Quryltaidyń birinshi shaqyrylymyna jýrnalistika jáne media salasynda eńbek etken 11 azamat depýtat bolyp sailandy. Olardyń ony “Ádilet” partiiasynyń, bireýi Jalpyulttyq sotsial-demokratiialyq partiianyń atynan mandat ielendi. Jańa depýtattar buǵan deiin qandai qyzmet atqarǵan? Dalanews.kz sholý jasady.
23 tamyzda ótken sailaý qorytyndysynda "Ádilet" partiiasy 71,17 paiyz daýys jinap, Quryltaidaǵy 145 depýtattyq orynnyń 110-yn ielendi. Al Jalpyulttyq sotsial-demokratiialyq partiiaǵa sailaýshylardyń 5,11 paiyzy daýys berip, partiia segiz mandat aldy. Quryltaiǵa osy eki partiiadan buǵan deiin media salasynda eńbek etken 11 adam sailandy.
Dihan Qamzabekuly
Dihan Qamzabekuly – belgili alashtanýshy ǵalym jáne baspasóz salasynyń ókili. Ol M.Áýezov atyndaǵy Ádebiet jáne óner institýtynda, L.N.Gýmilev atyndaǵy Eýraziia ulttyq ýniversitetinde eńbek etken. Keiin “Egemen Qazaqstan” gazetine basshylyq etti, qazir “Qazaq gazetteri” seriktestiginiń bas direktory.
Janarbek Áshimjan
Janarbek Áshimjan “Jas Alash”, “Ana tili” jáne “Qazaq ádebieti” gazetterinde qyzmet atqarǵan. Ol “Ana tili” basylymynyń bas redaktory boldy. Keiin Májilis depýtaty bolyp sailanyp, “Mass-media týraly” zań jobasyn ázirlegen jumys tobyn basqardy.
Maksim Rojin
Maksim Rojin jýrnalistika jáne mediamenedjment salasynda eńbek etken. Ár jyldary buqaralyq aqparat quraldary men “Qazkontent” kompaniiasynda basshylyq qyzmetter atqardy. 2023–2026 jyldary Májilistiń VIII shaqyrylym depýtaty boldy.
Sergei Ponomarev
Sergei Ponomarev jýrnalistik eńbek jolyn Qazaq radiosynda redaktor ári júrgizýshi bolyp bastaǵan. Keiin KTK telearnasynda tilshi jáne jańalyqtar júrgizýshisi, “Habar” agenttiginde sholýshy bolyp jumys istedi. 2023–2026 jyldary Májilis depýtaty boldy.
Armangúl Toqtamurat
Armangúl Toqtamurat – “Qazaqstan” ulttyq telearnasynyń jýrnalisi jáne telejúrgizýshisi. Kórermen ony “Aqparat” pen “Jedel jeli” baǵdarlamalary arqyly tanidy. Ol áleýmettaný mamandyǵyn támamdap, áleýmettik ǵylymdar magistri dárejesin alǵan.
Irina Ten
Irina Ten – “Qazaqstan” ulttyq telearnasyndaǵy “Tańsholpan” baǵdarlamasynyń júrgizýshisi. Ál-Farabi atyndaǵy Qazaq ulttyq ýniversitetiniń jýrnalistika fakýltetin bitirgen. Televiziiadaǵy eńbek jolyn stýdent kezinde bastaǵan.
Jarqynbek Amantaiuly
Jarqynbek Amantaiuly – filolog jáne jýrnalist. Aqparat salasynda jumys istegennen keiin 2023 jyly Májilis depýtaty bolyp sailandy.
Lázzat Qojahmetova
Lázzat Qojahmetova – jýrnalist, oqytýshy jáne qoǵam belsendisi. Ol “Talbesik” kópbalaly analar odaǵy” qoǵamdyq birlestiginiń negizin qalaǵan. Birlestik arqyly kópbalaly otbasylardy áleýmettik qoldaý, járdemaqy jáne turǵyn úi máselelerin kóterip keledi.
Qarlyǵash Jamanqulova
Qarlyǵash Jamanqulova media salasy men sóz bostandyǵyn qorǵaý baǵytynda eńbek etken. Ol AQSh elshiliginde óńirlik media jónindegi keńesshi, Eýropalyq odaq ókildiginiń baspasóz jáne aqparat bóliminde qyzmetker boldy. 2022–2026 jyldary “Ádil sóz” halyqaralyq sóz bostandyǵyn qorǵaý qoryn basqardy.
Erlan Toqshylyq
Erlan Toqshylyq – jýrnalist jáne mediamenedjer. Ol Soltústik Qazaqstan oblystyq “Qyzyljar” telearnasyn 14 jyl basqarǵan. Keiin joǵary oqý ornyna aýysyp, Soltústik Qazaqstan oblystyq qoǵamdyq keńesiniń tóraǵasy qyzmetin atqardy.
Maqsut Nasibýlov
Maqsut Nasibýlov – JSDP Ortalyq apparatynyń basshysy. Buǵan deiin partiianyń jastar qanatyn basqarǵan, JSDP-nyń resmi saity men “Sotsial-demokrat” gazetin redaktsiialaǵan. Sailaý qorytyndysy boiynsha JSDP atynan Quryltai depýtaty atandy.
