Мәжіліс депутаты Асхат Аймағамбетов жаңа Салық кодексіне әлеуметтік сала бойынша қандай түзетулер берілгенін айтты, - хабарлайды Dalanews.kz.
Салық кодексінің жобасын қарау барысында депутаттар білім, ғылым, мәдениет, спорт және денсаулық сақтау салаларын қолдау және осы бағыттарда қымбатшылыққа жол бермеу мақсатында бірқатар түзету берген.
Депутаттың сөзінше, ұсынылған негізгі өзгерістер мыналар:
- Мәдениет, тарихи-мәдени мұра және арнайы әлеуметтік қызметтер саласындағы ұйымдарды КТС-тен толық босату;
- Отандық кітап басылымдары мен анимация индустриясын ҚҚС-тан босату;
- Білім, ғылым, спорт және денсаулық сақтау ұйымдары үшін корпоративтік табыс салығын 5%-ға дейін төмендету;
- Қатерлі ісік, орфандық, психикалық, жүрек-қан тамырлары, бүйрек, аутоиммунды, диабет және басқа да күрделі ауруларды емдеуге бағытталған медициналық қызметтерді ҚҚС-тен босату; ал қалған бағыттар бойынша да ҚҚС-ті қазіргі деңгейдегідей 0% күйінде сақтау немесе компромисс ретінде 5%-ға дейін азайту;
- Бұл ауруларды емдеуге арналған дәрілік заттарды ҚҚС-тен босату, ал басқа бағыттар бойынша да 0%, болмаса компромисс ретінде 5%-ға дейін азайту;
- Әдеби, көркем және ғылыми шығармалар үшін авторлық алымдарға салық жеңілдіктерін беру.
- Қаржылық қызметтерге (банктік аударымдар, зейнетақы қорларының қызметі, төлем карталары бойынша операциялар) ҚҚС салынбауы, яғни бұл саланың қымбаттауына жол бермеу;
- Букмекерлік кеңселерге, казиноларға салықты айтарлықтай көбейту;
- Құрамында трансмайлар мен энергетикалық сусындар бар өнімдерге акциз;
- Көптеген монополияларға арналған салықтық жеңілдіктерді жою;
- Саяжайларға салынатын салық мөлшерін төмендету;
"Бұл түзетулеріміз әлі де жұмыс тобының отырыстарында талқыланып жатыр. Нақты шешімдер әлі қабылданбады", - деді ол.
