Бұл туралы брифингте Түркістан облысының цифрландыру, мемлекеттік қызметтер көрсету және архивтер басқармасының басшысы Марат Айнабеков мәлімдеді, – деп хабарлайды Dalanews.kz Түркістан облысы әкімінің баспасөз қызметіне сілтеме жасап.
«Түркістан облысы аумағындағы 829 ауылдық елді мекеннің 690-ында 4G және 3G мобильді интернет желісі бар. Қалған 139 елді мекеннің 100-і 2G мобильді байланыс желісімен қамтылған. Ал 39 елді мекенде ұялы байланыс мүлдем жоқ.
Қазіргі уақытта орталық атқарушы органдармен «Қолжетімді ғаламтор» ұлттық жобасы аясында елді мекендерді талшықты-оптикалық байланыс желілерімен қамту жүргізілуде.
– Түркістан облысы аумағына тиесілі 650 шақырым республикалық және негізгі облыстық жолдарды толығымен мобильді интернет желісімен қамту мақсатында қосымша 14 базалық станция орнату үшін «Кселл» АҚ-мен келісім-шарт жұмыстары жүргізілуде.
Одан бөлек, өңірдегі Түркістан қаласы әкімдігі, «Конгресс Холл» сарайы, «Түркістан Арена» стадионы, автовокзал, «Фараб» кітапханасы, «Батыр» жастар сарайы, Керуен сарай, Түркістан қаласының әуежайы және «Rixos» қонақ үйі сияқты маңызды туристік нысандарында 5G мобильді интернеті іске қосылған. Сонымен қатар, Түркістан облысына қарасты 911 мемлекеттік мектептің барлығы интернет желісімен қамтылған, – деді Марат Айнабеков.
2024 жылдың алғашқы кезеңінде 132 елді мекенде интернет қосу базалары орнатылды, олардың ішінде 111 елді мекенде жұмыстар толық аяқталды. Әр елді мекенде орнатылған антенналық-діңгек құрылыстары арқылы интернет жылдамдығы мен сапасы едәуір жақсарған. Бұл шаралар операторлардың инвестициялары және мемлекеттік бюджет есебінен жүзеге асырылуда. Жалпы алғанда, Қазақстан бойынша ұлттық жоба 3 мыңнан астам ауылды кеңжолақты интернет желісімен қамтуды жоспарлап отыр. Жоба аясында 1,5 трлн теңге бөлінген, оның көп бөлігі жеке инвесторлардың есебінен қарастырылған. Сонымен қатар, 2027 жылға дейін ел бойынша жоғары жылдамдықты интернетпен қамту деңгейін 100%-ға жеткізу көзделуде.
Мұндай бастамалар Түркістан облысындағы ауылдардың экономикалық және әлеуметтік жағдайын жақсартып, цифрландыру саласындағы аймақтың дамуына ықпал етеді. Алайда, кейбір аудандарда интернет сапасына қатысты мәселелер әлі де шешілмеген, бұл жобаның әрі қарай іске асырылуына ықпал етуі тиіс.
Түркістан облысының тұрғындары интернетті негізінен білім алу, мемлекеттік қызметтерге қол жеткізу, қаржылық операциялар жүргізу және әлеуметтік желілерде белсенділік таныту үшін кеңінен пайдаланады.
Айталық білім беру және мемлекеттік қызметтер қазіргі таңда интеренет желісіне толықтай байланған. Облыс аумағындағы 911 мектеп интернетке қосылған, бұл оқушылар мен мұғалімдердің онлайн ресурстарға қолжетімділігін қамтамасыз етеді. Сонымен қатар, интернет арқылы мемлекеттік қызметтерге және электронды банк жүйелеріне қолжетімділік ауыл тұрғындары үшін өте маңызды, әсіресе шалғай аймақтарда.
