Бүгін Үкімет отырысында Қазақстан халық үшін бағасы жағынан тиімді шетелдік маркетплейстерді елімізде тіркелуін, сондай-ақ олардан сатып алынатын тауарларға сертификаттауды енгізуді, ал сатып алынатын тауарларға баж салығын енгізуді міндеттегелі жатқаны белгілі болды. Осы жағынан алғанда, бұған дейін тартымды болып келген бұл онлайн алаңдардағы тауарлардың қымбаттап шыға келуі мүмкін бе? Журналистердің осы сипаттағы сауалына Сауда және интеграция министрі Арман Шакқалиев жауап берді, деп жазады Dalanews.kz.
"Әрине, сөз етіліп отырған өзгерістер әсер ететін болады, бұл - объективті шындық. Бірақ қымбаттау немесе арзандау дегенге келетін болсақ, бүгіндері егер Қазақстанның құқықтық алаңында жұмыс істеп жатқан маркетплейстердегі бағаларды салыстыратын болсақ, олардың өзара бәсекеге қабілетті екенін көруге болады... Сонымен бірге, біз талдау жүргізе отырып, тұтынушылардың құқықтарын қорғау, тауарлар сапасын бақылауды жоғарлату тұрғысында қабылдаған бұл өзгерістер бағаны еселеп қымбаттауына түрткі болмайтынын аңғардық. Яғни, түзетулер енгізілгеннен кейін қымбаттау орын алады деп айтуға болмайды, өйткені бұл өте бәсекеге қабілетті нарық", – деп сендіреді Арман Шакқалиев.
Дегенмен министр сараптамалық болжамдарда, егер қымбаттау орын алса, оның көлемі 15%-ды құрауы мүмкін деп айтылғанын мойындады.
"Сарапшылардың негізгі бөлігі заңнаманың өзгеруіне байланысты бөлшек саудада қымбаттау болмайды деген тұжырымға сүйенеді, өйткені нарық іс жүзінде әбден қалыптасқан, бүгіндері сатып алынып жүрген тауарлар қазақстандық заңнама бойынша тіркеліп, жұмыс істеп жатқан маркетплейстерде де бар. Сол секілді тіркеудің қажеті жоқ дегенді жақтаушылар бар, әйтпесе, олардың пікірінше, баға қымбаттайды. Бірақ тағы да қайталап айтамын, бүгіндері жұмыс істеп жатқан маркетплейстерде (Қазақстанда - шамамен) қымбаттау болмайды. Мәселен, Temu мен Pindodo Қазақстанда тіркелмеген, тағы да сіздердің сұрақтарыңызбен қарастыратын болсақ, мұнда да қымбаттау болмайды. Өйткені оларда тауар бар, баға саясаты қалыптасқан және біз ұсынатын заңнамалық талаптар олардың тарапынан қосымша шығындарды қажет етпейді", – деп сендіреді Арман Шакқалиев.
Оның айтуынша, министрлік дайындаған өзгерістер өндірістік факторларға әсер етпейді.
"Сондықтан заңнамадағы біздің өзгерістер шетелдік маркетплейстердегі тауарлардың құнын арттырады деп айта алмаймын. Шетелдік маркетплейстерге қатысты қосымша талаптарды енгізуге қарсы сарапшылар бар. Оларға былай дедік (тәуекел бар - шамамен): біз айттық, есеп-қисапты сұрадық, нақты цифрларды беріңіздер дедік, бірақ әлі түк жоқ қой. Бізде процедуралар, қоғамдық талқылаулар бар, егер есеп-қисап ұсынылып жатса, әрине, біз оларға қатысты жауап беретін боламыз. Әзірге, бағаның өсетінін растайтын есеп пен нақты негіздер ұсынылмаған. Яғни, әзірге сараптамалық бағалауда нақты сандар мен дәлелдер жоқ", – деп сөзін түйіндеді Арман Шакқалиев.
Бұған дейін Үкімет басшысы Олжас Бектенов шетелдік маркетплейстерге қатысты заңнаманы қатайту жөнінде тиісті ведомстволарға бірқатар тапсырма бергені мәлім болған еді. Бүгінгі Үкімет отырысында Сауда және интеграция министрі Арман Шакқалиев шетелдік маркетплейстерді тіркеу бойынша электрондық платформаны енгізуді ұсынды. Ал "Цифрлық Қазақстан" қауымдастығы кеңесінің төрағасы Денис Степанцев Қазақстанда электрондық сауданы дамыту жөнінде бірқатар ұсынысты алға тартты. Соның ішінде шетелдік алаңдардан сатып алынатын тауарларды міндетті сертификаттауды енгізуді, шетелдік платформаларда сатып алынатын тауарларға баж салығын енгізу ұсынылды. Оның айтуынша, бұл қадам отандық бизнес пен шетелдік бәсекелестер үшін тең жағдай жасайды.
