Júgirý – qoljetimdi sport túri. Turaqty jattyǵý aǵzany shynyqtyryp qana qoimai, kúizelisti azaityp, jalpy densaýlyqty nyǵaitýǵa yqpal etedi. Júgirýdi qalai durys bastaý kerek?
Júgirý – eń qarapaiym ári paidaly sport túrleriniń biri. Onymen ainalysý úshin arnaiy sportzalǵa barýdyń nemese qymbat qural-jabdyq satyp alýdyń qajeti joq. Tek yńǵaily aiaq kiim men ynta bolsa jetkilikti.
Júgirý júrek pen qan tamyrlarynyń jumysyn jaqsartyp, qan ainalymyn kúsheitedi. Sonyń arqasynda júrek aýrýlarynyń qaýpi azaiady. Sonymen qatar, bul artyq salmaqtan arylýdyń tiimdi joly. Bir saǵattyq júgirý kezinde aǵza júzdegen kaloriia jumsaidy.
Júgirý adamnyń kóńil-kúiine de jaqsy áser etedi. Jattyǵý barysynda endorfin gormondary bólinip, stress pen sharshaýdy azaitady. Turaqty júgirý immýnitetti kúsheitip, aǵzany túrli aýrýlardan qorǵaidy.
Eger siz júgirýdi qolǵa alǵyńyz kelse, myna erejelerdi este saqtańyz:
1. Asyqpańyz. Alǵashqy kúni-aq marafon qashyqtyǵyn baǵyndyrýdyń qajeti joq. Júgirýdi jyldam júrý men jeńil júgirýdi aralastyrýdan bastańyz (mysaly: 2 minýt jeńil júgirý, 1 minýt jaiaý júrý).
2. Durys aiaq kiim tańdańyz. Kádimgi jalpaq tabandy kedylarmen júgirý býyndarǵa úlken salmaq túsiredi. Arnaiy amortizatsiiasy bar, júgirýge arnalǵan krossovka tańdaǵanyńyz jón.
3. Deneni qyzdyrý. Jattyǵýdy bastamas buryn 5–10 minýt býyndardy qyzdyryp, bulshyqetterdi sozyńyz. Bul jaraqat alýdyń aldyn alady.
4. Tynys alýdy baqylańyz. Aýany murynmen jutyp, aýyzben shyǵarýǵa tyrysyńyz. Eger demińiz tarylsa, jyldamdyqty báseńdetińiz.
Júgirý – densaýlyqty nyǵaitýdyń, sergek júrýdiń jáne oidy retke keltirýdiń tamasha tásili. Eń bastysy – alǵashqy qadamdy jasap, júgirýdi bastaý.
Sabyrkýlov Dias
