Мәжіліс депутаты Таңсәуле Серіков елде Паралимпиадаға өз деңгейінде қаржы бөлінбейтінін ашық сынаған еді. Осы жайтқа қатысты Қазақстанның әуе-спорттық эквилибрі бойынша федерациясы өкілдері үндеу жариялады, - деп хабарлайды Dalanews.kz.
Серіковтың айтуынша, Қазақстанда стриптиз көрсетілетін спортқа ақша бөлінеді.
"Олимпиадалық емес спорт түрлерін қолдаймыз, жақсы, жарайсыздар. Ал мүгедектер тоқалдан туды ма? Бірде-біреуіне қолдау көрсетілмейді. Мүгедектер де спортпен шұғылданғысы келеді.Мүгедектер де адамдар, олар да алтын әкеледі. Нидерланды бір жыл ішінде Олимпиадаға 41 миллион доллар жұмсайды, елге 36 медаль әкеледі, оның 10-ы алтын. Қазақстанда 775 миллион доллар жұмсаймыз, бірақ 8 қола медаль әкелеміз. Паралимпиадамен салыстырыңыз. ...Біздің пара велосипедшілерімізді саусақпен санауға болады, бірақ оларға велосипед сатып алып бере алмаймыз. Велосипед Қазақстанға жеткенше, оның бағасы 9 миллионнан 36 миллионға дейін өсіп кетеді. Содан кейін оған бүкіл ел болып жинап береміз. Бірақ бұл ретте мемлекет стриптиз көрсетілетін спорт түріне ақша бөледі",- деген еді депутат.
Даулы депутаттық сауалдан кейін спортшылар бас көтерді. Қазақстанның әуе-спорттық эквилибр бойынша федерациясының өкілдері Президент Қасым-Жомарт Тоқаевқа видеоүндеу жолдады.
"Пилондағы спорт стриптизге тең емес. Бұл - көкжиегі тар адамдардың ойы. Пилондағы спорт - көп уақытты, күш пен төзімділікті қажет ететін спорт. ...Біздің федерациядағы спортшылардың басым бөлігі - кәмелет жасына толмаған балалар. Олар - халықаралық, әлем чемпионаттарының жүлдегерлері. ...Құрметті Президент осы мәселені шешуіңізді сұраймыз және балаларымыздың, спорттың қорғалатынына сенеміз", - деді Қазақстанның әуе-спорттық эквилибр бойынша федерациясы өкілдері.
