Almaty qalasyndaǵy himiia-biologiia baǵytyndaǵy NIS oqýshylary AQSh-tyń Boston qalasyndaǵy áigili Massachýsets tehnologiialyq institýtynyń uiymdastyrýymen ótetin XVI MIT MUN konferentsiiasynan oraldy. Jahandyq forým álemniń barlyq kontinentteriniń 50-den astam elderinen kelgen 300-den asa delegattaryn bir alańǵa jinady. Ziiatkerler Amerika Qurama shtattarynyń, Ulybritaniia, Germaniia, Kanada, Avstriia, Shveitsariia, Qytai, Avstraliia, Polsha, Shvetsiia syndy memleketterdiń úzdik mektepteriniń ókilderimen qatar BUU modeliniń ondaǵan komitterinde túrli jahandyq problemalardy kóterip, qyzý diskýssiia ornatty.
Úsh kún qazaqstandyqtarǵa sheteldik qurdastarymen tabysty yntymaqtastyq pen syndarly dialogtyń zor tájiribesin syilady.
– Ár komitette biz BUU modeli boiynsha jastar qurǵan MUN qozǵalysynyń delegattary retinde álemdi tolǵandyratyn eń ózekti máselelerdi talqyladyq, berilgen elderdiń ustanymyn qorǵadyq . Qatysýshylardyń kópshiligi-aǵylshyn tildi, sondyqtan bedeldi minberge kóterilý jáne BUU – nyń negizgi resmi tilinde sóileý biz úshin úlken jaýapkershilik boldy. Biz óz mindetimizdi laiyqty oryndadyq dep oilaimyn, – dep bólisti 11-synyp oqýshysy Dinmuhamed Kósherbaev.
NIS delegatsiiasy Ziiatkerlik mektep direktorynyń orynbasary Laýra Qyzdarbekovanyń jetekshiligimen áigili Massachýsets tehnologiialyq institýtynyń qabyrǵasynda, MUN qozǵalysy alǵash paida bolǵan elde konferentsiiaǵa qatysý baqytyna ie boldy.
Alǵash ret Amerika Qurama Shtattarynda kolledjder amerikandyq Senattyń jumysyn modeldei bastaǵan bolatyn. Búginde jyl saiyn búkil álem boiynsha myńdaǵan oqýshylar men stýdentter MUN baǵdarlamasyna qatysady. Zań, memlekettik basqarý, biznes jáne óner salasyndaǵy kóptegen kóshbasshylar oqý kezinde "BUU Modeli" baǵdarlamasynyń belsendiler qatarynda boldy.
Ziiatkerler úshin amerikandyq sapardyń áserli oqiǵasynyń biri Garvard ýniversitetine uiymdastyrylǵan kampýs-týr, álemdegi eń bedeldi ýniversitettiń ómirin óz kózderimen tamashalaý boldy.
