدىكتى، استانا قالاسىنىڭ "مادەنيەت باسقارماسى" ءمم-نىڭ بۇرىنعى باسشىسى بولات ماجاعۇلوۆ ۇستالىپ، ۋاقىتشا ۇستاۋ يزولياتورىنا قامالدى. تەرگەۋ اياسىندا ونىڭ مۇلكىنە تىيىم سالىندى. ونىڭ ىشىندە 3 كوممەرسيالىق نىسان، 2 اۆتوتۇراق ورنى جانە استانا قالاسىنداعى پرەميۋم ساناتتاعى پاتەر.
اتالعان ءىس بويىنشا كۇدىكتىلەردىڭ مۇلكىنە جالپى سوماسى 572 ميلليون تەڭگەدەن استام سوماعا شەكتەۋ قويىلدى. ق ر قپك 201-بابىنا سايكەس، سوتقا دەيىنگى تەرگەپ-تەكسەرۋ دەرەكتەرى جاريا ەتۋگە جاتپايدى.
