2025 жылдың алғашқы жартыжылдығында Қазақстанда автонесиелеу көлемі 1,2 трлн теңгеге жетті, деп хабарлайды Dalanews.kz.

"Осы кезеңде банктер автонесие бойынша 1,2 трлн теңге несие берді (+53% жылдық өсім), олардың халыққа берілген жаңа қарыздардағы үлесі 8,8%-дан 13,2%-ға дейін өсті", – делінген ҚҚҚ таратқан 2025 жылдың алғашқы жартыжылдығындағы Қазақстан автонесиелеу нарығына арналған шолуда.

Мәліметке сәйкес, базалық мөлшерлеменің көтерілуіне байланысты автонесиелер бойынша орташа мөлшерлеме жартыжылдық қорытындысы бойынша сәл өсіп, 15,8% болды. Дегенмен бұл көрсеткіш 2024 жылдың алғашқы жартыжылдығындағы 19,7%-дан айтарлықтай төмен.

Сондай-ақ автонесиенің орташа сомасы жыл басынан бері 5,7%-ға өсіп, 6,7 млн теңгеге жетті. Бұл өсім автомобиль бағасының жылдық есеппен 11,1%-ға қымбаттауымен байланысты.

Орташа айлық төлем 110,7 мың теңге болып, өткен жылғы деңгейден 8,1%-ға төмендеді.