Ал жергілікті тұрғындар Instagram, Facebook сияқты платформаларда белсенді. Аймақтағы туристік нысандарда, оның ішінде Түркістан қаласының «Rixos» қонақүйі, «Керуен сарай» және әуежайында 5G интернеті қосылған. Бұл туристер мен жергілікті кәсіпкерлер үшін үлкен мүмкіндік
Тұрғындар арасында интернетті қолдану қарқыны артуда, бірақ шалғай аймақтарда кейбір мәселелер әлі де шешілмеген. Жоспарланған ұлттық жобалар бұл қиындықтарды шешуге бағытталған.
Өз кезегінде Марат Айнабеков облыста қоғамдық қауіпсіздік қамтамасыз ету мақсатында 912 жалпы бейнебақылау камералары бар. Одан бөлек, жол қауіпсіздігін қамтамасыз ету үшін 179 нүктеде аппараттық-бағдарламалық кешендер іске қосылған.
Биыл қосымша 50 аппараттық-бағдарламалық кешен («Сергек», «Мерген») мен 200 бейнебақылау камераларын орнату жоспарлануда. Бүгінде Түркістан қаласында тұрғындардың және қонақтардың қауіпсіздігін қамтамасыз ету мақсатында 812 бейнебақылау камерасыжұмыс істейді. Бұл камералар қоғамдық орындарда, негізгі көше қиылыстарында және қаланың басқа да маңызды нүктелеріне оратылған. Олар тәулік бойы әрекет етіп, түсірілген бейнематериалдарды 30 күнге дейін сақтайды. Сонымен қатар, «SOS» жедел жәрдем батырмалары да іске қосылған, оларды басу арқылы шұғыл түрде полиция қызметкерлерімен байланысуға болады. «SOS» жедел жәрдем батырмалары қауіпсіздік пен шұғыл қызмет көрсету жүйесін жақсартуды көздейді. Түркістан қаласындағы мұндай құрылғылардың саны өсіп келеді, және олар қоғамдық орындарда, тұрғындар көп шоғырланатын аймақтарда орналастырылған.
«SOS» батырмаларын басқан кезде тұрғындар немесе қонақтар полиция, жедел жәрдем немесе төтенше жағдай қызметкерлерімен дереу байланыса алады. Бұл төтенше жағдайларда уақытты үнемдейді. Адамдар қажет болған жағдайда батырманы пайдаланып, шұғыл көмекке қол жеткізеді. Сонымен қатар аталған батырмалар орнатылған жерлер бейнебақылау камераларымен бірге жұмыс істейді, бұл оқиға орнына нақты және жедел ақпарат алуға мүмкіндік береді. 2023 жылы Түркістан қаласында осы батырмалар арқылы 5,458 кіріс қоңырауы және 7,103 шығыс қоңырауы тіркелген. Бұл құрылғылардың белсенді қолданылып, тиімділігін көрсеткенін дәлелдейді
«SOS» батырмалары қала тұрғындарының өмір сүру сапасын арттыруға және төтенше жағдайлардағы жауап беру уақытын қысқартуға көмектеседі. Жоспар бойынша, құрылғылар саны әлі де артып, қаладағы қауіпсіздік инфрақұрылымы дамытылады.
Аталған инфрақұрылым Түркістан қаласында қылмыстың алдын алуға, құқық бұзушылықтарды анықтауға және жол-көлік оқиғаларының салдарын тез анықтауға ықпал етеді. Қауіпсіздікті күшейту және «ақылды қала» қағидаттарын енгізу бағытындағы жұмыстар жалғаса бермек
Сонымен қатар, басқарма тарапынан «2GIS» компаниясымен Түркістан қаласының автопаркінің барлық автобустарына GPS трекер орнату бойынша келіссөздер жүргізілуде.
Түркістан облысында «Қолжетімді интернет» ұлттық жобасы аясында интернет инфрақұрылымын дамыту белсенді жүзеге асырылуда. Бұл жоба 2024-2027 жылдарға арналған және ауылдық елді мекендерді, сондай-ақ негізгі автожолдар мен қалаларды жоғары жылдамдықты интернетпен қамтамасыз етуге бағытталған.
