Қырғызстан ІІМ Ішкі тергеу қызметі мен Шу облыстық ІІД қызметкерлері бопсалау фактісі бойынша екі шетелдік азаматты ұстады, деп хабарлайды Dalanews.kz.

1 ақпанда Қазақстан азаматтары Шу облыстық ЖПҚБ қызметкерлерінен әлеуметтік желілерде беделіне нұқсан келтіретін бейнематериалдарды жариялаймыз деп қорқытып, 2500 доллар талап еткені туралы ақпарат түскен.

Cводка мәліметінше, аталған дерек Шу облыстық ІІД-де тіркеліп, Қырғыз Республикасының Қылмыстық кодексінің 208-бабы (“Бопсалау”) бойынша қылмыстық іс қозғалған.

Тергеу барысында полицияның жедел уәкілі А.Н. мен полиция аға сержанты М.Б. Сокулук ауданына қарасты Военно-Антоновка ауылында қызмет атқарғаны анықталды. Олар шетел азаматтары Б.А. мен А.Р. басқарған Mercedes-Benz көлігін тоқтатқан. Тексеру кезінде жүргізушілерде тиісті құжаттар болмаған.

“Автокөлікті айып тұрағына эвакуациялау кезінде шетелдік азаматтар патрульдік көліктің бардачогына 6000 сом ақша тастап, бұл сәтті бейнежазбаға түсірген. Кейіннен олар полиция қызметкерлерін осы бейнематериалды жариялаймыз деп қорқытып, 2500 доллар талап еткен”, – делінген басқарма хабарламасында.

Бопсалау барысында құқық қорғау органдары күдіктілерді ақшаны алып жатқан жерінен қолға түсірді. 1990 жылы туған Б.А. мен 1984 жылы туған А.Р. уақытша ұстау изоляторына қамалды.

Күдіктілерден арнайы белгіленген ақшалай қаражат тәркіленіп, қажетті сот-медициналық сараптамалар тағайындалды. Қазіргі уақытта тергеу амалдары жалғасуда.