AQSh Memlekettik departamenti halyqaralyq konferentsiiada Afrika kartasyn óreskel qatelermen usynyp, synnyń astynda qaldy, dep habarlaidy Dala News.
Oqiǵa Braziliianyń Rio-de-Janeiro qalasynda ótken AIDS 2026 halyqaralyq konferentsiiasynda bolǵan. AQSh Memlekettik departamentiniń tanystyrylymynda kórsetilgen Afrika kartasynda belgilengen birde-bir memleket óz ornynda kórsetilmegeni anyqtaldy.
Máselen, Nigeriia Sahara shóliniń ortasynda ornalasqan teńizge shyǵatyn joly joq memleket retinde beinelense, Mozambik Afrikanyń shyǵysyndaǵy Múiis óńirine «kóshirilgen». Al Kot-d’Ivýar Batys Afrikanyń ornyna qurlyqtyń shyǵys jaǵynan bir-aq shyqqan. Kamerýn ataýy kartada bolǵanymen, eldiń ózi múlde kórsetilmegen.
Jeli qoldanýshylary slaidtaǵy OpenAI belgisine nazar aýdaryp, kartanyń jasandy intellekt kómegimen daiyndalǵanyn aitty. Keiin bul aqparatty Reuters te rastady.
AQSh Memlekettik departamenti keiinnen qatelikti moiyndap, oǵan konferentsiia bastalar aldynda tanystyrylymdy asyǵys óńdegen qyzmetker sebep bolǵanyn málimdedi.
«Bul – ókinishti qatelik. Biz qatysýshylardan, ásirese afrikalyq seriktesterimizden keshirim suraimyz jáne tolyq jaýapkershilikti óz moinymyzǵa alamyz», – dedi vedomstvo ókili.
Oqiǵa áleýmettik jelilerde keńinen talqylanyp, kópshilik AQSh diplomatiialyq mekemesiniń mundai qarapaiym geografiialyq qatege jol berýin kásibilikke nuqsan keltiretin jaǵdai dep baǵalady. Sonymen qatar bul jaǵdai resmi qujattar men prezentatsiialardy daiyndaýda jasandy intellektini paidalanǵan kezde adam tarapynan muqiiat tekserýdiń qanshalyqty mańyzdy ekenin taǵy bir márte kórsetti.
